Tala I Vaifanua

AU USO "BISHOP BROTHERS" TAUTUA I LE US ARMY

Ua mae'a ona fa'au'u mai le taumafaiga a le ali'i talavou o So'oula Sione Bishop o Aunu'u, Alofau & Fasito'outa i lana ulua'i koleniga fa'apitoa mo le US Army, lea sa auai atu ai mo le tolu masina i Fort Sill, Oaklahoma.

Peita'i, o le fa'aiuga o le vaiaso na te'a, le aso Tofi ma le aso Faraile, sa fa'atautaia ai loa le fa'au'uga o i latou uma na autova'a fa'atasi i Fort Sill mo latou BCT ma o se tasi o alo o Amerika Samoa sa malaga atu, So'oula Sione Bishop na lalamua i lea fo'i fa'au'uga.

Ua le gata ia te ia lea, ae sa i ai ma nisi fo'i alo o le atunuu sa au ai fa’atasi mo BCT i South Carolina.

O le uso o PV2 Bishop, So'oula Sione, le ali'i matua o Tony Bishop, sa malaga ane i le nofoaga o lo'o tiute ai mai Kansas City ina ia fa'atasi ma So'oula i lona fa'au'uga. Ona o Tony ua atoa le 3 tausaga o lana tautua i le US Army, ua mae'a fo'i ona malaga i South Korea mo ona tiute fa'apitoa, ua maua ai e ia lea avanoa e fa'amalosi'au ai i si ona uso la'ititi lea o le a malaga i Fort Sam i Houston Texas mo lana AIT. 

O a'oa'oga fa'apitoa o le a alofaiva i ai So'oula o le Operational Specialist numera 68D.

O So'oula na amata ana aoa'oga i le A.P. Lutali Elementary, soso'o ma Fagaitua High School lea na fa’au’u ai ia Iuni 2017.

O'o ane e su'e lana suega o le ASVAB ma pasia e ia o togi e ulufale ai i le US Army. Na tu'ua e i latou ma isi uma o le latou au tauto i le vaega au Amerika Samoa ia Aokuso mo latou a'oa'oga fa'apitoa BCT.

O ia lea sa a'otauina i Fort Sill ma se tasi o tama'ita'i Samoa PV2 Aga. Ua pasia fa'atasi e i la'ua lea koleniga. PV2 Bishop o se atali'i e fa'asino i le susuga Fulu Bishop ma Vi'iga Lemafa Bishop o Aunu'u, Alofau ma Fasito'outa Samoa.

O nisi o alo na fa'au'u mai South Carolina e aofia ai: PVT Togi, Litara mai Aoloau, Pvt Nonu, Pvt Vaovasa, Pvt Su'a ma Pvt, Mulitalo. Fa'amalo lava le taumafai i mea lelei i alo o Amerika Samoa i vaega au.

MAIFAEA & MAIAVA - FA'AU'U NORTH PARK UNIVERSITY

O nisi o alo o Amerika Samoa ua fa'au'u mai i le Iunivesite o North Park i Foster Avenue, Chigago, Illinois, ua fa'ailoa mai ai le ali'i o Stephen Maifea ma Chaun Maiava.

O i la'ua nei e ta'a'alo uma  i le Football, ma e fa'alua ona maua e Maiava le All-College Conference ao le'i fa'au'u nei.

O nei alo o America Samoa sa a'o'oga uma i le A'oga Maualuga a Tafuna, ma o lo'o fa'aauau pea ona ta'a'alo i la'ua i le Football a'o i ai i lea Iunivesite.

Ua fiafia nei aiga ona o le fa'amanuiaga ua maua e nei fanau, ua fa'aiu ma le manuia taumafaiga i aoa'oga ae maise o lo'o ta'a'alo mo le 'au a le Vikings i le vaega a le Defense i le tulaga o le line backer.

O Maiava o le alo e fa'asino ia Tuavao Vaimaga, Sui Komesina o le matagaluega o Leoleo a le tatou malo, ma le tina o Tumafua Maiava mai Iliili ma Afonotele. Na fa'au'u mai Tafina High i le tausaga e 2014.

I se fa'amatalaga a le ali'i o Chaun Maiava sa ia fa'ailoa mai, "Ou te fa'afetaia le alofa o le Atua i le taumafaiga, ae le'i faigofie lava nei tausaga talu mai ona tu'ua aiga ma matua pele. E i ai taimi e lutaluta ai le tai i tauiviga tau a'oa'oga, ae le mafai ona galo ai le fa'amalosi'au mai a matua, e toe fa'amanatu ia taumafai atili ae a se lumana'i manuia e toe aoga atu ai i nai o tatou malo, nu'u ma aiga ae maise le galuega a le Atua."

"O le isi mea e matua lu'ia ai lo ta olaga taumafai, ona o le va'ai atu i isi uso Polenisia, ae maise lava tagata mai Tonga, i lo latou fo'i taumafai ia manuia latou sailiga atamai ma le fa'atupega lea e fa'aauala mai i le ta'alo fa'atauva i le football. O i latou ia e fai ma lu'i e mafua ai ona le fia toilalo le loto ma le taumafaiga, ae saili malo atili ai!"

I lona taimi na ta'alo ai i le Vikings a le North Park University, sa fa'alua lelei ona siakia o ia e le NFL ma ua ia lagona lava, e tauau e manuia sana taumafaiga mo le avea ai ma se tasi e ta'alo football i le NFL pe a mae'a lona fa'au'uga lenei.

O loo taumafai e feso'ota'i tasi ma ia, pe o tua ma ni a fo'i lea itu o lana taumafaiga.

O Maifea o se tasi o alo e fa'asino i matua matutua o Samuelu ma Malu mai Nuuuli, ma sa auai atu le uso o si ona tina o Salamasina Nomura Mcmoore Tuamoheloa ma lona to'alua ina ia fa'aula o ia i lona fa'au'uga. O si ona tina pele o Natasha McMoore lea sa ia fa'ao'o maia le ata o nei fanau Amerika Samoa mai Chigago.