Vevesi sailiga siamupini pasiketipolo a aoga maualuga -

Pago Pago - AMERIKA SAMOA

O le Aso Gafua o le vaiaso ua tuanai, na tula’i mai ai se faafitauli i le malae ta’alo a le aoga maualuga a Manumalo i Manumalo, ina ua vevesi le ‘au ta’alo pasiketipolo a ali’i a Manumalo ma le aoga maualuga a Nu’uuli Voc-Tech, i le latou sailiga siamupini. 

Na amata mai nei faafitauli, ina ua le taunu’u le ta’aloga na fuafua e faia i le aso 23 o Mati, ae peitai, na taofia e se faifeau mai i le aoga Manumalo le ta’aloga, ona ua mana’o e faia se su’ega a se tasi o alii ta’alo a Nu’uuli Voc-Tech, pe a’afia i fualaau faasaina. 

Na ta’ua e le ‘coach’ a le ‘au pasiketipolo a NVTHS, ae e le’i faia le ta’aloga, sa faia e le ‘faifeau’ mai Manumalo se su’ega mo fualaau faasaina, a se tasi o tama ta’alo a NVTHS ma ia faaooina atu faaiuga o lea suega i le ofisa o mataituina ta’aloga a aoga (ASHSAA).  Ae peitai, sa le’i taliaina e le ASHSAA ia le faaiuga o lea suega, ma toe faatulaga ai le taaloga mo Aperila 3.  E le o manino i le taimi nei, pe aisea na mafai ai e le alii faifeau lea ona taofia le taaloga i le aso 23 o Mati, ma pe aisea na ioe ai le ASHSAA e taofi le taaloga i lea aso.

O le afiafi o le Aso Gafua, Aperila 3, na toe faia ai le sailiga siamupni lenei, ae peitai, e le i mae’a lelei le taaloga, ae tula’I mai loa se faalavelave i le au maimoa, i le itu o le tapuaiga a NVTHS, ona o se ‘ai o le taaloga, na taofi le aumaimoa, sa tatau ona maua e NVTHS ae peitai, sa faaopoopo i ‘ai a Manumalo.  E le gata i lea, o le le fiafia o le tapuaiga a NVTHS ona ua o latou taofi, o loo faia e le ‘faifeau’ Manumalo ni faiga fa’atosina, ina ia ‘au atu ai laufali ma le ‘au tusi ‘ai o le taaloga, i le latou ‘au.

Na fa’ailoa mai e faapea, o le le fiafia o le tapuaiga a NTVHS, na i’u ai lava ina togi e se tasi o le au tapua’i se apa inu i totonu o le malae ta’alo, ma amata ai loa fusuaga, ma i’u ai ina taofi e laufali le taaloga, ae ave le malo ia Manumalo, ae o lo o totoe minute e 2 i luga o le uati.

Ina ua mae’a ona fofoina le faafitauli na tula’i mai, sa mafai lona ona fai le laugatogi o le taaloga ma faalauiloa ai le siamupini o le ‘au a Manumalo I lenei tausaga aoga, e ui lava ina o lo’o totoe minute e 2 I luga o le uati.

Na fa’aalia e nisi o le ‘au maimoa I lea afiafi, o se tasi o le au taalo a Manumalo sa amataina le fusuaga. Na aapa atu sui o le Samoa News I aoga uma sa a’afia I lea faafitauli faapea le Ofisa o Aoga mo se faamatalaga.

Na fa’ailoa mai e se sui o le Ofisa o Aoga, ina ia faafesootai a’oga o lo o aofia I lenei mataupu, mo se faamatalaga.

Ae peitai, i se faamatalaga mai i se tasi o totino o le komiti faafoe a Manumalo, le faletua ia Tish Peau, o le fusuaga lona lua, na mafua ona o se tamaititi aoga, o lo o masalomia e aoga i le Pacific Horizon, sa kolaina se tama aoga a Manumalo, ma o lea na feosofi ai tama taalo a Manumalo.  Ma o iina na oso atu ai se alii ta’alo a NVTHS ma toe avau ai loa fusuaga.

E o’o mai i le aso Faraile o le vaiaso ua tuanai, e leai se fa’amatalaga aloaia mai i le ASHSAA e tusa ai ma le sailiga siamupini lenei, aemaise o le latou faaiuga e ave le malo ia Manumalo faapea ai ma le ‘ai lea na sese, i le taimi o le taaloga.

E fia faamanino e le Samoa News, e leai se tulafono a le ASHSAA e faamalosia ai ni suega Fualaau faasaina i fanau aoga ma o isi taimi, e maua ai faaiuga e ta’ua o ‘false positives’ o nei ituaiga suega.