Fa’amuta aloaia fa’atauga mo oloa a le malo i le vaiaso nei

O le Faraile taeao, Aokuso 18 lea ua fa’atulaga e le Faatonusili o le Ofisa o le Paketi a le malo, e fa’amuta aloaia ai le toe faia o ni isi fa’atauga a matagaluega ma ofisa mo le tausaga tupe lenei, ona o lea ua galulue le malo e fa’amae’a galuega mo le tapunia o tusi i ana galuega fa’atino mo le tausaga tupe lenei, a o le i mae’a aloaia i le aso 31 Setema.

E le gata ua mae’a ona sainia e le Fa’atonusili o le Ofisa o Paketi ia Catherine Saelua se tusi ma tufatufa atu i Fa’atonusili o matagaluega ma ofisa eseese a le malo, ae sa ia toe fa’amanatu fo’i i le taimi o le fonotaga a le kapeneta i le vaiaso na te’a nei le taua o lenei mataupu.

Na taua e Saelua e fa’apea, ina ia tulaga lelei ma maopoopo fa’amaumauga a Ofisa eseese uma a le malo i le tulaga o lana paketi, e tatau ai ona latou galulue fa’atasi ma Fa’atonusili ina ia mautinoa o loo atoatoa faamaumauga e mana’omia.

“Ona o tulaga e pei ona taua, o le aso Faraile, Aokuso 18 ua fa’amalosia e fa’amuta aloaia ai le toe faia o fa’atauga a matagaluega uma lava a le malo”, o se vaega lea o le tusi a Saelua.

“O fa’atauga uma lava e mana’omia, e tatau ona ui atu i le Ofisa o le Paketi faapea ai ma le Ofisa o Tupe mo le fa’amaoniaina, a o le i fa’atauina mai oloa mo le fa’aaogaina. O fa’atauga uma e faia i tua atu o le aso 18 Aokuso, o le a aofia i galuega fa’amaumau o le tausaga tupe fou 2018”.

E le o aofia ai tulaga o isi manaoga faapitoa atoa ai ma galuega mana’omia mo le totogi a le malo i le taimi ma le aso e pei ona faatapula’aina mai e le Ofisa o le Paketi.

Ua talosagaina fo’i le tatau lea ona faila fa’amaumauga mo fa’atau uma e faia i le Ofisa o Tupe i le vaega o tupe fa’aalu, ina ia mautinoa e aofia uma fa’atauga nei i galuega fa’amaumau mo le tausaga tupe lenei 2017.

Na fa’alauiloa fo’i e Saelua le tatau lea ona tauaao atu i le Fono Faitulafono le Paketi a le malo mo le tausaga tupe fou 2018, i le aso Faraile nei a o lumana’i ai le toe amataina o galuega a le Fono i le vaiaso fou.

“O le taua o lea tulaga ina ia lava ai le taimi o le Fono e iloilo ma faitau ai i le Paketi a le malo, a o lumana’i ai le fa’atulagaina o iloiloga e fesiligia ai ta’ita’i o Ofisa ta’itasi e tusa ai o a latou paketi”, o se vaega lea o le saunoaga a Saelua.

Na lagolagoina e le afioga i le ali’i kovana ia Lolo Matalasi Moliga le tatau lea ona sauni Faatonusili uma mo iloiloga o le paketi i luma o le Fono.

Na faamanatu e le Kovana i le Kapeneta le faaiuga ua faia e Ta’ita’i o le Fono Faitulafono, e le toe talia ai se sui faatonusili poo se isi lava sui e oo atu i taimi o iloiloga o le paketi, se’i vagana ai lava le Fa’atonusili.

“O faaupuga a Ta’ita’i o le Fono, latou te le toe mana’omia se sui momo’e se’i vagana ai lava le Fa’atonusili, o le fautuaga la mo le tatou Kapeneta, ia mautinoa e te i ai i le aso o lau iloiloga, aua fo’i ne’i avea i le Fono ni isi fa’amatalaga e tele mai ai faitioga ia tatou, a ia onosa’i i fesili ma fa’amatalaga e fai atu, ae sauni lelei mo a outou iloiloga”, o le fautuaga lea a Lolo i le Kapeneta.

Saunoa atili le ali’i kovana e fa’apea, e mafua ona mana’omia mai e le Fono ia Fa’atonusili, pau lea o le tagata e malamalama i tulaga o galuega o lo o faagasolo i totonu o le Ofisa, e malamalama fo’i i tulaga uma o tupe ma atina’e o lo o fuafua le matagaluega e fa’atino mo le atunu’u.