Fa’afetaia afioga Faipule le Komesina i le tautua a le Ofisa o Leoleo

E ui i le to’atele ai o le atunu’u o lo o fa’aalia lagona fa’asea i le auala o lo o fa’atino ai e le Matagaluega o Leoleo le fa’amalosia o tulafono eseese i luga o le alatele, peita’i o le iloiloga a le maota o sui ma le Komesina o Leoleo i le vaiaso na te’a nei, na fa’aleo aloaia ai e le to’atele o Faipule lagona fa’afetai ma le fa’amalo i le tofa Le’i Sonny Thompson, e tusa ai o galuega lelei o lo o fa’aauau pea e ali’i ma tama’ita’i Leoleo mo le atunu’u.

“E ui i le tele o fa’asea mai le mamalu o le atunu’u, o lo o maitauina pea lo outou fa’atinoina o a outou tiute ma le fa’amaoni, e ala lea i le fa’amalosia o tulafono ua tu’uina atu tou te tausia ma fa’amalosia mo le atunu’u”, o le saunoaga lea a le afioga i le ali’i faipule ia Manumaua Wayne Wilson, o le ta’ita’ifono lea o le Komiti o le Saogalemau Lautele a le maota o sui.

Na fa’afetaia e le afioga i le ali’i faipule ia Timusa Tini Lam Yuen suiga ua faia i le Falepuipui i Tafuna, aemasie i le fa’aaogaina o le falepuipui fou e nonofo ai le vaega to’atele o pagota, ina ia fesoasoani ai i le pumoomoo ma le feoma’i sa i ai falepuipui tuai ua tele tausaga o fa’aaoga mai e le Matagaluega.

Ina ua fesiligia le aofa’i o pagota o lo o i ai i le toese i le taimi nei, atoa ai ma le auala o lo o fa’atino ai le polokalame lea e tatala ai pagota i tua e galulue ao tuli ai a latou fa’asalaga, na taua ai e le tofa Le’i le fa’atupulaia pea o le aofa’i o pagota o lo o i ai i le toese i le taimi nei, fuafua atu i nai masina ua mavae atu.

O pagota o lo o i ai i le toese i le taimi nei e aofia ai i latou o lo o fa’atali fa’aiuga o a latou fa’amasinoga, i latou o lo o tuli fa’asalaga fa’a falepuipui mai le fa’amasinoga, atoa ai ma i latou o lo o taofia ona o tulaga fa’aletonu i pepa nofomau mai le Ofisa o Femalagaaiga.

I le polokalame o lo o tatala ai pagota i tua e galulue (work release), e le o se polokalame lea e pulea e le Ofisa lo Leoleo, ae o le polokalame e fa’atonutonu mai e le Fa’amasinoga.

Saunoa Timusa e fa’apea, o se tasi o atugaluga tele o lo o i ai i le taimi nei, o le tele o le tupe a le malo o lo o alu i tausaga uma i le tausiaina o pagota, ae foliga mai o ni isi o loo taofia i le toese o tagata o lo o a’afia i tulaga o tulafono tau Femalagaaiga, atoa ai ma ni isi ua tatau ona magalo i lalo o avanoa mai le Palola, ae foliga mai e le o nofoia lava le Komiti a le Palola e maua mai ai lea fa’amama avega.

I le tulaga o le fa’amalosia o tulafono i luga o le alatele, o se tasi lea o mataupu sa tele i ai fesili a Faipule, ona o lo o i ai tagata o le atunu’u o lo o fesiligia le malosi e fa’asala ai ave ta’avale e paka i auala tua e pei o le auala tua o lo o i tua o le taxi-stand i Fagatogo, i luma o le fale’aiga a le Sweetie.

Saunoa Manumaua e fa’apea, o se tasi o tulaga o lo o fiamalamalama ai le atunu’u, e le o i ai ni fa’ailoilo i le vaega lea o le alatele e fa’ailoa mai ai, e fa’asa ona paka ni ta’avale i luma o le fale’aiga lea, ae ua to’atele ave ta’avale ua ticket ai e Leoleo i aso ta’itasi.

Ae na fa’amanino e Le’i e fa’apea, e ui e le o ni fa’ailoilo e fa’ailoa atu ai e fa’asa ona paka ni ta’avale i le vaega lea o le alatele, o lo o manino lava le tulafono i luga o le alatele, e fa’asa ona poloka e se ave ta’avale le auala tele a le malo atoa ai ma auala tua, ma soo se taimi e maua ai e Leoleo ni ta’avale o paka ai ma poloka le auala tua lea, e fa’asala le ave ta’avale lea.

I tulaga o ta’avale o lo o pasia e le Ofisa o Leoleo i masina ta’itasi, o se tasi lea o itu na momoli ai le agaga fa’afetai a le afioga a Vailoata E. Amituana’i i le susuga i le ali’i Leoleo ia Lt. Tua Pele Uia, ona o le auala o lo o fa’amalosia ai tulafono mo le lesitalaina o ta’avale, ina ia mautinoa e saogalemu ta’avale e fa’aaoga e le atunu’u, e pei o le atoatoa lea o le lelei i le tino o le ta’avale, atoa ai ma le aveese o pepa uila o lo o kava ai tioata o ta’avale (tint).

Saunoa Lt. Uia e fa’apea, o le fa’afitauli o lo o maitauina e le Ofisa o Ta’avaleafi i Tafuna, a uma ona latou aveeseina tint mai tioata o ta’avale i le taimi e pasi ai, ae a uma loa ona pasi ona toe o lea o tagata ma toe fa’apipi’i isi tint i tioata o a latou ta’avale, ma o le taimi e maua ai e fa’asala le ave ta’avale.

Saunoa Le’i e fa’apea, o le mafua’aga e ala ai ona faia e Leoleo gaioiga uma e pei ona fa’asea ai ni isi o le atunu’u, e le gata ia mautinoa le saogalemu o le atunu’u atoa, ae o o lava fo’i i Leoleo e tatau fo’i ona puipuia lo latou saogalemu i le taimi e fa’atino ai la latou tautua.