E LE O OE O SE SULI MONI

Vaega 77

E le i manatu mamafa le ali’i foma’i o Lavi i le fesili a le ali’i faiaoga meauli lea o loo la talanoa, se’i vagana ai lona tali atu fa’apea, “e i ai tulafono e puipuia ai tagata faigaluega a le falema’i mai le auai i tulaga fa’apena, o le mafua’aga lena e le mafai ai ona matou fesoasoani atu i tagata mama’i e ela i le tuiina o matou toto, se’i vagana ai lava o se tulaga o le latalata i le oti, poo se fa’atonuga e tu’u sa’o mai e i latou o loo ta’iulu i ai Falema’i a le malo, ona fa’atoa mafai lea ona matou tali atu”, o le tali atu lea a Lavi i le ali’i foma’i meauli, ona la lulu lima lea ma fa’atofa, ona ia faliu lea ma toe savali aga’i i lona ofisa, ae aga’i ese atu fo’i le ali’i faiaoga meauli ma lona aiga i le latou ta’avale ma o ese loa. O le tuana’i ai o le masina talu ona mae’a le taotoga a Ianeta, sa tausia ai pea o ia i le falema’i ona o puipuiga lava i le ono toe a’afia lea o lona taotoga mai ta’aloga o loo auai atu i ai o ia, peita’i o le tulaga lea ua maitauina, e mana’omia lava le i ai o paina toto e ola ai lenei tama’ita’i, ona e fai lava ma tula’i mai le fa’afitauli o le le lava o le toto o lona tino. “Lau susuga a le foma’i, toe tasi lava le paina toto o loo totoe mo Ianeta, ua mae’a paina toto sa fa’apolopolo e le falema’i mo ia, ae o lenei lava e le toe maua se tagata e maua mai ai se fesoasoani mo ia”, o le tala lea a le isi teine tausima’i i le la talanoaga ma le ali’i foma’i ia Lavi, ma fa’atonuina ai loa e Lavi le teine foma’i ina ia fa’atonu le ofisa e toe fai se isi fa’asalalauga i luga o le leitio, televise ma nusipepa, e talosagaina ai tagata uli e fia fesoasoani mo Ianeta, ina ia aga’i mai i le falema’i sei siaki o latou toto pe tutusa ma le ituaiga toto o loo mana’omia mo Ianeta.

E fetaui lava le taunu’u ane o le ulugali’i o Meki ma Lucy e momoli ane lavalava ma le meaai mo Ianeta i le isi taeao, ae vaaia loa fo’i le gasolo ane o se solo tele lava o tagata uli ma laulaututu i luma o le faitoto’a tele e ulufale ai i totonu o le falema’i. “Ua matou oo mai e fia siaki o matou toto pe mafai ona fesoasoani ai mo le teineititi meauli o Ianeta”, o le tali atu lea a nisi o tagata uli ina ua fesiligia i latou e tagata faigaluega a le falema’i i le mafua’aga o le latou lolofi atu i lea taeao, ona fa’agasolo loa fo’i lea o le fa’atinoina o le galuega e pei ona masani ai tagata faigaluega a le falema’i, o le auina atu lea o i latou nei e siaki muamua o latou toto poo aafia i ni fa’ama’i, fa’atoa auina atu ai loa lea i le potu e tui ai le toto, ma fa’ai’u atu ai i tua i le umukuka i le nofoaga e maua ai sina meaai mo i latou. E ui i le to’atele o tagata uli na lolofi atu e tui ma siaki o latou toto ina ia mafai ai ona fesoasoani mo Ianeta, e leai ma se isi o i latou uma nei e tutusa lona toto ma le ituaiga o le toto o Ianeta, ae ua aga’i atu fo’i i le tulaga o le fa’aaoga lea o le paina toto e tasi sa totoe i le falema’i mo Ianeta, ma faia ai loa le fa’aiuga a le ali’i foma’i ia Lavi ina ia te’a loa i tua le tama’ita’i mai le falema’i, ae aga’i atu i tua i lona aiga, ma o se tala na matua lagona ai le fiafia o le ulugali’i o Meki ma Lucy, ina ua mafai ona latou toe feiloa’i ma Ianeta i le tuana’i ai o le masina o taofia o ia i le falema’i ona o ma’i o le tino.

Ae o le atoa ai o le 2 vaiaso talu ona te’a i tua Ianeta, na toe fa’anatinati atu ai loa fo’i o ia i le falema’i mo se fesoasoani, ina ua matapogia o ia ao i ai i ta’aloga a le aoga, ae ina ua siaki atu lona tino i le falema’i, e le gata ua maualalo lona toto ae ua tulaga fa’aletonu atu ai fo’i ma lona fatu. Na vaaia le fememea’i o le ulugali’i o Meki ma Lucy ina ua fa’ailoa ane e le foma’i le tulaga tuga ua i ai Ianeta, ae ua leai fo’i se paina toto o totoe a le falema’i i le taimi nei. O fa’asalalauga na tu’uina atu i luga o le leitio e talosagaina ai nisi tagata o le atunu’u mo se fesoasoani, ua fai si tuai, ma ua foliga mai e ono aga’i atu le ma’i o Ianeta i se tulaga pagatia, pau le tala lea o lo o fa’alogoina mai teine tausi ma’i atoa ai ma le ali’i foma’i ia Lavi, e mana’omia se toto mo Ianeta. Na vaaia le savali telea’i atu o le ali’i foma’i o Lavi i totonu o lona Ofisa ao pisi teine tausima’i ma isi foma’i e tau togafiti Ianeta, e le i umi ae vaaia le toe savali ane o le ali’i foma’i o Lavi mai fafo o lona potu, ua tatala ese ona lavalava foma’i, ae ua ofu savili mai o ia ma lana fa’aupuga, “ua ou sauni e tui lo’u toto pe mafai ona fesoasoani ai mo Ianeta”.