Vevela felafolafoaiga i le va o Faipule o le Maota o Sui

Na fai si vevela o felafolafoaiga i le va o ni isi o afioga i Faipule o le Maota o Sui i le vaiaso na te’a nei, ina ua fa’auilavea Faipule ali’i ao saunoa se tasi o Faipule tama’ita’i e fa’aleo lona finagalo i mataupu e fa’atatau i lona itumalo.

I le alia’e mai ai o felafolafoaiga i le va o afioga i faipule, na saunoa ai loa le faipule tama’ita’i e fa’apea, e tutusa uma lava faipule na filifilia o latou itumalo e fa’aleoina mataupu e manuia ai tagata palota ta’ito’atasi. E le gata i lea, sa ia taua fo’i e fa’apea, e leai se malosi o le isi faipule e fa’atonu ai le isi faipule i ituaiga mataupu e ao ona ia talanoa i ai.

O felafolafoaiga i le va o faipule o le maota, na tula’i mai ina ua fa’auilavea le afioga a Vailoata Eteuati Amituana’i ao saunoa le tama’ita’i faipule ia Vui Florence Saulo e talosagaina se avanoa mo se iloiloga ma le Failautusi o le Ofisa o Mataupu Tau Samoa, e fa’atatau i le mana’omia lea o se Pulenu’u mo le afioaga o Tafuna i totonu o le itumalo o Tualauta.

Saunoa Vui e fa’apea, o asiasiga i aiga o le itumalo sa pagatia i le afa o Gita e pei ona mavae atu, ua atagia mai ai le mana’omia o se Pulenu’u mo Tafuna, e fesoasoani i tagata faigaluega a le malo aemaise le Feterale mo le tuuina atu lea o fesoasoani tatau mo tagatanu’u. Na taua e Vui lona popole ina ne’i avea le leai o se Pulenu’u o Tafuna ma auala e le maua ai e aiga uma tautua ma fesootaiga e moomia mo fesoasoani tatau o le ‘afa.

Na tula’i Vailoata ma fa’auilavea ma saunoa e fa’apea, o le mataupu o le Pulenu’u mo Tafuna e pei ona saunoa i ai Vui, e le o se mataupu lea e talanoaina i totonu o le maota, ae o le mataupu e fitoitonu lava i afioaga ma itumalo. Sa ia taua fo’i e fa’apea, e foliga mai o le a toe alo i tua galuega a le maota pe afai ae toe talanoaina lenei mataupu, ona o se tasi lea o mataupu ua uma ona sasa’a i ai le fa’autaga a le maota.

Na toe tula’i Vui ma saunoa e fa’apea, e le sa’o le saunaoga a Vailoata, ona e le i talanoaina lava i totonu o le maota le mataupu mo se Pulenu’u a Tafuna.

Na vave ona saunoa le Sui Fofoga Fetalai ia Fetu Fetui Jr ma ia taumafai e fa’ato’a filemu le mataupu i le va o Faipule e to’alua. Ina ua mae’a, sa fa’aauau loa le saunoaga a Vui e ala i lona talosagaina o se iloiloga ma le Faatonusili o Galuega Lautele a le malo, mo le talanoaina o le mataupu e fa’atatau i le fa’atafeina lea o le suavai i luga o le auala i le taimi o le ‘afa o Gita.

Na tula’i le afioga a Faimealelei A. Fu’e Allen ma faauilavea i le saunoaga a Vui ma ia taua e fa’apea, e lagona lona fa’anoanoa i le saunoa pea o Vui ao lea ua mae’a ona saunoa le Ta’ita’i o le maota.

Saunoa Faimealelei e fa’apea, o ia o se tasi o sui e tautala soo i le maota, ae o le taimi lava e saunoa ai le ta’ita’i, ona muta ai fo’i lea iina ma sona lagona e toe fia fa’asoa.

Na tula’i le afioga i le ali’i faipule ia Lavea Fatulegae’e Palepoi Mauga ma saunoa e lagolago ai le saunoaga a Vailoata, i le le talafeagai lea ona talanoaina e le maota o le mataupu a Vui e fa’atatau i se pulenu’u mo Tafuna. Saunoa Lavea e fa’apea, o mataupu i Pulenu’u e fitoitonu lava i totonu o filifiliga a afioaga ma le itumalo, ae le o le maota o sui e faia se faaiuga.

Na toe saunoa Vui e fa’apea, e le taofia e le isi faipule le mataupu e finagalo le isi faipule e fia saunoa i ai. O le tiute o le faipule na mafua ai ona filifilia e lona itumalo, o le saunoa lea i mataupu e manuia ai le itumalo ma le atunu’u.

Sa ia fa’amalulu i le maota e tusa ai o lona tula’i soo e fa’asoa ona lagona, peita’i i lona talitonuga, o le mafua’aga tonu lea na ala ai ona filifilia o ia e lona itumalo, ia saunoa i mataupu e tatau mo le itumalo.