Vala’au e se alii ia leoleo ina ua fiu e fa’afilemu le latou ‘ona

Pago Pago - AMERIKA SAMOA

O le 12:30 i le po o Mati 19, 2025, na valaau atu ai se alii i le ofisa a leoleo i Fagatogo, mo se fesoasoani, ona ua fiu e fa’afilemu sona uso i le tulafono o lo’o fa’apisa i totonu o le latou aiga.

Ina o agai atu leoleo i le nofoaga na tupu ai le fa’alavelave, sa fa’asino ifo e le alii na vala’au i leoleo, ia se alii e suafa ia John Matagilelei, sa mulimuli atu ia te ia, ma se ‘pipe wrench’ sa ia u’uina i lona lima.

O le taimi lava na iloa mai ai e Matagilelei ia le o’o atu a leoleo, sa faapea ona ia tamo’e agai i lalo o le a’ega na o latou iai.

Na tuliloaina mai o ia e leoleo, ae se’e Matagilelei ma ta’atia i lona papatua.  Ina ua o’o atu iai leoleo, sa o latou fesiligia le na molia pe o manaomia ia le EMS, ae musu le alii ma amata ona palauvale mai i leoleo.

A’o taumafai leoleo e fa’atu le na molia, i luga ma loka ona lima, sa taumafai le na molia e u’una’i ‘ese ia leoleo ma avea ai ma auala na toe si’i ai le na molia, agai i lalo o le a’ega.  E toe taunu’u atu leoleo i tafatafa o le na molia, o lo’o taliaga mai ma moeiini ona mata.

Na fiu leoleo e fafagu i luga ia le na molia ma loka ona lima, ae na toe te’i ifo i luga le alii ma amata ona toe palauvale i leoleo.

Sa faafaigata ona faatinoina tiute a leoleo, ae peitai, sa fa’aauau pea ona fa’afitauli le na molia ma ia fa’ailoa atu foi i leoleo, ua lavea lona vae ma e le mafai ona tu i luga.  

Ina ua toe fesiligia o ia e leoleo po o mana’omia le auaunaga a le EMS, sa faapea loa ona ioe le alii na molia.

Sa faapea loa ona taumafai leoleo e si’i le alii na molia, agai i luga o le a’ega ae peitai, sa fa’aauau pea ona fa’afitauli le alii na molia, ma ia taumafai e toso i lalo leoleo ma fai mai ua le mafai ona savali.

A’o si’i atu o ia e leoleo i luga o le a’ega, sa fa’aauau ona ia lu’iina leoleo e latou te fufusu ma palauvale leotele i leoleo.

Na i’u ina taunu’u leoleo ma le alii i luga o le a’ega ma tu’uina o ia i totonu o le ta’avale a leoleo ma aveina atu loa le na molia, i le ofisa a leoleo i Fagatogo mo le fa’aauauina o su’esu’ega a leoleo.

Ae i le taimi na agai atu ai leoleo ma le na molia i totonu o le ta’avale, sa sogia e leoleo le manogi pia o le na molia, faatasi ai ma le mumu o ona mata ma le fa’atosotoso o lana tautala.  Ae le tu’u ai lava le palauvale i leoleo.

I le fa’atalanoaga a leoleo ma le na a’afia, sa ia ta’ua ai le fai o se latou inuga ma taumafataga ma le na molia.  Ae peitai, ina ua ita le na molia i se tama matua e latou te nonofo faatasi, sa ia alu loa i totonu o lona potu ma loka, ma fai sana malologa.

Ae o sina taimi mulimuli ane na ia fa’alogo mai o lo’o ‘e’e atu le na molia, i fafo o lona potu ma tu’itu’i lana faitoto’a.  Ina ua ia tatalaina le faitoto’a sa ia va’aia le tu o le na molia ma se ‘pipe wrench’.

 Sa ta’ua e le alii na a’afia lona oso mai i fafo ma taumafai e ave’ese le paipa mai ia Matagilelei (le na molia) ae ina ua mafai ona ia ave’esea le paipa mai i le na molia, sa alu ma aumai se samala ma amata ona fa’aleagaina meafale i totonu o le fale.

O le mea lea na valaau ai loa le ofisa a leoleo mo se fesoasoani.  Ma e taunu’u leoleo, o lo’o fa’aauau ona ‘e’e ma palauvale solo le na molia.

O moliaga na faia faasaga i le na molia, na aofia ai le Faatupu Vevesi i totonu o nofoaga faitele ma le Tete’e i leoleo a’o latou taumafai e ave faapagota o ia.

O le moliaga o le faatupu vevesi, o se vaega ‘B’ i solitulafono mama, e mafai ona nofosala ai i le ono masina, po o se sala tupe e $500; po o fa’asalaga uma e lua.

O le moliaga o le tete’e i leoleo, o se vaega ‘A’ i solitulafono mama, e mafai ona nofosala ai i le tausaga atoa, po o se sala tupe e $1,000; po o faasalaga uma e lua.

E $1,000 na fa’atulagaina mo le tatalaina o le na molia, e faatalitali ai lona fa’amasinoga.