E LE O OE O SE SULI MONI

Vaega 71

Na fa’ateia le toeaina o Pulusi i le fesili a le ali’i foma’i, poo fea la o i ai lona tuafafine pe afai e to’alua le fanau a lona Tina sa i ai. Na umi se taimi e le tali le toeaina o Pulusi i se tala, se’i vagana ai lona autilotilo solo i vaega o le fanua na tu ai le la ulua’i fale ma lona to’alua, atoa ai ma le la fa’atoaga togalaau ‘aina tele lava na mafua ai ona ta’uta’ua i laua i le aai i na vaitaimi, i le tele o le fualaau ‘aina na mafai ona la sapalaiina atu i faleoloa eseese atoa ai ma le maketi sa tu i le ogatotonu o le tama’i aai. “Vaai oe le ali’i foma’i, e umi le tala e fa’atatau ia te oe ma lou tuafafine aemaise ai lou Tina, e le o se tala fo’i e tatau ona e fa’alogo i ai, pau le itu taua ou te fia fa’ailoaina atu ia te oe, e ui ua oti si ou Tina, ae i ai lo’u talitonuga o loo ola mai pea lou tuafafine i le taimi nei, ae ou te le o iloa poo fea tonu se vaega o lenei malo o loo nofo ai o ia, ou te le o iloa poo nofo i le nofoaga o loo fa’amautu uma ai tagata pologa i le isi itu o le malo, poo i ai fo’i se aiga milionea o avea ai o ia ma pologa”, o le tali atu lea a le toeaina o Pulusi i le tele o le mau fesili na fesiligia ai o ia e le ali’i foma’i. E lei logo malie i le fa’alogo a le foma’i le upu sa fa’aaoga e le toeaina o Pulusi e fa’amatala ai latou ma lona Tina, o i latou o tagata pologa. “Afai o i matou o tagata pologa mo oe ma lou aiga i aso ua mavae, aisea na le tausia fa’atasi ai maua ma lo’u tuafafine, semanu e fa’apenei lava o loo ma ola fa’atasi ma maua le fiafia”, o le toe oso atu lea a le tamaititi foma’i ma lona loto ua amata ona ita. “Ou te fia malamalama fo’i poo ai le igoa o lo’u Tama, ae pe tutusa fo’i o ma Tama ma lo’u tuafafine”, o le fesili mulimuli lea a le ali’i foma’i na momotu fa’afuase’i ai loa e le toeaina o Pulusi le mataupu o loo la talanoa ai, ina ua ia talosagaina le tatau lea ona la toe vave fo’i atu i le aai manu e lei malu ifo le pogisa.

Na savali atu nei le tamaititi foma’i ua fa’aola le la ta’avale ma le toeaina o Pulusi, ma toe aga’i ane loa i tai i le aai. O le la malaga toe fo’i ane i tai lea na maua ai loa le avanoa e toe fesiligia ai e le tamaititi foma’i le toeaina o Pulusi e tusa ai o lona tuafafine, ae pe faapefea fo’i ona ia maua le nofoaga o loo tausia ai o ia i le taimi nei. “Vaai oe le ali’i foma’i, o le isi lenei itu taua e tatau fo’i ona e malamalama i ai, na pau le auala e mafai ona e sulu i ai e fa’amaonia mai ai poo ai lou Tama, o lou taumafai lea e fa’apele le olomatua (Mekala), o ia lena o loo teu uma i ai fa’amaumauga e fa’atatau i lou Tina ma le taimi na oulua fananau mai ai ma lou tuafafine, o ia fo’i lena e te maua uma i ai isi ituaiga fa’amatalaga e fa’atatau i lo oulua aiga”, sa na o le luelue ulu o le tamaititi ao sau saoasaoa le la ta’avale ma le toeaina o Pulusi, ina ua ia mautinoa e na o le fafine lava o Mekala e maua atu i ai le tali sa’o o le mau fesili o loo ia fia maua i ai se tali. O le suamalie o tala fa’agauloto a le fafine saua o Mekala na mafua ai ona malie le ali’i foma’i latou te momoe i lea po, ma maua ai loa le avanoa o le ali’i foma’i na te fa’asufiina ai le ulugali’i e tusa ai o lona Tina ae o fea fo’i na te maua i ai lona tuafafine. “Vaai oe ali’i foma’i, e faigata ona e toe talatalanoa i ni mea ua tele tausaga talu ona tutupu, aua o le mea moni lava, o lou tupuaga na e tupuga mai i se aiga mata’utia le matitiva toe ola pologa, ae na avea lo ma fetagofi atu e tausi mai lou Tina ma, ma agalelei i ai ma itu na e ola mai ai i lenei olaga, e ui e le o oe o se suli moni o le aiga”, o le fa’amatalaga lea a le fafine o Mekala na te’i ai le fa’alogo a le ali’i foma’i ma ia toe fesili tuli tatao atu i ai, “O le a le uiga o lau fa’amatalaga, ua laki lo’u Tina ina ua lau tausia ma fafaga fa’alelei, ae o ia na ola a’e i se olaga pologa, e le o a’u fo’i o se suli moni o le aiga. O ai la lo’u aiga”, o le toe fesili fia malamalama atu lea a le tamaititi ma itu na ita ai loa le fafine saua o Mekala ma ia manatu loa o le a fasiotia le tamaititi foma’i.