Ua le sainia kovana pili a le Fono Faitulafono mo le Fa’aputuga Tupe o le Litaea

Pago Pago - AMERIKA SAMOA

O le amataga o le vaiaso lenei sa fa’ailoa ai e le afioga i le Kovana Sili, Lemanu Peleti Mauga, i ta’ita’i o le Fono Faitulafono, lana fa’aiuga e le sainia le pili sa pasia e le Fono e si’i ai tupe totogi e le malo ma totino o le litaea i le Fa’aputuga Tupe o le Litaea. 

Ae le’i tapunia ia Setema 17,  le tau aofiaga Lona Lua a le Nofoaiga Lona 37 a le Fono Faitulafono, sa pasi ai e le Maota Maualuga ma le Maota o Sui le pili a le Senate e si’i ai le tupe lafo a le malo ma le tupe totogi a totino o le Litaea i le Teugatupe o le Litaea. 

O le pili o lo’o fa’ailoa ai le fa’aopoopo o le 3% i le 8 pasene o tupe lafo a le malo i le teugatupe. Mo totino o le litaea, e si’i mai i le 3 pasene i le 5 pasene. 

I sana tusi i le aso 8 o Novema, sa fa’amalamalama ai e Lemanu i  le Peresitene o le Maota Maualuga ma le Fofoga Fetalai o le Maota o Sui, lana fa’aiuga e na te le sainia le pili e pei ona pasia e le Fono. 

Ma sa fa’ailoa foi e le kovana i ta’ita’i o le Fono Faitulafono nisi o mataupu o lo’o atugalu ai i lea pili a le Fono. Ma o se tasi o ia atugaluga, ona e leai se vaega o le pili e fa’ailoa ai le vaega tupe e fa’atupeina ai le si’itaga o le tupe lafo e le malo i le Teugatupe o le Litaea. ‘

Ua le gata i lea, o si’itaga mo le malo ma totino o le Litaea, ua fai lava sina maualuga, ma fa’ailoa e le kovana lona manaoga ina ia na o le tasi le pasene le si’itaga. 

Ua i ai le fa’amoemoega o le afioga i le kovana sili, e fa’atulaga se pili taufa’aofi mai le Vaega Fa’amalosi Tulafono mo le siitaga o tupe totogi i le Litaea ma ua ia talosagaina ta’ita’i o le Fono e latou te galulue fa’atasi i lenei mataupu. 

O  le masina o Aperila o le tausaga lenei sa teena ai e le afioga i le kovana sili, se isi fo’i pili pasia e le Fono Faitulafono i lenei lava mataupu, ma ia fa’ailoa ai foi i ta’ita’i o le Fono mafuaga lava nei e tasi, e aofia ai le maualuga tele o le si’itaga ma e leai se vaega tupe e fa’atupeina ai le totogi fa’aopoopo a le malo i le Litaea. 

Ae maise naunautaiga a le faigamalo mo le si’itaga e na o le tasi le pasene.