Tu’uaia se ali’i umia faasolitulafono o se laau malosi ma fualaau faasaina

Pago Pago - AMERIKA SAMOA

O le masina na te’a nei na taofia faapagota ai e Leoleo se ali’i mai Futiga ma ua molia nei i le tulafono i lona umia faasolitulafono o se aupega malosi atoa ai ma vaega o fualaau faasaina o le aisa ma le mariuana. O tu’uaiga faasaga i le susuga a Taylor Mareko na mafua mai i se faalavelave na tu’uaia ai o ia i lona faaoolima i se isi ali’i, ae ina ua pu’e faapagota e Leoleo o ia, na alia’e ai loa ma isi tu’uaiga faasolitualfono. O le masina na te’a nei na tula’i ai le susuga a Taylor Mareko i luma o le Faamasinoga Faaitumalo mo le ulua’i taimi ma tuuina atu ai lana tali tete’e i tu’uaiga a le malo fa’asaga ia te ia. E 2 tagi eseese ua failla e le malo faasaga i le susuga a Ameko. 

I le tagi muamua, ua tu’uaia ai o ia i moliaga mamafa e 4 e aofia ai le moliaga mamafa o le Faaoolima i le tulaga muamua, o le vaega A lea o solitulafono mamafa, lea e mafai ona faasala ai se tasi i le Toese mai le 10 e oo atu i le 30 tausaga, poo le faasala foi i le olaga atoa; faapea ai ma le moliaga e tasi o le faaleaga meatotino i le tulaga muamua, tali le moliaga o le umia faasolitulafono o se laau malosi, faapea ai ma le moliaga e tasi o le tete’e atu i Leoleo a o taumafai e pu’e faapagota o ia, o le vaega D lea o solitulafono mamafa, lea e mafai ona faasala ai se tasi i le Toese mo le umi e le silia i le 5 tausaga, pe faasala i le salatupe e le siliai le $5,000, poo le faasala foi i faasalaga uma ia e lua.

I le tagi lona 2 faasaga ia Mareko, ua tu’uaia ai o ia i le solitulafono o le umia o fualaau faasaina o le aisa, faapea ai ma le moliaga o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mo le umi e le itiiti ifo i le 5 tausaga ae le sili atu i le 10 tausaga, pe faasala foi i le salatupe e le silia i le $20,000, poo le faasala foi i faasalaga uma ia e 2.

E $35,000 le vaega tupe lea ua faatulaga e le Faamasinoga e tatala ai Mareko i tua mai le Toese i Tafuna.

Afai ae mafai ona tatala o ia i tua, ua poloaina o ia ina ia aua ne’i toe taumafai e faafesootai alii e to’atolu o loo aafia i lenei mataupu, poo nisi fo’i o molimau a le malo. E le tatau ona ia toe umia soo se laau malosi, pe taumafai fo’i e faatupu se vevesi i le va o ia ma i latou o loo aafia, a ia avea o ia ma tagatanu’u lelei e tausisi i tulafono uma a le malo.

TAGI A LE MALO

O le aoauli o le aso 11 o Aperila na te’a nei pe tusa o le itula e 2:54, na tula’i mai ai se faalavelave i Leone e aafia ai se laau malosi, lea fo’i na mafai ona tali atu i ai Leoleo. Na taua e le malo i le latou tagi e faapea, i le taimi o le aoauli e pei ona taua, e fetaui lava le ta’amilo atu o se ta’avale a Leoleo i se vaega o Leone, ae faalogoina loa e Leoleo se leo e foliga mai o le pa o se laau malosi. 

Na uma le leo sa faalogoina e Leoleo ae latou faalogoina loa leo o tagata o loo pisapisao ma laulau vavale. Na mafai ona iloa atu e Leoleo i se tasi o auala e aga’i i totonu o Leone ni se ta’avale e 2 o lo o tutu mai ai, atoa ai ma se tagata o loo leoleoa ma tusitusi solo lona lima i le ave ta’avale o le isi ta’avale. 

Na liliu le ta’avale a Leoleo ma aga’i atu loa i le nofoaga lea o loo latou vaaia ai ta’avale e 2 o lo o paka mai ai. 

E fetaui lava le taunu’u atu o le ta’avale a Leoleo ae latou vaaia loa se ali’i ua savali ese mai i le ta’avale lea na tu ma tusi tusi solo ai lona lima, ma aga’i atu i lana pikiapu lanu mumu o lo o paka i le isi itu o le auala e le mamao ese mai i le auala tele a le malo. 

Na fesili Leoleo i le ali’i lea ua savali ese mai pe i ai se mea o tupu, ae sa lei tautala le ali’i lea. Ina ua toe fesili Leoleo i le ali’i lea poo i ai se mea o tupu, na faliu le ali’i lea leotele atu i Leoleo ma fesiligia le mafua’aga ua latou soli ai le fanua. 

Na savali sa’o atu lava le ali’i lea ma oso loa i totonu o le ta’avale pikiapu lanu uliuli lea o lo o paka mai i le isi itu e le mamao lava mai le vaega lea o loo paka ai le ta’avale a Leoleo.

Na taumafai Leoleo e saili se faamatalaga i le faalavelave o loo tula’i mai, ma manino ai i molimau mai tagata sa i ai i le taimi, o le ali’i ua alu ese atu ma lana ta’avale, o ia lea sa faapaina le laau malosi, ina ua mae’a ona faaoolima i le alii lea o loo nofo mai i totonu o lana ta’avale.

O le ali’i ua alu ese atu i lana ta’avale na iloa mulimuli ane, o Taylor Mareko lea, o ia fo’i lea o loo molia i lenei mataupu.

O le taimi lava na maua ai e Leoleo le faamatalaga mai molimau, na toe faliu ai loa le latou ta’avale ma tuliloa le ta’avale a Mareko ua alu ese atu ma taofi mai ai o ia i luma o le auala e aga’i i Malaeloa, ma faatonuina ai loa o ia e sau i fafo ma le ta’avale.

Na toe faaola e Mareko lana ta’avale ma fa’aauau atu ai lava i le itu i sasa’e o le alatele.

Na tuli oso Leoleo i le latou ta’avale ma latou tuliloa atu loa le ta’avale a Mareko, ae o le taimi fo’i lea na latou talosagaina ai loa le Ofisa autu o Leoleo i Fagatogo mo se  fesoasoani, ona o lea ua taua le faaaupegaina o le susuga a Aniseko.

Na aga’i atu le taavale a le alii ua molia ma tu i luma o le isi faleoloa i Leone, ma vaaia ai e Leoleo se alii talavou ua savali mai ma oso i totonu o le ta’avale, ma fa’aauau atu ai loa le ta’avale a Mareko i le auala o loo aga’i atu i le nofoaga o lo o i ai fale mautotogi a nisi o aiga faipisinisi i lea nofoaga.

E le i tu le taavale a le alii uam olia ae sa faaauau pea ona aga’i atu i le vaega pogisa o le auala, ma manatu ai loa Leoleo e toe fo’i mai le latou tuliloaga, ona o le puipui lava i lo latou saogalemu, ae latou toe aga’i atu loa i le vaega na tula’i mai ai le fa’alavelave, ma latou aga’i sa’o atu ai loa i le fale a le alii na aafia i lenei mataupu.

Na taua e le alii na aafia i Leoleo, e to’atolu i latou sa i totonu o lana ta’avale, o ia ma ana uo e to’alua. O ia na sauni e momoli ana uo e to’alua i o la aiga faatoa mae’a le latou ta’avale i lona fale.

A o aga’i malie mai le latou ta’avale mai le auala o lona fale e aga’i mai i le aualatele a le malo, na faafuase’i ona latou vaaia le aga’i atu o se ta’avale ma taia le pito i tua o lana ta’avale. Sa i ai lona manatu atonu e faaletonu taofi o le ta’avale, peita’i na faateia o ia ina ua toe solomuli mai le pikiapu lava lea ma toe taia le isi itu o lana ta’avale. 

Na faasolomuli i tua lana ta’avale ona ia valaau atu lea i le ave ta’avale poo ‘okay’ o ia, ae na faateia o ia ina ua ia vaaia, o le ave ta’avale o le ta’avale, o le ali’i o Mareko.

Na taua e le alii na aafia i Leoleo e faapea, o le taimi lea na ia vaaia ai loa Mareko ua oso i fafo ma lana taavale ae savali sa’o atu i le latou ta’avale ma ona lima e tofu ma le fana o loo ta’i sa’o atu lava ia te ia. Na ona oo atu lava o Ameko i luma o lana ta’avale, fana atu loa e Mareko o ia i le fana, peita’i na alo ma pisi ai le pulu fana ma lona ulu, ae afaina ai le tioata pito i tua o lana ta’avale. 

Na sosoo le faapa o le fana ma le avaavau atu o Mareko ia te ia ma fai atu, pe aisea ua ia taumafai ai e seki o ia. O le taimi lava fo’i lea na ia vaaia ai loa le ta’avale a Leoleo ua aga’i atu i le vaega o loo tula’i mai ai le faalavelave.

Na fesiligia e Leoleo ali’i e to’alua sa i ai i totonu o le ta’avale a le alii na aafia, ma la faamaonia ai le molimau a le alii na aafia e tusa ai o le faalavelave na tula’i mai. Na taua e le isi ali’i i Leoleo e faapea, o le taimi lava na ia vaaia ai Ameko ua savali atu ae tofu ona lima ma le fana, na ia tatalaina ai le faitoto’a o le ta’avale ae alu i le atoa.

O le mae’a ai ona taulima e Leoleo o le tusi saisai mai le Faamasinoga, na latou aga’i atu ai loa ma pu’e faapagota mai le ua molia mai lona fale i le masina na ta’e nei. 

Ao lei auina atu le ua molia i le Ofisa o Leoleo i Tafuna mo isi suesuega, na saili e Leoleo lona tino poo i ai ni aupega mata’utia. I le taga o lona ofu na maua ai e Leoleo se paipa tioata o loo i ai vaega o le pauta pa’epa’e o le aisa. Sa maua ai fo’i e Leoleo ma ni sikaleti mariuana ua mae’a ona taai.

Ina ua fesiligia e Leoleo le ua molia e uiga i lenei mataupu atoa ai ma fualaau faasaina, na musu o ia e tuuina atu sana faamatalaga i Leoleo, ae na manatu o ia e faatali sei talanoa ma lana Loia Fautua.