Popole Faipule i le tasi va’a toso va’a o lo o fa’aaoga i le taimi nei

Na taua e ni isi o afioga i Faipule i se iloiloga sa faia ma le Fa’atonusili o le Pulega o Taulaga ma Malaeva’alele i le vaiaso na te’a nei, o latou lagona popole i le tulaga saogalemu o le fa’atinoina o galuega mo le fa’aofiina mai o va’a tetele i totonu o le taulaga, ona e na o le tasi le va’a toso va’a o lo o fa’aaoga e le malo i le taimi nei.

Na taua e le afioga i le ali’i faipule ia Vesi Talalelei Fautanu Jr mai le le itumalo o Manu’a e fa’apea, e tatau lava ona 2 va’a toso va’a a le malo e i ai, e fesoasoani ai i le fa’atinoina o galuega i totonu o le taulaga, aua e le iloa lava le taimi e tula’i fa’afuase’i mai ai se fa’alavelave ae o lo o i ai le isi va’a toso va’a e fesoasoani.

O le tele o fesili ma manatu i le mafua’aga ua fa’atau ese atu ai va’a toso va’a e lua a le malo, fa’apea ai ma lagisi e 2 i le malo o Samoa, o le mafua’aga lea na valaauina ai se iloiloga i luma o le Komiti o le Pulega o Taulaga ma Malaeva’alele a le maota o sui, mo le fa’atalatalanoaina o lenei mataupu.

O le afioga i le ta’ita’ifono ia Kitara Vaiau na ta’ita’ia le iloiloga, ae molimau ai le afioga ia Taimalelagi Dr. Claire Poumele, ma le Fa’atonusili o le Ofisa e Pulea Oloa ma Meatotino a le malo, tofa Malo Niumata.

I le fa’atau ese atu ai o va’a toso va’a tuai a le malo i Samoa, ae totoe ai na o le va’a toso va’a e tasi, na fia malamalama ai afioga i Faipule i le tulaga saogalemu mo le Ofisa pe a oo i le taimi e fa’atino ai a latou galuega, aemaise lava i le fa’aofiina mai lea o va’a tetele i totonu o le taulaga.

Na taua e Kitara e faapea, o le popolega pito sili ona taua i Faipule, o le taimi e fa’afuase’i ai ona leaga le va’a toso va’a e tasi o lo o i ai, ae o lo o i ai le isi va’a toso va’a fa’aleoleo e fesoasoani i le galuega.

“E fa’apefea pe a tula’i fa’afuase’i mai se fa’aletonu i le va’a toso va’a e tasi o lo o i ai, ae o lo o tau fa’aofi mai se va’a oloa tele poo se meli i totonu o le taulaga, o fea la le va’a toso va’a e mafai ona fesoasoani pe afai o lea ua toe tasi le va’a a le malo o lo o i ai,” o le fesili lea a Kitara.

Saunoa Taimalelagi e fa’apea, o loo i ai lava le faanaunauga ia taunu’u mai le va’a toso va’a fou lea o loo fuafua e taunu’u mai i le masina o Novema, e le o tula’i mai se fa’afitauli e pei ona atugalu i ai afioga i Faipule.

Na fa’afetaia e Taimalelagi atugaluga o afioga i Faipule pe afai ae tula’i mai se fa’aletonu i le fa’atinoina o galuega, ae i lona talitonuga, o lo o taumafai lava lona ofisa i le malosi e mafai ai ona ia fa’atino a latou galuega ma le fa’aeteete ina ia manuia ma saogalemu tulaga uma i totonu o le taulaga.

Sa ia taua fo’i le mae’a lea ona tuuina atu e le Ofisa o le Puipuiga o le Gataifale a le malo tele (US Coast Guard) le avanoa e fa’aagafua ai le tatau lea ona 2 va’a toso va’a e tatau ona i ai, ao fa’atali ai le taunu’u mai o le va’a toso va’a fou ia Novema.

O le va’a toso va’a fou e pei ona taua, o lo o fausia nei i le aai o Louisiana, o iina fo’i lea o lo o fa’atinoina ai galuega uma mo le siakiina o le saogalemu ma tulaga uma o le va’a, a o le i auina mai i le atunu’u.

Na faamaonia atili e Taimalelagi i le maota o sui, le fa’atau ese atu lea o va’a toso va’a e lua a le malo sa i ai, le Tatoso ma le Tautua mo le kamupani va’a a le malo o Samoa, ona o le tulaga tuai ma le le toe i ai o se aoga ua i ai i nei va’a.

Na fa’amanino atili e Niumata e fa’apea, e tusa ma le $13,000 le tupe a le malo na maua mai i va’a toso va’a e lua ma lagisi e 2 na fa’atau atu i le malo o Samoa, i le taimi o le Fa’atau Tu’i a le malo i le masina o Iulai na te’a nei.