Fa’atonuga malosi mo sui o le Kapeneta a le ali’i Kovana

Ua tu’uina atu nei e le Pulesili o tagata faigaluega a le Ofisa o le Kovana se fa’atonuga malosi i sui o le Kapeneta, e fa’atatau i le le tatau lea ona toe i ai se isi e malaga ese atu ma le atunu’u mo ni fonotaga i fafo i le taimi lenei e oo atu i le fa’aiuga o iloiloga a le Fono mo le Paketi a le malo.

I le fa’aaliga sa tu’uina atu e le tofa a Fiu Saelua i Faatonusili ma Faauluuluga o Matagaluega uma ma Ofisa Tumaoti a le malo i le vaiaso nei, e le gata o lo o ia fa’alauiloa ai le fonotaga a le Kapeneta lea ua fuafua mo le aso Tofi, Aokuso 10, 2017 i le itula e 9:00 i le taeao, i le potu fono a le Matagaluega o Fa’atoaga a le malo i Tafuna, ae o lo o tu’uina atu fa’atasi atu ai fo’i ma le fa’atonuga e taofia ai le toe malaga i fafo o sui o le kapeneta.

O lo o toe fa’amalosia atili i le fa’aaliga mai le tofa Fiu sui e tatau ona auai i fonotaga a le Kapeneta, lea e fa’apitoa i Fa’atonusili, Fa’atonusili le tumau, atoa ai ma Peresetene ma Pulesili o Ofisa Tumaoti a le malo.

E pei ona fa’amalosia e le afioga i le ali’i kovana ia Lolo Matalasi Moliga i soo se taimi e fono ai ma lana kapeneta, aemaise lava i le taimi e sauni ai le Fono Faitulafono mo le iloiloina o le paketi a le malo mo le isi tausaga tupe fou o le a sosoo ai, le tatau lea i afioga i Faatonusili ona i ai uma i le atunu’u e sauni ai mo iloiloga o le paketi.

I le fonotaga a le Kapeneta e le i mamao atu, na toe fa’amausali ai e kovana Lolo i lana kapeneta le taua tele o lo latou i ai i taimi o iloiloga o paketi a latou matagaluega, e le gata e faa faigofie ai i le fono ona faia a latou galuega i le iloiloina lea o paketi a ofisa taitasi, ae mafai ai fo’i ona maua e afioga i Senatoa ma Faipule tali o a latou fesili o loo fia malamalama i ai.

Na taua e Lolo i le kapeneta le tele o taimi latou te fono ai ma ta’ita’i o le Fono, lea e fa’ailoa atu ai e ta’ita’i o le Fono le le mana’omia o ni sui fa’atonu poo nisi lava e molimau mo paketi a ofisa ta’itasi, se’i vagana ai lava le Fa’atonusili.

O se tasi o mafua’aga autu o le malologa a le Fono e 4 vaiaso e pei ona fa’agasolo i le taimi nei, o le taumafai lea ina ia fa’asao a latou aso fono mo le iloiloina o le paketi a le malo mo le tausaga tupe fou 2018.

Na taua e le Fofoga Fetalai a le maota o sui ia Savali Talavou Ale i afioga i Faipule e fa’apea, o se tasi o mafua’aga ua la manatu ai ma le Peresetene o le Senate e faia loa le malologa a le Fono mo le taimi lenei mo le 4 vaiaso, ina ia fa’asao mai ai aso galue a le Fono e talanoaina ai le paketi a le malo e le i taunu’u atu lava i le masina o Iulai e tusa ai ma le tulafono.

Ua i ai le fa’amoemoe o le toe tauaofia ai o galuega a le Fono Faitulafono i le aso 21 o le masina lenei o Aokuso, o le a fa’ailoa tonu ai loa le auala e fa’atino ai iloiloga a le Fono mo le paketi a le malo i lenei tausaga.

O se tasi o matuapu sa fesiligia a ni isi o Faipule i le toe tauaofia ai o galuega a le fono i le vaiaso na te’a nei, o le nofoaga e fa’atino ai iloiloga a le fono mo le paketi a le malo, ae na fa’ailoa e Savali i luma o le maota o sui, e ono tu’u fa’atasi iloiloga a maota e lua mo le paketi i le Fale Samoa o lo o fa’aaoga e le Senate mo lana tauaofiaga, ae o le a mafai ona fa’amautuina lea tulaga pe a mae’a se le fonotaga ma le peresetene o le Senate, le afioga i le Tama’ita’i o le Ao ia Gaoteote Palaie Tofau.