"VAILOA UA TASI”: LELEIGA AFIOAGA, 88 TAUSAGA AUFAIPESE EFKAS & FA'AMAVAE MA LE FA'AFEAGAIGA

E moni fuaitau o le Tusi Sa, "E mana'omia ni Toa e tetele o latou loto, latou te tu'ufa'atasia loto ma agaga," ina ua toe tasi le leleiga i le afio'aga o Vailoa i le taimi nei.

E afua i le aso Faraile na toe fa'aa'e ai le tofa le Faletolu Fa'aua'a Kateferu Elisara, ina ua mae'a soalaupule le afioga le Alo o Salamasina Satele Galu Satele ma ali'i ma faipule o le afio'aga e fa'atino lea tulaga, ua toe ala usu Vailoa i le taeao o le leleiga.

Na mua'i saili tofa fo'i le tofa Fa'aua'a, i le afioga Satele, aua o lo ua tuana'i taimi o le eseese o taofi ma lagona ae ua lafoia ata o le malama ma le fa'amoemoe fou, ua le o toe umi fo'i se mafutaga ma le susuga le Fa'afeagaiga malolo i le pesnisione Rev Faletoi Lagoo ma le faletua ia Violina.

Ina ua logotala le afio'aga le aso o le feiloa'iga ma le tofa le Faletolu ma le pa'ia o Aiga i ona itunalua, sa leai se toe leo na lagavale, ua alaga tagata uma i le fiafia aua, ua loa ona manatu le afio'aga i se taeao e toe tasi ai le afio'aga i lana pulega fa'alenu'u e masani ai.

"O le ala lea o le lagona o se leo fiafia tele, aua e le o nisi, o uso moni ma aiga, ua loa fo'i o soifua fa'atasi mai, ae o le pulega a Matai ma Faipule o se mea e le mafai ona ave'esea mai le toto ma a'ano o tagata Samoa. O le lagona o le fa'afetai tele ina ua tafa fo'i le tofa loloto ma le fa'autaga i lana afioga le Alo o Salamasina, lafo atu fo'i i le saofaiga o le afio'aga atoa, ua tasi moemoe lava i le leleiga ua toe fa'aa'e nei i le mea e afio ai le afioga le Alo o Salamasina Satele, afifio ai Alo o Fanene, susu Sa'o ma le Aiga Sa Tuiasina, ae mamalu mai le Fetalaiga i le Faletolu ma le Falealili,” o se tala lea a Fa'aua'a.

Ina ua soalaupule le saofaiga a le Afio'aga ma le afioga i le Alo o Salamasina mo le fa'amoemoe o le Faletolu, o le avanoa lelei fo'i lea sa tasi moemoe ai le latou tofa, ina ia fa'alelei le afio'aga ma lana Feagaiga Tau i le Lagi o le a tu'ua le Ekalesia, lea ua atoa lelei le 46 tausaga o la'ua galulue ai ma le faletua ma le fanau.

"O le leleiga ma le Auauna a le Atua, o le iloa fo'i lea e le afio'aga o lona Atua, lea e fai ma Ulu o le Ekalesia ma le Talalelei o lo'o tala'ina mai. O le ala lea o le toe masi'i atoa o le afio'aga i le Maota o le Galeuga mo le Leleiga. Pe afai fo'i e tu'ua le galuega e lana auauna, e mana'omia e le afio'aga o fa'amanuiaga mai ia te ia,” o se tala mai lea a se tasi o le sui totino o le Ekalesia.

O'o ane i le sauniga o le Aso Sa, ua fa'atautaia ai le sauniga fa'apitoa e atoa i ai le 88 tausaga talu ona fa'atuina mai le Aufaipese EFKAS i Vailoa.

"O lenei se isi matatia e fua i ai le nofo tapua'i ma vi'ia le Atua i le afio'aga, o le fa'aaogaina tatau o le siufofoga e lagi ai vi'iga o le Atua i ona sauniga fa'atasia i vaiaso ta'itasi, po'o afiafi ta'itasi fa'aleaiga. Lea ua tula'i mai, o le atoaga o le 88 tausaga o fa'atuina le aufaipese a le afio'aga i le Ekalesia Lonetona Misionare Sosaiete mai le amataga, soso'o lea ina suia i le Ekalesia Fa'apotopotoga Kerisiano i Samoa, ae muliga ai ina tau'avea nei le Ekalesia Fa'apotopotoga Kerisiano i Amerika Samoa nei,” o se tala lea a Rev. Uso.

I lea sauniga sa fa'atautaia i le taeao o le aso Sa, ma sa auai atu fo'i le afioga le Alo o Salamasina ma toe nofoia lona nofoa i le malumalu i Vailoa.

Na solo mai i totonu le aufaipese ma le latou toniga elei auro ma le pa'epa'e e fa'ailoa ai o latou lagona fa'aauro aua, ua fiafia itufale uma o le malumalu e o'o i o latou loto. Na fa'atumulia le malumalu i le mamalu na auai i le sauniga ma sa tapena lelei fo'i vi'iga o le Atua na taina lea e le afioga Tuiasina Salamo Laumoli, o se tapese ua leva a le aufaipese, ae ua toe toto'o nei e fa'aauau le taleni.

O suiga tofi fo'i o le Aufaipese sa tolaulauina mo le tausaga fou e galulue atu ai e afua i le mae'a ai o le sauniga ma le to'ona'i na fa'atautaia mo le ekalesia.

O i latou ua tofia nei mo le laulauatofi mo lenei tausaga: Taitaipese o le susuga Seumalo Sofa Seumalo; Sui Taitaipese o Fualau Sarasopa; Failautusi o Ferila Alapasa Seumalo ma le Teutupe o Penelope Lopa.

O le latou taulaga na maua i le foa'i lautele a le Ekalesia mo le latou fa'amoemoe fa'atasi ai ma latou lava taulaga mo i latou i totonu o le aufaipese e tusia ai latou suafa i lenei tausaga, o le aotelega e $1,855 na aoina i le taimi o le sauniga i le taeao lava o le aso Sa. O le latou faimeaalofa na taua'aoina mo Rev. Uso e $2,000.

Ona o le toe sauniga lea na lauga Rev. Uso i lana ekalesia,ua tu'ufa'atasia ai fo'i e le ekalesia le latou faigameaalofa e $13,450. Meaalofa tu'ufa'atasia a le auaiga Sa Seumalo e $3,000.

I lana toe lauga sa ia fa'ailoa ai lona agaga fa'afetai tele, "Vailoa fa'afetai. Fa'afetai i lo outou tausi feagaiga ma le aiga! Fa'afetai i lo outou manatu i le galuega a le Atua sa ma'ua galulue ai ma le fanau. E ui ina tele sasi o i ma'ua ma le fanau, sa outou tali i le fa'amagalo ma le alofa i aso uma, ona o lo outou tepa i le Atua ma lana galuega."

O ana toe upu fo'i sa ia fagaina ai lana ekalesia sa ia fa'apea ai, "Afai ou te tu'ua lenei galuega i Vailoa, aua ne'i galo ia te outou, ia outou pepese i vi'iga o le Atua, aua lava ne'i galo lo outou pepese, ia i ai o outou leo i lea aso ma lea aso, ia tele ai vi'iga o le Atua."

I le to'ona'i fiafia sa talisua fa'atasi le afio'aga, o le ekalesia ae maise o le matuatala sa se'ei ai lana afioga le Alo o Salamasina ma le isi tala na atoa na sasao ai Rev. Uso ma le faletua, ae o le Aufaipese sa latou va'aia le la'oa'i matagofie mo le aotelega o le Ekalesia ma le afio'aga ma latou vala'aulia sa latou osi taulaga fa'atasi.