To’atele ua popole mau lafoga ua fuafua malo faae’e i oloa

Ua fa’aalia e le to’atele o le atunu’u o latou lagona popole, tete’e ma le le fiafia ua i ai, i le tulaga pagatia o le a i ai le tau o le soifua mo aiga lima vaivai, pe afai ae pasia e le Fono Faitulafono pili o lafoga ia ua fa’aulu e le faigamalo a Lolo ma Lemanu mo le fa’amoemoe e maua ai ni alagatupe fa’aopoopo mo le malo i le lumana’i.

O lagona popole ma le atuatuvale ina ne’i avea lafoga o le a fa’ae’e i soo se oloa ma itu e sili atu ai ona taugata le tau o le soifuaga o lo o i ai, ma itu ua sulu atu ai ni isi o le atunu’u i a latou Faipule mo se fesoasoani, ina ia faia sa latou fa’aiuga poto ma le atamai i tulaga o pili o lafoga ia ua tu’uina atu e le malo i le Fono Faitulafono mo le pasiaina.

O le to’atele o i latou na mafai ona valaau mai i le Samoa News ma maua fo’i le avanoa e fesiligia ai e uiga i lenei mataupu, e le gata i tagata palota i totonu o itumalo eseese, ae o o lava fo’i i tagata mai fafo e le palota ae o lo o lafo lo latou sao i le atina’eina o le tamaoaiga o le malo e ala i lafoga o lo o totogi.

Na taua e se Tina faiaoga talavou i le Samoa News le tulaga pagatia o le a oo i ai tagata lautele, pe afai ae pasia e le Fono lafoga o oloa e 7%d (sales tax) lea ua fuafua le malo e fa’aee, aemaise ai isi lafoga ua fuafua e fa’ae’e i vaiinu suamalie ma le ‘ava malosi, ona e i ai le talitonuga e amo uma lava e tagata fa’atau le mama o le avega.

“E le o lagona e le to’atele o tagata e malosi le tamaoaiga i totonu o latou aiga tulaga pagatia o le a oo i ai aiga lima vaivai, pe afai ae pasia e le fono le mau tulafono o lafoga. Poo a uma fo’i tupe e totogi e le aufai pisinisi Asia mo lafoga i luga o le uafu ma soo se itu o lo o aumai ai a latou oloa, o le a latou toe mauaina uma nei tupe a ala i le si’i maualuga o le tau o oloa i le atunu’u”, o le saunoaga lea a le Tina faiaoga ia Fa’atasiga Faiga o Aua.

 Ae na taua e se tasi o ali’i faipisinisi Asia e fa’apea, e ui o lo o i ai le avanoa e mafai ai ona si’i le tau o ana oloa pe afai ae maualuga le lafoga na te totogiina i lafoga a le malo, peita’i o lo o i ai fo’i lona popolega ina ne’i avea le taugata o ana oloa ma itu e to’atele ai ana tagata sa masani ona fa’atau i lona ofisa o le a o ese ma saili ni isi faleoloa e sili atu ona taugofie, e aofia ai faleoloa sii atoa i Tafuna.

“E le na o tagata fa’atau o le a pagatia i lafoga a le malo, ae o o lava foi ia i matou o tagata faipisinisi o le a a’afia fo’i i le suiga o le lafoga e 1% mo le aufaipisinisi, lona uiga o tagata uma lava e aafia i le lafoga ae le na o tagata fa’atau”, o le talitonuga lea a se ali’i faipisinisi Asia e uiga i lafoga.

Na taua e se tasi o Tamali’i o le atunu’u, susuga Pulu Ae Ae Jr lona tu’uaia o le faigamalo i le le fa’amaoni e ao lafoga o oloa i luga o le uafu ma soo se itu o loo ui mai ai oloa mai fafo, atoa ai fo’i ma lafoga a pisinisi ina ia mafai ai ona fesoasoani i tupe maua a le malo.

O le saunoaga a le susuga i le Matua ia Pulu, na lagolagoina lea e ni isi o tagata matutua o le atunu’u e le i finagalo e fa’ailoa o latou suafa, ae sa latou manatu e fa’aleo o latou finagalo e tusa ai o le tulaga pagatia o le a oo i ai le malo i le lumana’i, e mafua mai i le mau lafoga lea ua fuafua le malo e fa’ae’e.

“Tatou te fiu lava e tau ao mai tupe ma fa’aputu e fa’aleleia ai le malo ae fa’aauau pea ona tula’i mai le tulaga fa’aletonu i le itu tau tupe, ona o lo o tele naua auala o lo o fa’aaoga le tatau ai e vaega o le malo tupe o lafoga a tagata, fa’apea ai tupe lotoifale o lo o ao mai i gaioiga eseese a le malo, ma atili ai lava ona pagatia le malo ma tele ai ma atina’e lelei mo le atunuu’ e le fausiaina”, o le saunoaga lea a se tasi o Tamali’i o le atunu’u.

Ae ina ua fesiligia e le Samoa News poo a auala e tele ia e talitonu lona sui o loo soona fa’aalu le aoga ai e le malo tupe o lafoga a tagata, na taua e le molimau le to’atele o tagata faigaluega konekarate i totonu o le malo ua leva na tatau ona fa’amalolo, e le o i ai ma ni galuega o faia ae o lo o fa’aauau pea ona maua totogi.

“Silasila i le Fono Faitulafono mo se fa’ata’itai’ga, to’atele naua tagata o loo i luga o le lisi o tagata totogi (payroll) o lo o fa’aaua pea ona maua totogi, ae leai ma ni galuega o faia, e le o vaaia fo’i latou i le aso atoa mo le fa’atinoina o galuega o loo mafua ai ona totogi i latou”, o le saunoaga lea a lea Tamali’i o le atunu’u.

“E le fesiligia tagata faigaluega a le Fono o loo galulue faamaoni, galulue punoua’i toe galulue filiga i le fa’atinoina o a latou galuega, ae o lo o faapitoa lau molimau i le vaega lea e usu atu i le taeao ona faapotopoto lea i totonu o se tama’ita’i potu e fono ma inu ai ipu kofe, a tauaofia maota e lua ona o atu fo’i lea ua saofafa’i i nofoa i le pito i luga ua pei lava fo’i o isi senatoa ma faipule, a mae’a le tauaofiaga ona o fo’i lea i o latou aiga ae o loo totogi i latou mo le 8 itula i le aso, o isi na ituaiga tagata ua tatau ona fa’amalolo ae fa’asao mai tupe na e fa’atino ai galuega taua a le malo e pei o le fa’aleleia o auala, fesoasoani ai i le falema’i, poo le ave fo’i e si’i ai totogi o faiaoga”, o le saunoaga lea a se tasi o Tamali’i.

Ua i ai le fa’amoemoe a maota e lua o le a fa’atulaga iloiloga mo pili a le faigamalo e faaee ai lafoga, pe a toe tauaofia galuega a le Fono i le isi 2 vaiaso o lo o lumana’i nei, ma ua fautuaina fo’i e ta’ita’i o maota e lua afioga i taitai komiti, ina ia aua ne’i vavevave i le tulaga o le pasiaina o pili e pei ona tu’uina atu e le faigamalo, a ia lava se taimi e fa’atulaga ai iloiloga ina ia malamalama lelei afioga i senatoa ma faipule i le tulaga tonu o lo o taoto ai nei tulafono, ma afai fo’i e le tatau ona pasia ni isi o nei tulafono i le tauaofiaga lenei, ona taoto lea mo isi tauaofiaga o lo o mulimuli mai, e mafai ona toe iloiilo auiliili i ai ma fai ai se faaiuga mautu.