Tele oloa aumai fa’anana ua maua i masini fou e su’e ai uta

Talu ona fa’aaoga masini fou a le malo e su’e ai uta ma oloa mai fafo (scanner), ua fa’amaonia le tele o oloa na aumai fa’anana i totonu o containers ua mafai ona maua e le aufaigaluega a le Ofisa o Tiute, e pei ona fa’amaonia e le Pule le Tumau a lea Ofisa i luma o le maota o sui i le vaiaso nei.

E ui i tulaga fa’aletonu na tula’i mai i le masini tele lea o lo o fa’aaoga i le uafu tele (M60 scanner), ae na taua e le susuga a Keith Gebauer le mae’a lea ona toe fa’aleleia vaega sa fa’aletonu, ma ua toe fo’i le lelei o le masini i le tulaga sa i ai muamua.

O le Faipule mai Manu’a, afioga Fetui Fetu Jr na ia fesiligia le Pule o le Ofisa o Tiute, i le tulaga o lo o i ai masini a le malo e su’e ai uta, po o tumau pea lona tulaga lelei e pei ona mafua ai na aumai, ae po o maua ai fo’i oloa ma uta o lo o aumai fa’anana i totonu o le atunu’u, aemaise lava i fualaau fa’asaina.

Saunoa Fetui e fa’apea, ua ia fa’alogo i fa’asea mai ni isi o le atunu’u i le to’atele o nei mau tagata faigaluega ua tumu tumu solo i le malae va’alele, ma ua tau tula’i mai ai feteenaiga i le va o tagata faigaluega a le malo, e mafua mai i le fa’alavelave lea o isi ofisa i le fa’atinoina o galuega a isi ofisa.

Na taua e Fetui e fa’apea, e tasi lava le mafua’aga na ala ai ona fa’aalu e le malo lenei vaega tupe tele e fa’atau mai ai masini, e le gata ia maua ai tupe faaopoopo a le malo, ae maua ai ma le tele o oloa o lo o aumai faanana i totonu o le atunuu e aofia ai ma fualaau fa’asaina.

Na taua atili e Gebauer e fa’apea, e le gata i le tele o oloa ua maua ae le i mafai ona faailoaina mai i le lisi o uta o lo o aumai i fafo, ae o ni isi fo’i o nei mataupu o lo o fa’agasolo ai pea suesuega fa’aauau a le Ofisa, ona o ni isi o tulaga ua maitauina mai ai.

E le i fa’ailoa e Gebauer poo mataupu o lo o fa’aauau i ai suesuega a le Ofisa, o lo o aofia ai ni fualaau fa’asaina na maua o aumai fa’anana i totonu o le atunu’u.

Na taua e le Fofoga Fetalai ia Savali Talavou Ale e faapea, o se isi tagata e tatau ona molimau i le tulaga manuia ua i ai le tautua a masini e su’e ai uta ma oloa mai fafo a le malo, o ia. E mafua lea tulaga, ona o lea sa ia molimauina tulaga fa’aletonu e pei ona a’afia ai le ta’avale na aumai i lona igoa, ina ua maua i ai “mea” ia na mau i le ta’avale.

Saunoa atili Savali e fa’apea, na aumai le ta’avale ma le le iloa o lo o i ai ni mea fa’apea i totonu, ae na avea masini ma mafua’aga na mafai ai ona maua.

O mea e pei ona taua e Savali, o fualaau fa’asaina ia sa maua i totonu o le ta’avale na aumai i lalo o lona igoa.

O lea ta’avale o lo o i ai pea lava i luma o le ofisa o leoleo i Fagatogo i le taimi nei. E fia fa’ailoa atu e le Samoa News e fa’apea, ua mae’a ona tofia e le Fa’amasinoga le ali’i loia tuto’atasi ia David Vargas na te su’esu’eina mataupu e fa’atatau i ni sui sinia o le malo e to’alua, e aofia ai mataupu i fualaau fa’asaina na maua i le ta’avale na aumai i lalo o le suafa o le afioga i le fofoga fetalai.

Ae i le fa’amaninoina atili e le Loia Sili o le mataupu e fa’atatau i le mafua’aga e ala ai ona to’atele leoleo i le malaeva’alele, na saunoa ai Talauega Eleasalo Ale e fa’apea, e mafua ona vaaia leoleo atoa ai ma isi sui o ofisa faamalosi tulafono a le malo i le malae va’alele, ona o ofisa uma nei o lo o aofia i le polokalame e pei ona fa’atula’i e le ali’i kovana, e galulue fa’atasi ai mo le sailia o auala e fa’aitiitia ai le fa’afitauli o fualaau fa’asaina i le atunu’u.

Saunoa atili le loia sili e fa’apea, e tasi lava le mafua’aga na ala ai ona finagalo le kovana e galulue fa’atasi ofisa eseese nei a le malo, “o le taumafai lea e saili se fofo o le fa’afitauli i fualaau fa’asaina, lea ua a’afia ai le to’atele o tupulaga a le atunu’u.”

“I lo’u la talitonuga, e le tatau ona tula’i mai ni lagona feeseesea’i i le va o ofisa fa’amalosi tulafono nei a le malo, ae tatau ona maua e i latou le fealofani ma le galulue fa’atasi.”

O le mataupu e pei ona fesiligia e le Sui Fofoga Fetalai, na fesiligia fo’i e le afioga i le ali’i senatoa ia Magalei Logovi’i molimau a le malo i se iloiloga sa faia i luma o le senate i le vaiaso na te’a nei, i le mafuaaga e ala ai ona i ai Leoleo i le malae va’alele.

Na taua e le komesina o Leoleo i se talanoaga ma le Samoa News i le vaiaso na te’a nei e fa’apea, e le o taumafai Leoleo e fa’alavelave i galuega a le Ofisa o Tiute poo isi fo’i vaega o lo o galulue i le malae va’alele, ae o lo o taumafai lava i se auala e mautinoa ai e le o i ai ni gaioiga fa’asolitulafono o lo o tutupu i le atunu’u.

Saunoa le tofa Le’i S. Thompson e fa’apea, e leai se mafua’aga e taofia ai leoleo mai lo latou auai i soo se gaioiga e faia i le atunu’u e masalomia le alia’e mai ai o ni gaioiga fa’asolitulafono.

I lona talitonuga, o le tiute a le Leoleo o le fa’amalosia lea o le tulafono na fa’atauto o ia e puipui. Ae sili ai i lo lena, ia silafia e le atunu’u atoa, o lo o galulue fa’atasi uma ofisa fa’amalosi tulafono a le malo, i le fa’atinoina o gaioiga e mautinoa ai o lo o puipuia le tulafono.