E LE O OE O SE SULI MONI

E umi se taimi na i ai le aiga i le fale’aiga, fa’atasi ai ma le ali’i fomai ia Lavi, aemaise ai le ali’i milionea o Laneselota, ona o le taumafai lava e fa’aalu se taimi umi latou te mafuta ma fa’amasani ai. E tele ni fesili na fesili ai le ali’i o Laneselota ia Ianeta, i le mafua’aga ua ala ai ona ia naunau e avea o ia ma tagata tusitala, aemaise ai le mafai ona ia tu’u fa’atasia lana ulua’i tusi lea ua to’atele tupulaga aoga ma tagata atamamai o le malo e faitau i ai, ae na fa’ailoa e le tama’ita’i e fa’apea, o le olaga pologa ma lu’itau na fetaua’i ma ia ao laititi lava, na mafua ai ona lu’i lona loto ina ia finau e saili se isi mea lelei na te faia i le lumana’i. Na maofa le ali’i o Laneselota i le atamai atoa ai ma le sogasoga o Ianeta, ma le auala na mafua ai ona faufau mai le tu’u fa’atasiga o lana tusi, seia oo lava i le taimi na tu’ufa’atasia ai ma fa’alauiloaina ai loa i le taimi o le fa’auuga. “O lo’u Tina, o se faiaoga i se tasi o Iunivesite i totonu o le malo, na te a’oa’oina mataupu e faatatau i le tala fa’asolopito, atonu e aoga lenei tusi mo ia e fesoasoani ai i mataupu o lo o ia a’oa’oina i lana vaega,” o le fa’amatalaga lea a le ali’i milionea i le taimi na ia fa’atauina ai le tusi e tasi a Ianeta, i se tau na matua maofo ai le tama’ita’i. “O le teutusi lea, o lo o i ai le tau o la’u tusi e tasi lea ua fa’atau, ae afai e i ai se isi tusi e toe mana’omia, o le a ou toe oo mai lava e asi mai oe i lou aiga,” O le fa’amatalaga mulimuli lea a le ali’i o Laneselota, ma ia fa’amavae atu ai loa ia Ianeta ma ona matua, fa’apea ai le ali’i foma’i ia Lavi, ma latou aga’i ese atu loa ma ana auauna i se ta’avale tele lava.

Na fo’i fiafia le aiga i lo latou fale ma le talitonuga o le ulugali’i, ua vavala mai tulaga manuia o le lumana’i o Ianeta, e le gata ua fa’au’u o ia mai le aoga na aoga ai ma lana fa’ailoga, a o lea ua atili lauiloa o ia e le to’atele o le atunu’u ma ta’ita’i o le malo, ona o lana tusi sa tusia, lea ua tufatufa atu i Faletusi eseese a le malo, ma ua oo lava fo’i i totonu o Aoga eseese e aofia ia ma Iunivesite, ua tufatufa atu i ai kopi o le tusi e fa’aaoga e fanau aoga. Ae o le malaga toe fo’i atu a le ali’i milionea o Laneselota, na molimauina ai e ona matua se suiga i le la tama, ina ua vaaia le tulaga ese o lona fiafia ina ua toe fo’i atu i le aiga. “Ua tulaga ese la’u vaai i le suiga ua i ai lou fiafia talu mai lau malaga i le la itu o le aai, e foliga mai sa e fetaui i se isi tagata e te lei masani muamua ai lava,” o le fesili fia malamalama lea a le Tina, ae na luelue le ulu o Laneselota ma tali fiafia atu e fa’apea, “E le gata sa ou feiloa’i atu i se tama’ita’i ou te le masani ai, ae o se tama’ita’i fo’i e tutusa lelei vaega o le olaga ma te fiafia i ai, ona o ia o se tusitala o se tasi o tusi fou na fa’alauiloa i le fa’auuga a le Iuniesite a le malo, ma ou te talitonu o le a aoga lana tusi mo tupulaga talavou aemaise lava i fanau aoga,” e fai lava tala a le ali’i o Laneselota ma tago ua tu’u atu le kopi e tasi o le tusi a Ianeta na ia fa’atauina mai, ma tu’u atu i le luma o lona Tina.

Ae o le fafine i le taimi lea, ua na o le ata ma aapa atu lona lima ua aumai le tusi ona ia matamata lea i le fa’ava’a o le tusi o lo o pu’e ai le ata o le tama’ita’i na tusia le tusi, ma nai upu tomua e fa’atatau ia te ia. Na umi se taimi o fa’atau pupula le vaai a le fafine i le fa’ava’a o le tusi, ona o lea ua manino i lana vaai, o se tama’ita’i meauli na tusia le tusi, a e foliga mai ua fiafia i ai le loto o lana tama, o se ali’i pa’epa’e talavou aulelei. Na vaaia e le ali’i o Laneselota suiga i foliga o lona Tina, ona ia tu lea ma fesili i ai, “O i ai se fa’aletonu i le tusi a Tina,” ae na tali le fafine, “Leai Laneselota si a’u tama, ua matagofie la’u faitau atu i upu tomua o le tusi, aemaise ai le tala’aga puupuu e fa’atatau i le olaga o le tama’ita’i na ia tusia le tusi, ma, e foliga mai o ia o se tama’ita’i e atamai ma loloto ona mafaufauga.