Tala I Vaifanua

TULAGA O PEMITA ULUFALE AI TURISI I AMERIKA SAMOA

O Aukuso 2 na fono ai le Loia Sili Talauega Eliasalo Ale ma sui o pisinisi e  tautuaina tagata femalaga'i i le va o Amerika Samoa isi atunu'u. Na auai fa'atasi ai ma sui o kamupani tusi pasese mo tagata femalaga'i, ina ia mua'i fa'ailo se ala fou o le a fa'aaogaina, tau le taua'aoina o pemita e ulufale mai ai tagata i Amerika Samoa.

O lenei faiga fou, o le a fesoasoani tele i le fa'ateleina o tagata e fia ulufale mai e maimoa ma tafafao i le tatou atunuu. E ese mai lea, o le a toe tautalagia ai le taua tele ona malamalama lelei o sui faipisinisi e tautuaina tagata ulufale mai i Amerika Samoa i ituaiga omiga e a'afia ai le malo.

Sa fa'amalamalama e Talauega le taua o le faiva ua toina atu ia i latou e faia, atoa ai ma le mafuaga ua manatu ai le Malo e fa'atulaga aiaiga o le taua'ao atu pemita e ulufale mai ai tagata i Amerika Samoa.

Sa fa'amalamalama auiliili fo'i tulafono tau femalaga'iga i le va o Amerika Samoa ma isi atunuu, o le ala e fa'atino ai le tautua ma le fa'amalosiga o tulafono nei atoa ai ma le fa'ailo o le mafuaga e ulufale mai ai se sui. Ina ua fa'afofogaina e sui na auai nei mea uma, sa avea ma se mataupu na fa'aali taofi i ai le to'atele ina ia tamau ua malamalama i latou i lea faiva, ma ona a'afiaga i le sui o ulufale asiasi mai.

O manatu na fa'aalia e sui auai, ua avea ma mau aoga mo le Loia Sili ina ia toe taga'i toto'a i ala e tatau lava ona tapena i ai lana matagaluega ina ia le avea nei pemita ma ala e taofiofia ai le ulufale mai o tagata e tafafao, ae ia avea ma una'iga malosi o le fia ulufale mai o tagata.

Ua galulue nei le Loia Sili ma le Ofisa o Femalaga'iga i le fa'atulagana o pemita e talosagaina mai i luga o laina o feso'ota'iga tau Initeneti. O lea auala ua fa'afaigofie ai ona talosagaina mai pemita e ulufale mai ai i Amerika Samoa.

O lo'o fuafua e tatau ona amatalia lea tautua fou mo pemita i le fa'aiuga o lenei tausaga. Peita'i, a'o tau aga'i atu lava ina mae'a le gaoioiga taua, ua fa'ailoa mai e faia lava fonotaga ma le Ofisa o Turisi ma tagata faigaleuga i Kamupani Totogi Pasese o tagata femalaga'i ae maise o kamupani va'alele i le atunu’u, ina ia maua lava le tulaga feutaga'i i mea e lelei atili ai le taumafaiga fou.

KAMUPANI FA’AMAMA, FA’AAOGA SUA O LE MOLI

Ua i ai nei le isi ituaiga o vaila'au kiligi fale, meafale ma so'o se ituaiga o mea e fia fa'amama ua maua i le atunu’u, ua fa'aigoaina o le "Citrus Clean" po'o le "Sua Moli Fa'amama".

O lea ituaiga ua gaosia mai Hawaii ma ua faapea fo'i ona matagofie ma felesi le manogi mama e maua ai, pe a o'o ina fa'aaogaina i mea uma i totonu o lou maota po'o fale nofo.

Ua fa'atulaga mai lona fa'aaogaina, aua ua auina mai lea fa'amama "Sua Moli" i fagu tetele ta'i kalone ae ao ina suia ona fa'ato'a fa'aaogaina lea. Ua i ai fo'i le tusi taulima ina ia matua fa'autagiaina e le mamalu lautele lona suiga ma lona fa'aaogaina.

Ua aoga mo le fufuluina o ogaumu ma so'o se mea i totonu o lou umukuka papalagi, po'o ulo ma fata ipu totonu o kapoti e teu ai ipu atoa fo'i ma mea fai BBQ, peita'i, ua eseese lona suiga.

E fa'aaoga mo le fufuluina o fa'amalama, ave'esea le ga'o mai le tele o mea e to'a ai, fata ma ogaumu kuka mea'ai, ula ma mea e fa'aaoga mo le gaosia o mea taumafa. E fufulu ai fo'i asoa auro moni, siliva ma so'o se ituaiga kapoti ma mea ta'alo a le fanau iti, nofoa o ta'avale, ma le ta'avale atoa ma faleta'ele uma lava.

E ao ina fa'autagia le suiga ua fa'atulaga mo le fufuluina o mea taitasi, aua ua mae'a lomia le pepa fa'ailo taulima lea, i le gagana Peretania ma le gagana Samoa.

O lenei oloa fa'amama taua tele, ua mae'a pasia lelei e le USDA mo le fa'aaogaina i totonu o maota ma nofoaga e fa'aaogaina e tagata lautele o le Iunaite Setete ma ona Teritori.

Ua mae'a fo'i ona fa'alauiloa, o se vai fa'amama e matua manogi lelei e maua ai e tagata uma le malosi ae le niniva ai se tasi. O le suamoli e aumaia ai le lagona fiafia i so'o se tasi ma fa'aosofia ai le fia taumafa.

O nisi na o fa'amatalaga ua fa'amamafaina i fa'asalalauga fa'alaua'itele i totonu o Hawaii ma si setete atoa ai ma i tatou i Amerika Samoa, aua o lea ua mafuli ofisa Autu o le Malo i Utulei, e fa'aaoga lea ituaiga o fa'amama i latou ofisa ma faleta'ele uma.

O le tulaga o feso'ota'i lelei lea ituaiga o suamoli fa'amama ma le siomaga fa'anatura o so'o se atunu'u, o le isi lea mafuaga ua fuli ai le tele o faletupe ma ofisa tumaoti e fa'aaoga lea ituaiga o fa'amama mo latou Ofisa autu i le tatou malo nei.

"Ua ta'uta'ua lava lenei fa'amama i Hawaii, aua o le latou oloa gaosi, ma ua fa'apena fo'i ona tele lona auina atu i fafo i ala fefa'ataua'iga i luga o le initeneti ma faleoloa fo'i,” o se tala lea a le ali'i ua avea lea fa'amama ma auga o lana tautua lautele i le atunu'u, Lee O'Brien.

Pe afai e mo'omia ona faia se folasaga ina ia fa'aaogaina ai lea Suamoli Fa'amama lea mai Hawaii, feso'ota'iga O'Brien i le numera telefoni : 684-256-5611 poo le 256-9173. Mo oka mai luga o feso'ota'iga tau Imeli tuatusi: [email protected].

TAUVA ‘AU FOOTBALL ST. JOSEPH I LAKAPI FA’A-AMERIKA

Ua fa'ailoa mai, sa malaga se 'au ta'a'alo Football a Tafuna High mai Amerika Samoa mo se ta'aloga faitaulia ma le 'au Football a St Joseph’s College, i Samoa, ma ua si'itia fo'i le atamai o fanau i Samoa e tauva i lakapi fa'a-Amerika po'o le Football.

I le ta'aloga muamua na fetaui ai ma Tafuna ia Iulai 3, ua faia le fa'aiuga o le a asiasi mai lea au a St Joseph i le teritori mo se latou ta'aloga iinei ma isi a'oga maualuluga.

"Ua ou manao ia fa'aaoga le taleni lea ua maua nei e le fanau o lo'o ta'a'alo i le matou 'au football, ma ia saga fa'aleleia atili,” o se tala lea a le ali'i faia'oga Football a St Joseph, Agatupu Lefao.

E ui la ina sa faia'ina i latou i le ta'aloga faitaulia lea, ae ua fa'ailoa mai e Lefao, "Na ou fiafia tele i le faia'ina o la'u 'au, aua o lo'o i ai le avanoa tele lava e fa'aleleia atili ai le latou tomai! O le tele fo'i o latou ta'aloga e fetaui ai ma isi 'au, o le fa'aleleia fo'i lea o le latou ta'a'alo i le lumana'i o lea ta'aloga i Samoa.” O lona manatu fa'aalia lea e ala i le ala o feso'ota'iga i le facebook.

"O le mea sili, ua maua matou sikoa, toe lelei fo'i ua mafai e matou tama ta'a'alo ona fa'asalavei le polo, o se mea ese lea i le lagona o le fanau ta'a'alo, e gafatia e i matou ona fa'aleleia a matou puipuiga ma le osofa'i o le ta'aloga lea. Ua naunau fo'i le fanau e ta'a'alo fa'atauva  e atia'e ai le latou tomai e ta'a'alo,” o se tala fiafia lea a Lefao.

O le sikoa o le ta'aloga e 26-40 lea na malo ai Tafuna High.

Ona o le tulaga e le o maua nisi faia'oga o lea ta'aloga i Samoa, o lea ua le mafai ona vave faia ai se ta'amilosaga i Samoa lava ia, ae ua iloga ai, e tatau ona o mai i Tutuila e faia ai nisi latou ta'aloga faitaulia.