Fa’afailele e le nu’u fanau ina ia fausia ai se lalolagi matagofie

Ua atoa le 5 vaiaso o fa'atautai le A'oga Faitau Tusi, Vali Ata, Tu ma Aga Fa'asamoa mo talavou laiti aemaise o ta'aloga ma fefa'amasania'i atili mo le fanau e to'a 40 sa lesitalaina, ma o lo'o fa'atautaia e le Auuso o le Aiga o Aoelua & Fanene o Nuuuli!.

O lea avanoa e amata mai le 3 se'ia o'o i le 16 tausaga le matutua, aua o lea fa'ato'a amatalia i lenei tausaga. Peita'i, na mafua mai ona ua le talia le alo o le tina o Salote Aoelua Fanene i polokalama o lo'o fa'atautaia i le tu'uaga umi o a'oga i lenei tausaga, ona e la'ititi.

"Pe afai e le amatalia e se tasi se isi avanoa e mafai ona ave i ai le fanau mai le K3 - K5, o lona uiga, e tatau ona faia loa, aua e to'atele na'ua i latou ua avea pea i le Day Care i aso ta'itasi, ua o'o lava i le taimi ua tu'ua ai a'oga mo le taumafanafana. O le mafuaga lena ua amatalia ai lenei a'oga o le faitau tusi, tusi ata, a'oina ai tu ma aga fa'asamoa, ae maise o ta'aloga eseese ua masani ma fiafia i ai le fanau." O se tala fiafia lea a Salote Fanene.

"Mo vaiaso ta'itasi, ua matou fa'atulagaina ai le fa'asologa o vaega ta'itasi mai auaunaga eseese ua fa'atautaia e le Malo ma nisi fo'i o fa'alapotopotoga mo le mamalu lautele e aoga mo le fa'aleleia atili o le soifuaga o le fanauiti e tutupu a'e i le tatou atunu'u, ae maise i tua i afio'aga ta'itasi." O se fa'apupulaga lea a Salote.

Vaiaso lona lua o le latou autu na fa’atulaga o le ”Fausia se Lumana'i Manuia" ma sa fa'atautaia ai e le vaega a le "Alliance Fausia se Lumana'i Manuia" mo latou a’oa’oga fa’apitoa. Tima’ia le fanau ina ia latou ola alolofa i matua, ia va’ai fa’alelei e i latou lotoifale o latou aiga ina ia fesoasoani i matua i fe’au o le fatuaiga.

“A fiafia matua ma fanau, e mafana le mafutaga e fiafia fo’i le aiga. A i ai ni fa’aletonu e va’aia e i latou i le mafutaga a latou matua, fa’ailoa i lou faia’oga, ina ia maua ai se fesoasoani.” O nisi ia o tima’iga e mafai ona fa’ailoa i fanauiti, ia malamalama i ia latou aia tatau e ola fiafia ai i mafutaga fa’aleaiga.

O le vaiaso lona tolu na vala’aulia ai le vaega a le “Alofa mo Meaola” ina ia latou fa’ailoa ma toto i loto o le fanau le agaga alofa mo meaola, ina ia latou tausia leleia ai latou fagafao, po’o meaola o lo’o avea ma latou uo mamae i totonu o latou aiga. O le autu o lea vaiaso na folasia: Fausia se “Nofoaga Saogalemu mo Meaola.” O tusi ata o meaola eseese sa avatua atoa e le Sosaiete Alofa mo Meaola fa’atasi ai ma tusi o tala pupu’u e fa’atatau i le mafutaga faauo a le tagata ma lana fagafao, na faia ma meaa’oga a le fanau i lena vaiaso atoa.

O le vaiaso lona fa ua fa’aautu ai latou galuega fa’atino ma a’oa’oga uma i le “Fausia Se Afioaga loto Fesoasoani!” ma sa latou  talia fo’i le o’o ane a le Natonal Park e molita’i ane fe’au e fa’aosofia ai le naunau o le fanau e toto la’au e fa’amatagofie ai le si’omaga o lou afio’aga, iloa lelei le aoga o le fa’asao o mea uma mo le soifua laulelei o tupulaga faia’e o le atunu’u ma afio’aga ta’itasi o aofia ai.

O le vaiaso lona lima ma le toe vaiaso lenei, ua fa’amae’a uma ai le anoanoa’i o tusi ata valivali ma le faitauga o tusi sa fa’auia ane e tautua lautele e fa nei sa tima’ia ai i latou, atoa ai ma faia lea o ta’aloga e fiafia fa’atasi ai le fanau ma fa’amalositino ai a’o lei tu’ua lenei aoga i aso ta’itasi i le itula e 11:30am. O le aoga lenei e amatalia i taeao taitasi i le itula e 9:00 i le taeao ae na saunoa Margeret Aoelua, “E oo i lena taimi, ua leva ona feoai solo mai le fanau ma tu’ufesili pe o le a le taimi e amata ai le a’oga. O lo’o i ai le naunau ma le fiafia i le fanau i taimi uma.”

Ua fa’afetaia fo’i e le Aoelua/Fanene Sisters le to’afa o le fanau talavou na fa’atulaga atu e le Matagaluega o Tagata Faigaluega a le tatou Malo mo le latou polokalama, ua fa’ateleina ai le fiafia o fanau, ma ua fa’aleleia atili fo’i latou faitau tusi i lenei a’oga fa’atasi ai ma le iloa ona fesoasoani e a’oa’o ma fa’atonu le fanauiti.

O le aso Tofi nei le latou toe aso ma ua fuafua e fa’atautaia se polokalama matagofie mo le fanau sa lesitala ae maise o le vasega o sui na fesoasoani mo i latou i le Coalition Center Hall i Nuuuli i le 6:00 i le afiafi, ma tapunia ai le latou polokalama matagofie i se latou fiafia fa’atasi.