Tala I Vaifanua

TOLAUAPI ‘LE TAUSAGI’ FALETA’ALO I PAGO PAGO

O le taeao o le Aso 24 o Aukuso, na fa'afiafiaina le silia ma le 90 fanau talavou, mai le 6 tausaga i le 15 tausaga, ina ua amatalia le moetasi o le tolauapi a le "Le Tausagi" ua leva ona tu'upoina mai e fa'amae'a ai fuafuaga mo le fanau i lenei tu'uaga umi o a'oga.

O le tolauapi lea o lo'o fa'atautaia nei i le lotoa a le Matagaluega o Tupulaga Talavou ma Tama'ita'i (DYWA) i Pago Pago.

O le 'auga o lenei fa'atasiga, o le timaia ai le fanau ua mae'a lesitalaina i le tele o a'oa'oga tau le si'omaga, a'afiaga o le suiga o le Tau, Si'isi'i o le suavai i le lalolagi, le Sami le puna'oa o le gataifale, le Vaomatua le puna'oa i le Fogaeleele, le Ea mama ia manavaina e la'au, manu ma tagata.

Ua fa'aigoaina le Tolauapi lenei : "Auiliiliga o le Si'omata - Tolauapi o le Taumafanafana 2017." Ua le na'o Le Tausagi o lo'o latou fa'atautaia lenei tolauapi, peita'i, ua aofia ai ma latou pa'aga: DOC Coastal Management Prog; NMSAS; ASCC - CNR; ASCC - Forestry & Sea Grant Prog; ASEPA; DMWR; NOAA-PIRO; USDA- NRCS; AS Soil & Conservation District; ASDOE; NPSAS; DYWA ma le Coral Reef Advisory Council.

O i latou uma fo'i nei, ua tofu sao i lenei tolauapi. O le a faia fo'i latou vasega e a'oa'oina ai le fanau. Ua mae'a fa'atulaga vasega eseese ae auga mea uma i le fa'amoemoe, e fa'ailo ai a'afiaga o le Siomaga, atoa ai ma mea lelei fo'i e aoga i le si'omaga ina ia fa'afiafiaina le talavou e faia na mea lelei.

Mo le fanau uma ua aofia, ua mae'a fa'ailoa ia i latou e sau lava le tagata ma aumai lana ipu e 'ai ai, sipuni ma le tui ae maise o ana mea ta'ele. Aofia i mea e tapena mai, ia lava ona ofu aua e faia isi vasega i le sami, ma ua mae'a sainia fo'i e matua le fa'atagaga tusitusia, ina ia mautinoa ua iloa e matua e auai lona alo i nei ituaiga a'oa'oga e faia i le sami.

E tolu vaega o tamaiti o lo'o vaevaeina ai le fanau. Fanauiti mai le 6-9 tausaga, ma le 10-12, ae o le matutua o le 13-15 tausaga. O aso ta'itasi o le a fa'asolo ai nei vasega i ituaiga a'oa'oga eseese ua mae'a fa'atulaga ma o le a fa'apena fo'i ona fa'asolo a latou 'aiga e tolu ua mae'a fa'atulaga, mo le taeao, aoauli ma le afiafi.

I le ulua'i aso lava ua sofa'i ai lava le fili numera tasi o le siomaga, le vaega o Lapisi po'o mea e tia'i i le sami ma nofoaga vaomaoa o le laueleele. Afai e tia'i i le laueleele nei lapisi ua mafai lava ona tafea aga'i atu i le sami, ma ua fa'aigoaina loa o le Lapisi o le Gataifale.

O a'afiaga o le gataifale ona o nei ituaiga o lapisi ua lafoa'i atu i ai. E to'atolu faia'oga ua latou nafa ma le fa'amatalaina o lea a'afiaga i le fanau. Ona soso'o lea ma tautalaga fa'apitoa a le vaega o le ASEPA , ASPA  DMWR ma le vaega o lo'o va'aia le NRCS po'o le vaega o lo'o nafa ma le fa'asao o le suavai i le atunu'u.

O nisi o nei mataupu e talanoaina, e aofia ai le fa'asao mo le Laumei o lo'o nafa ma le DMWR, Fa'amama o le Lapisi e nafa ma le ASPA ma le fa'avasegaina o lapisi lafoa'i i le sami.

Ua fa'atulaga fo'i le maimoaina o se ata tifaga a'o le'i momoe i latou i le po. O le aso lona lua o le tolauapi lenei ua fa'atulaga ai le sailiga o vaifofo o fa'afitauli sa talanoaina i le ulua'i aso. O se mea ua sili ona matagofie aua o le a vave fo'i ona tapuia le mafaufau o le tamaititi a'o talavou ina mua'i iloa le mea e ao ina fai, pe a latou va'aia nei fa'alapisi o lafoa'i i le gataifale.

O le aso lea ua fa'atulaga ai le asiasiga a le fanau i nofoaga o le Paka Fa'asao i Vatia, atoa ai ma le asiasiga i le Kamupani a GHC Reid lea e faia ai le atigi apa alumini ma le palasitika ina ia toe fa'aliliu ma toe fa'aaoga.

Ua fuafua fo'i e o'o le isi a latou asiasiga i le Nofoaga i Utulei o le Tauese PF Sunia NMS Center mo sa latou asiasiga ma se lesona aoga mai le Fa'asao o le Gataifale. O le fa'amalositino ia fa'atulaga i lea aso o le Auau lea i le Sami i Utulei Beach, soso'o loa ma le 'aiga i le afiafi, ma malolo ai i se ata tifaga pe a mae'a le lotu afiafi.

Toe aso o le mafutaga ua fa'atulaga ai le Fa'amama ma Fa'amatagofie i autafa o le Malae o Gagamoe i Pago Pago, ona saunia loa lea e fa'aalia galuega fa'atino sa tu'ufa'atasia e vasega nei e tolu.

E i ai le taimi atofa mo le tufatufaina atu o latou fa'ailoga ma tusi pasi ae mua'i faia le Ava fa'asamoa ma mae'a ai le latou tolauapi i le aoauli o le aso Faraile.

MAEA TINEIA LE AFI I MODOC, KALEFONIA

O se tala fiafia mai Modoc, Kalefonia, ua mae'a tineia lea afi tele, ma ua ave'esea mai uma le aufaigaluega sa i ai, e aofia ai ma nisi o tama fanau a Amerika Samoa na mua'i tu'ua le le atunu’u ia Aukuso 4.

I le taimi nei, talu mai Aukuso 19 & 20, ua fa'atasi i latou uma i le mu lea o lo'o sasao i Redding ma o lo'o o atu sa'o fo'i i ai le to'alima lea na mulimuli atu i lena mu, i Kalefonia lava. O le lua aso na malolo ai i latou, sa fa'atulaga lava ina ua mae'a le galuega tele sa faia i Modoc ma ua fa'aigoaina ia aso o le R&R [Rest & Relaxation].

O lea o le a fa'ao'o uma i latou e galulue i le afi ua sasao nei i Six River Forest Orleans Complex e latalata i Eureka, Kalefonia lava.

I le taimi nei ua atoa le 19 o Mu o lo'o ua sasao nei i vaega eseese i le vaomatua o Kalefonia.

O suafa o alo 18 o le atunu’u mo lenei galuega alofa e aofia ai: Anthony Wyberski, Elama Faatonu, Sanelivi Iopu, Panini Seafa, Ronald Ameperosa, Porotesano Tuiolosega, Josh Puni, Faamasino Livi Jr., Tau Thompson, Ikenasio Sagaga, Ethan Mauga, Pouono Lomiga, Mathew Fetu, o i latou na malaga muamua, ae o le vaega e to'alima na soso'o atu nei ia Aukuso 17, na aofia ai: Pentateuch Vaki, Foima To, Maomao Niko, Ramsey Malae ma Lafaele Suafoa.