E LE O OE O SE SULI MONI

Vaega 81

Na fa’ateia le ulugali’i ina ua la vaaia se suiga i foliga o le teine tausima’i, ao ia uuina se tusi i lona lima, o le mafua’aga lea na fesili atu ai le fafine o Lucy i lona fia iloa, “E i ai se mea ua tupu”, na ata le teine tausima’i ma fa’apea mai, “E leai, o lea ou te te’i ina ua ou tago atu e tatala le pusa e aumai i fafo le paina toto o le a tui e fa’apipii ae tau lo’u lima i le tusi lea, o loo fa’atuatusi mai ia Ianeta”. E fai lava tala a le teine tausima’i ma ia tago ua tu’u atu le tusi i le fafine o Lucy, ae o le taimi lea o loo taoto pea lava le tama’ita’i meauli o Ianeta ma tilotilo i ai. Ina ua tuu atu e le teine tausima’i le tusi i le fafine o Lucy, na toe tago ai loa le fafine ma tu’u atu le tusi i le luma o si ana tama o Ianeta ma fai atu i ai, “Vaai oe si a’u tama, e le tatau ona ou tatalaina le tusi lea, ona o loo fa’atuatusi mai ia te oe, ae sili pe a e tago e tatala poo ai na aumai ai lena tusi”. O le naunau tele o le teineititi i lona fia iloaina o le tagata na aumai ai le tusi, na mafua ai ona nofo vave i luga ma tago atu lona lima ua aumai le teutusi ma tatala, ae lau le tusi o loo i totonu. “Mo Ianeta, e silia i le 3 vaiaso ou taumafai pea le falema’i e faia gaioiga uma e maua mai ai ni paina toto mo oe, ua to’atele fo’i tagata ua ofo mai la latou fesoasoani ae sa le mafai ai lava ona maua se tali, peita’i ina ua ou manatu e tatau fo’i ona ou fesoasoani, sa faia ai loa se siaki fa’apitoa mo a’u ma fa’amaonia ai, e tutusa lelei ituaiga toto o loo ia tei taua, ma ou manatu ai loa ou te ofoina atu paina toto ia e 3 e fai ma o’u sao i taumafaiga ina ia malosi lou gasegase. Tofa o Dr. Lavi”. Na vaaia e le ulugali’i le maligi o loimata o Ianeta ina ua mae’a ona ia lauina le tusi, ma ia fai atu loa i le teine tausima’i ina ia fa’apipi’i atu loa le paina toto fou mo ia o lea ua uma le paina toto tuai sa tui. Na fo’i gugu le teine tausima’i i fafo ma le potu e aunoa ma se tala na gagana ai, e faapena fo’i i le ulugali’i, sa na o le nonofo fifilemu i tafatafa o le moega o Ianeta e aunoa ma se isi na toe gagana, se’i vagana ai laneta o loo tagi masusu ai lava i luga o lona moega.

“Ianeta, e i ai se isi mea e te mana’omia, ua ou vaaia lou fa’anoanoa tele i lenei afiafi, ae tatau ona e fiafia o lena ua maua le paina toto e fesoasoani i lou gasegase”, o le fa’amalosi ‘au atu lea a le tamaloa o Meki isi ona afafine, ae na tali laneta, “Ua lagona lo’u alofa i le ali’i foma’i, i lona tigaina sa i ai i le tau sailiina o se isi e maua mai ai se fesoasoani mo a’u, e le maua sana malologa i soo se taimi ou te taunu’u mai ai i le falema’i, ao lenei ua ia toe ofoina mai lenei meaalofa pito sili ona taua mo a’u, ma ou te mana’o fo’i ou te faia se meaalofa sili mo ia pe a ou te’a atu i tua mai le falema’i”. O le taeao na sosoo ai ina ua usu atu le ali’i foma’i o Lavi i lana galuega, sa ia maua ai se tusi i luga o lana laulau, o se tusi mai le tamaloa o Meki, e fa’afetaia ai paina toto e 3 sa ia ofoina atu mo si ona afafine, lea ua mafua ai ona maua lona malosi. Ua alu pea aso o le olaga ma ua aga’i atu fo’i le aoga a Ianeta ina mae’a, ae o loo tu’u fesili pea lona loto pe aisea ua tutusa ai le ituaiga toto o loo ia te ia ma le ali’i foma’i. Ona o lona naunau pea e saili se auala e fa’atino ai sana meaalofa mo le ali’i foma’i, na i’u ai lava ina faia sana suesuega i tupuaga o tagata uli sa aumai ma faapologaina i totonu o le malo, ma o lea suesuega na faamaonia atu ai ia te ia, o le fafine meauli lea sa ia fanauina o ia, o le fafine meauli lava fo’i lea sa ia fanauina le ali’i foma’i ia Lavi, lona uiga i se isi fa’aupuga, o ia o le tuafafine laititi o le ali’i foma’i o Lavi, ae na aveesea i laua mai le aiga milionea na avea ai lo la Tina ma pologa ona o le musu o le ulugali’i milionea e fa’aalu ni la tupe e tausi ai i laua ao laiti, o lea na tonu ai loa i le manatu o Ianeta, o lana meaalofa sili lava lea o le a ofoina atu mo le ali’i foma’i o Lavi, o le fa’ailoa lea i ai o le fa’aiuga o le suesuega ua ia mauaina.