To’a 6 sui mo le Palota Faapitoa a le Itumalo o Sua #1

E to’a 6 sui ua fa’amaonia mai e le Ofisa o Palota a le malo, ua fa’amaonia o latou suafa mo le Faiga Palota Faapitoa a le Itumalo o Sua #1, lea ua fa’amoemoe e faia i le aso 24 Oketopa 2017, e sailia ai se tasi e fai ma sui o le Itumalo i le Maota o Sui i le Fono Faitulafono.

O i latou nei e aofia ai Fialupe Felila Fiaui Lutu; Ketesemane Meaole; Laloniu P. Maloa; Tuialofi Fa’alae Lauatuaa Tunupopo; Tuifagalilo P. Vele ma Uele Fale S. Uele.

O le aso Faraile na te’a nei, Setema 22, na tapunia aloaia ai le lesitalaina o suafa o i latou e fia tausinio mo le nofoa o le itumalo.

I se pepa o fa’amatalaga na tuuina mai e le Komesina o Palota, tofa Uiagalelei Dr. Lealofi Uiagalelei i le vaiaso na te’a nei, o lo o fa’amaonia mai ai suafa o i latou ua lautogia mo le fa’amoemoe a le Itumalo.

Ae ina ia tusa ai ma le Tulafono Toe Teuteu a Amerika Samoa 6.0302 (a), o le itula e 4:30 i le afiafi o le aso Lulu o le vaiaso nei, Setema 27, e fa’amuta ai le tu’uina atu o se fa’afinauga poo se talosaga fo’i e fesiligia ai le agava’a o soo se tasi o i latou ua fa’amaonia le avea ma sui tauva o le faiga palota faapitoa a le Itumalo.

A tuana’i loa le taimi ma le aso e pei ona taua e aunoa ma se talosaga e fa’alavelave pe fesiligia ai agava’a o i latou nei, ona aloaia loa lea o le avea o i latou ma sui tauva mo le faiga palota laititi a le itumalo.

O ni isi o sui ua mae’a ona lesitala mo le fa’amoemoe o le itumalo, sa tausinio fo’i i ni isi o faiga palota ua mavae. O le afioga a Tuialofi, o se tasi o sui tauva mo lenei palota faapitoa, sa ia nofoia muamua fo’i le nofoa o le itumalo i nofoaiga ua mavae.

O se tasi o sui tauva ua lesitala mo le sailiga tofi a le Itumalo, o le Faletua ia Lutu, o ia lea o lo o avea ma Failautusi a le maota o sui mo le tele o tausaga.

O le nofoa o le itumalo na avanoa ina ua fa’amavae le afioga a Puleleiite Tufele Li’amatua Jr sa ia tauaveina le nofoa, ina ua filifilia o ia e le afioga i le ali’i kovana ia Lolo Matalasi Moliga e avea ma Pulesili o le Ofisa o Fesootaiga a Amerika Samoa (ASTCA).