E LE O OE O SE SULI MONI

Vaega 88

“ ... ou te iloa fo’i e tutusa lelei le fiafia o lenei tamaitai meauli o Ianeta e tu’u fa’atasi fa’amaumauga i mea o lo o tutupu i le olaga, ma lou fo’i fiafia e tusia fa’amaumauga e fa’atatau i tala’aga o meaola o loo tutupu i le si’osi’omaga,” Na luelue le ulu o Laneselota ona ia lu’i lea o lona Tina e tago e faitau atoa le tusi, ina ia maua ai lona malamalamaaga e fa’atatau i le autu na mafua ai ona naunau Ianeta e tusia lana ulua’i tusi, lea ua avea nei ma tusi e fiafia i ai le to’atele o tupulaga e faitau. I se tasi o taeao ao lei usu le Tina o Laneselota e faigaluega, sa ia manatu e fa’ailoa i lana tama se lagona ua oso a’e i lona loto, ina ua mae’a ona ia faitauina le tusi a Ianeta. “Ua uma ona ou faitau i le tusi a Ianeta, ma ua maofa le mafaufau i le fita o le olaga sa ola mai ai, ao lea ua fa’aeaina o ia ma le manuia. Ou te iloa fo’i, o le a avea lenei tama’ita’i ma fa’ata’ita’iga i isi uma tama’ita’i talavou i totonu o le malo, i lo latou tausisi lea e fa’atino mea lelei e manuia ai o latou lumana’i.” Na fa’ai’u lava le fa’amatalaga a le fafine i laan fesili ia Lanseleota, “E te alofa ia Ianeta.” Na umi se taimi o tu Laneselota e le gagana, ao tau mafaufau sana tali i le fesili fa’aloia a lona Tina. “Vaai oe Tina, e maualuga la’u vaai i le matati’a ua ausia e lenei tama’ita’i meauli. O le mafua’aga fo’i lena o lo’u naunau ou te feiloa’i atu i ai se’i ma talanoa, ou te fiamalamalama i le mafua’aga na ala ai ona lu’i lona mafaufau na te tusia lana ulua’i tusi.”

O le masina na sosoo ai talu mai le feiloaiga a Laneselota ma Ianeta i le fale’aiga, na maua ai le valaaulia a le ali’i o Laneselota e avea ai o ia ma failauga faapitoa i le fa’auuga a se tasi o aoga maualuga i totonu o le aai o loo nofo ai. O le aoga maualuga lea na aoga ma fa’auu mai ai Laneselota. O le aoga e fa’apitoa mo fanau a tagata milionea i totonu o le malo. E le vaaia ai se isi lava lanu se’i vagana ai fanau a tagata papa’e. A o tapena Laneselota i lana lauga mo le fa’auuga, na fa’afuase’i ona oso a’e i lona manatu ia Ianeta ma lana tusi, atonu o se avanoa lelei lea mo ia e fa’alauiloa ai lana tusi i totonu o le aoga maualuga a tagata miliona. O lea na tago ai loa le ali’i i le telefoni ma vili loa le numera o le fale, ma ia fa’ailoa i ai i le fafine faiaoga o Lucy na ia tali ina mai le telefoni, o lo o i ai se mataupu taua lava o loo fia talanoa atu ai ia Ianeta, pe maua se avanoa latou te feiloa’i ai i le fale’aiga lea fo’i na latou mafuta fa’atasi ai muamua mo se mafutaga fa’aleaiga, lea fo’i na talia e le fafine o Lucy. E le gata na fa’ateia Ianeta i le valaaulia e toe feiloa’i atu ai ia Laneselota, ae o se avanoa lelei fo’i lea e atili fa’amausali ai le masaniga ma lenei ali’i milionea.

“O le vaiaso fou lea ua fa’amoemoe e avea ai a’u ma failauga faapitoa i le fa’auuga a se tasi o aoga maualuga i totonu o le aai o loo matou nonofo ai. Ma ua ou manatu ai, o se avanoa lelei lenei mo oe ta te fa’atasi atu ai i lea mafutaga ma fa’alauiloa atu ai lau tusi i fanau aoga faapea faiaoga ma matua, ina ia maua ai fo’i le avanoa latou te faitau ma malamalama ai i le mafua’aga na fa’aosofia ai oe e te tusiaina lenei tusi. Afai fo’i e maua ai ma se avanoa e te fa’alauiloaina ai le autu na mafua ai ona tusia lau tusi, o se avanoa lelei tele fo’i lea mo nai fanau fa’au’u.” Na talia fiafia e le ulugali’i o Meki ma Lucy le valaaulia a Ianeta, ma ua fa’amautu ai loa fo’i ma le taimi latou te feiloa’i ai i le sauniga o le fa’auuga. Na logo e le ali’i o Laneselota le tama’ita’i pule o le aoga e fa’atatau i lana fuafuaga ua faia, ina ia avea le aso lea e fa’alauiloa ai le tusi a Ianeta, e aoga mo fanau aoga ma soo se tasi, lea fo’i na talia fiafia e le puleaoga. E malama ane le taeao o le aso o le fa’auuga, ua mae’a ona fa’apipi’i e Laneselota se ie tele lava i luma o le hall ua faamoemoe e faia ai le sauniga, o lo o fa’apipii ai le ata o Ianeta ma le autu o lana ulua’i tusi ua mae’a ona tusia, ae o luga o le laulau o lo o i luma o le faitoto’a e ulufale atu ai, o lo o i ai kopi e 100 o le tusi a Ianeta, na aumai e le ali’i milionea mai le Faletusi ma le fa’amoemoe e fa’atau ina ia maua ai se tupe mo le tama’ita’i ma lona aiga.