Tu’umalo le Afioga i le Tama Pa’ia Pope Faranisisi

“O ia o se Tama Pa’ia mo tagata uma”

O le aso Sa o le Eseta na se’i mavae atu nei, sa auai atu ai le Tama Pa’ia, le ta’ita’i o le Ekalesia Katoliko, le Afioga ia Pope Faranisisi i lana Misasa mulimuli, ae e le’i o’o mai le vala’au pa’ia a le Atua ia te ia.

Sa molimauina e le to’atele le vaivai o lona siufofoga, ae e ui i lea, sa mafai ona ia tu’uina sana fa’amanuiaga i le ‘au faatuatua na mafai ona auai atu i le Misasa o le Eseta i le malumalu a le Sagato Peteru, i le nofoaga lava e tasi, lea na fa’alauiloa atu ai Jorge Mario Bergoglio, i le lalolagi, ia Mati 13, 2013, e avea ma le Pope lona 266.

I se fe’au fa’amafanafana mai i le afioga i le Epikopo Kolio Etuale mo le Pule’aga a Samoa-Pago Pago ma tagata uma o Amerika Samoa, sa ia ta’ua ai e faapea, “O Pope Faranisisi o se auauna moni a le Atua, aua o ia o se Tama Pa’ia mo tagata uma.  Sa fo’ai lona soifua e molimau i le lotomaualalo, le atamai ma le fa’atuatua malosi.”

“O ana saunoaga o se malamalama lava i o tatou ala, o ana fa’ata’ita’iga e fa’amanatu mai ai ia i tatou le fe’au tau’ave a Keriso e pei ona valaauina i tatou e alofa ma auauna atu, ma ave le fa’amoemoe i tagata uma,” o le saunoa mai lea a le afioga ia Epikopo Etuale.

Ma ia fa’amafanafana mai e faapea, “I nei taimi o fa’anoanoaga, ia tatou maopopo faatasi o le Tino e tasi lava o Keriso, ia tatou tatalo ai ma Lona agaga, ma se fa’amafanafana foi mo i tatou uma ua faanoanoa.”

Sa ia apoapoa’i mai ai foi, ina ia mauaina le “agaga e tau’ave ma savavali ai pea i le malamalama o ana a’oa’oga e pei ona fa’avae mai i le fa’atuatua ma le alofa.”

I toe upu a le afioga i le Epikopo, sa ia talosagaina ai le Alii ina ia “foa’i atu i lana Afioga Pope Faranisisi le mapusaga e fa’avavau.  Ia susulu foi Lou malamalama ia te ia, ea le tu e a le tu lava.  Ia mapu filemu o ia i ou a’ao.”

I se fa’asoa mai a le Afioga i le Akiepikopo Mosese Vitolio Tui, e pei ona sa faasalalauina e le vaega fa’asalalau a le Radio Samoa, sa saunoa ai le afioga i le Akiepikopo, e ui ina o se tala fa’anoanoa, ae o se agaga fa’afetai ona ua mafai ona malolo mai le afioga i le Tama Pa’ia mai tiga o le tino, ona ua leva ona gasegase o ia.

Na saunoa le afioga i le Akiepikopo, “O le loto lava na fai ai le galuega, ae i le lima tausaga mulimuli, oka se gasegase ona ua matua le toeaina.  E to lo ta pulou i le Tama Pa’ia, i le finau.”

Sa faaluaina foi e le afioga i le Akiepikopo, le saunoaga a le afioga i le Epikopo Etuale, i le fa’aigoaina o Pope Faranisisi, o le “Tama Pa’ia mo tagata uma.”  Ona e le gata i le Aiga Kerisiano, ae sa faapea ona o’o atu lana auaunaga i tagata o isi talitonuga.

“Sa ia opogi (embrace) e le toeaina, e le na’o le aiga Kerisiano.  E o’o foi i atunu’u e le’i o’o iai [le ekalesia] Pope, ua alu iai Pope Francis,” o le tomanatunatu lea a le afioga i le Akiepikopo.

I le fa’asoa mai fo a le afioga ia Uifa’atali Amata, le sui Faipule a Amerika Samoa i Uasigitone, sa ia ta’ua ai le a’afia o le to’atele o le lalolagi i le tu’umalo a le afioga i le Tama Pa’ia.  

Sa ia fa’aalia lona agaga faanoanoa i le o’o mai o le vala’au pa’ia i lana Afioga, ae peitai, sa ta’ua e Uifa’atali lona agaga faafetai mo le tele o tausaga o le soifuaga a le Tama Pa’ia, ma lana taitaiga, a’o ia mataituina ia taumafaiga a le ekalesia i le lalolagi atoa, e le gata i tapuaiga, ae faapea galuega fesoasoani ma a’oa’oga.

Sa ta’ua foi e Uifa’atali e faapea, o le a sau se taimi, o le a tusia ni tusi e tusa ai ma le soifuaga a le afioga ia Pope Faranisisi, i mea sa mafai ona ia ausia, aemaise o lona alofa i tagata uma o le lalolagi o lo’o feagai ma puapuaga.

Ae mo le taimi nei, e na’o le agaga fa’afetai mo ia, ma auai fa’atasi ma le faitau miliona o aiga Katoliko, i lenei taimi faanoanoa.  

O le afioga ia Pope Faranisisi, sa soifua mai o Jorge Mario Bergoglio, ma sa ia filifilia le suafa o Sagato Faranisisi mai Assisi, e na te fa’ataunu’uina ai le galuega a le Alii, o le fesoasoani atu lea i tagata matitiva ma le tagolima.