Valaau malo alii Leoleo sa galulue fa’atasi ma Lomu i le po fa’alavelave

A o fa’agasolo ai le fa’amasinoga autu o le susuga a Mosese Lomu i luma o le Fa’amasinoga Maualuga i le vaiaso nei, na valaau ai e le itu a le malo ali’i e to’alua sa galulue fa’atasi ma Lomu i le po na tula’i ai le fa’alavelave e molimau mo le la itu.

O i laua nei e aofia ai le susuga a Carter Soliai ma Junior Kuka, lea ua faamalolo mai le galuega fa’a leoleo talu mai le fa’alavelave e pei ona tula’i mai i le aso 12 o Aokuso o le tausaga na te’a nei, lea o lo o tu’uaia ai le ali’i pagota o Manu Lefatia i lona sola i tua ma alu ma fana se ali’i i lona fale i Leone.

O loo molia Lomu i moliaga mamafa e 2, le moliaga o le taumafai e faia ni gaioiga faasolitulafono, ma le taumafai e faalavelave i se molimau.

O le ali’i loia fautua ia Ryan Anderson o lo o tula’i mo Lomu, lea o lo o tatala i tua ina ua mae’a ona ia totogi le tupe e $5,000 ae o le ali’i loia sili lagolago ia Doug Lowe o lo o tula’i mo le malo, ae lagolagosua i ai le ali’i Leoleo Suesue ia John Seumanutafa.

E tusa ai ma le molimau a Soliai, e to’a 5 sui o le latou Sifi sa galulue i le po na tula’i mai ai le fa’alavelave. O i latou e to’a 5 e aofia ai Lomu o le Ta’ita’i Uati; o Toloa Koonwaiyou o le Supavaisa; o ia (Soliai); o Kuka; ma le tama’ita’i e to’atasi ia Viopapa Vitolio.

O le latou Sifi e tatau ona amata i le 10:00 i le po o le aso 11 o Aokuso ae mae’a i le 6:00 i le taeao o le aso 12 o Aokuso.

E tulaga ese le Sifi i le aso e pei ona taua e Soliai, ona sa tuai uma atu tagata o le Sifi, se’i vagana ai lava o ia na taunuu i le Falepuipui i le 9:30, ma la talanoa ai loa ma le ali’i Leoleo ia Tolu Mareko, o ia lea o le Ta’ita’i Uati o le Sifi lea ua sauni e manava, ae sui atu le Sifi lea e ta’ita’ia e Lomu.

Faatoa gasolosolo atu sui o le latou Sifi ua ta le 10:30 i le po lea. O le itula e 11:00 i le po lea na faia ai loa le ulua’i faitauga o pagota i totonu o le Toese, ina ia mautinoa o lo o atoa uma i latou.

Na mae’a le faitauga o pagota e pei ona molimau Soliai ma iloa ai, o lo o atoa uma i latou i totonu o le Toese.

O faiga masani lava, a mae’a loa ona faitau pagota, ona nonofo ai loa lea o Toloa, Soliai ma Kuka e tiute i totonu o le lotoa, ae o Lomu ma le tama’ita’i o Vitolio e galulue mai totonu o le Ofisa.

Peita’i o se mea fou sa tula’i mai i lea po e pei ona molimau Soliai, na ona mae’a lava ona faitau o pagota, faatonu loa e  Lomu le latou Sifi atoa latou te o i totonu o le Ofisa latou te eva ma talatalanoa ai. Ina ua latou taunuu i le Ofisa, sa ki ai loa ma le ata i le computer a Vitolio, ma fai ai loa le matamataga ata a le Sifi atoa, faaopoopo atu ai ma le ali’i pagota faamoemoeina e igoa ia “Chico”.

Na taua e Soliai i lana molimau e fa’apea, na te le iloa le taimi na moe ai, ma ua momoe uma lava le Sifi i le po lea.

Na faateia o ia ao moe ina ua talanoa Lomu i lana telefoni, ma ia iloa ai, o le Ta’ita’i Leoleo ia Fo’ifua Foifua Jr lea ua vili atu ia Lomu, ina ia siaki le sela o loo loka ai le ali’i pagota o Lefatia, ona o lea ua manu a’e le igoa o Lefatia i le faalavelave lea na fana ai le ali’i o Sopi Senio i lona fale i Leone.

O le faatonuga a Foifua Jr ia Lomu, ia toe vili vave atu e logo atu o ia i le tulaga o Lefatia poo i ai i totonu o lona sela, peita’i e pei ona taua i le molimau a le malo, e silia i le itula talu ona faatali Foifua Jr i se telefoni atu a Lomu.

Na taua e Soliai e fa’apea, na faatonu e Lomu i latou e aga’i loa i tua i le sela e siaki Lefatia poo i ai. Ina ua latou taunuu atu ma Kuka ma Koowaiyou, sa latou molimauina ai, e le o i ai Lefatia i totonu o lana sela. Sa siaki fo’i totonu o le potu a le ali’i pagota o Isumu pe le o i ai, e le’i maua ai fo’i. I se taimi mulimuli ane ai, na faatoa vaaia ai loa Lefatia i totonu o le potu o le alii pagota o Isumu. O le taimi lea na latou momoli ai loa Lefatia i totonu o lona sela.

Na lagolagoina e Kuka i lana molimau le fa’amatalaga a Soliai sa tuuina atu i le vaega iloilo iuga.

Na taua e Kuka e faapea, a o moe i luga o le nofoa i totonu o le ofisa o le Toese i Tafuna, na faafuase’i ona fafagu o ia e Lomu ma faatonu ina ia o e vaai le sela a Lefatia.  Na taua e Kuka e fa’apea, ina ua taunuu atu i le sela, e le o i ai Lefatia i totonu.

E lei umi ae toe maua mai le latou telefoni mai ia Lomu fai mai, e tuu le siakiina o le nofoaga o loo i ai Lefatia, ae amata mai le siakiina o pagota i le Fale o le Alpha Unit. E lei umi ona latou faitauina pagota i totonu o le Alpha Unit, e toe vili atu Lomu, e toe o i le Bravo Unit e toe siaki poo i ai Lefatia.

Na taua e Kuka e fa’apea, ina ua latou toe aga’i atu i le Bravo Unit, sa latou vaaia ai Lefatia o loo nofonofo mai totonu o le potu a le ali’i pagota o Isumu.

Na taua e Kuka i lana molimau le vili atu o Lomu ma faatonu le ali’i Supavaisa ia Koonwaiyou, ina ia faatonu Lefatia e sauni o lea ua aga’i mai Leoleo e siaki lona sela, ma ia aveese uma lava ni mea e ono maua e Leoleo mai totonu o le sela.

O le taimi fo’i lea na talo ai loa e Lomu se fonotaga faatopetope a lana Sifi i totonu o le Ofisa o le Falepuipui, ma ia faatonuina ai i latou ina ia tumau i le faamatalaga e tasi lea ua latou malilie i ai, sa i ai lava Lefatia i totonu o le sela i le taimi na siaki atu ai o ia.

Na fesili le loia a le malo ia Kuka pe sa i ai Lefatia i totonu o le sela i le taimi na latou aga’i atu ai ma siaki, ina ua faatoa mae’a lava ona faatonuina i latou e Lomu. Na tali le molimau, e lei i ai Lefatia i totonu o le sela i le taimi na latou siakiina ai.

O le isi Leoleo na valaau e le malo, o le tama’ita’i Leoleo Satini ia Sgt. Devon Mata’u, o ia lea sa faauluulu i ai le suesueina o lenei mataupu ina ua faatoa alia’e mai, mulimuli ane ai loa tuuina atu le mataupu e taulimaina e le vaega a le Vice & Narcotics Unit.

O Sgt. Matau ma isi Leoleo na aga’i e saili totonu o le sela lea na loka ai Lefatia, mo le tau sailia o ni mea faamaonia e mafai ai ona fesoota’i o ia i le fa’alavelave sa tula’i mai.

Na taua e Sgt. Matau e faapea, i lalo o le moega a Lefatia, sa latou maua i ai se apa e tuu ai lavalava ua sauni e ave e tata. I totonu o lea apa sa latou maua i ai ofu ia sa faamatala mai e molimau i Leone, sa ofu ai le tagata na fanaina Senio.

Na maua e Leoleo lavalava nei o loo nana i totonu o le apa lavalava, o lo o susu fo’i e foliga mai faatoa uma lava ona fa’aaoga.

O le itula e 9:00 i le taeao nei lea ua faamoemoe e toe fa’aauau ai lenei mataupu.