U’una’ia le faia o tui pupuia mo le tale vivini

Pago Pago - AMERIKA SAMOA

I se fa’aaliga taua mai i le alii polofesa o le soifua maloloina, i le Iunivesite i Aukilani, o Sir Collin Tukuitonga, ua faapea ona u’una’ia ai tagatanu’u o le Pasefika, ina ia faia tui puipuia o le faama’i o le tale vivini.

Ua mafua le fa’aaliga a Sir Tukuitonga, ona ua fa’alauiloa mai i le vaiaso ua mavae, e le ofisa o le soifua maloloina i Niu Sila, le pepesi o lenei faama’i i totonu o Niu Silia, ina ua o’o atu le fuainumera o tagata gasegase i le 260, i le fa vaiaso ua tuanai atu.

Sa fa’aalia e Sir Tukuitonga, e tusa ai ma fuainumera ma faamaumauga vaaia, e 28 pasene o tagata taofia i le falemai ona o lenei gasegase, o tagata Pasefika.

Ma o se fuainumera pito sili ona maualuga lea i tagata Pasefika ua taofia i le falemai ma o sana fautuaga, ia faia nei loa tui puipuia mo lenei faama’i.

O le amataga foi o lenei masina, sa faapea ona taofia ai se pepe e na o le fitu vaiaso, ua a’afia i lenei faama’i, talu ai e le’i faia sona tui puipuia o le tale vivini.  Ae ua fa’aalia mai le fa’asolosolo manuia o sia alo.

Sa ta’ua e Sir Tukuitonga, e le o mailoa mai i le taimi nei po o fea lea sa amata mai ai ona pepesi lenei faama’i ae e leai se faamaoniga na amata mai i totonu o Niu Sila.

Ae ui i lea, ua avea ma se faapopolega ia te ia.