Tu’uaia se ali’i i lona fasi fa’amo’amo’a o si ona to’alua

O le ali’i lea na tatala i tua e le fa’amasinoga fa’aitumalo i le aso Lua na te’a nei, i le mae’a ai lea o lona teena o tu’uaiga mama o le fa’ao’olima i le tulaga tolu fa’apea ai ma le fa’atupu vevesi i totonu o lona aiga, e mafua mai i le fa’alavelave lea na ia fasi fa’amo’amo’aina ai si ona faletua, ua toe taofia nei o ia ma tuu’aia e le malo i le moliaga mamafa o le fa’ao’olima i le tulaga lua.

O manu’a na a’afia ai le fafine e aofia ai le totolia o le tele o vaega o lona tino e aofia ai lona papatua, fa’apea ai ma ona foliga e tau le pupula uma ona mata e lua toe solouli atoa.

Sa i ai i totonu o le potu fa’amasino le fafine na a’afia, o lona uso ma lona Tama i le taimi na valaau ai le mataupu a le ali’i ua molia, peita’i ina ua tu’uina mai le poloaiga a le fa’amasinoga e tatala ai le ua molia e aunoa ma se tupe e totogi, sa molimauina e le Samoa News le lulu o le ulu o le fafine ma autilo i lona uso o loo la nonofo fa’atasi.

 O ni isi o tuutuuga na tu’uina atu e le afioga i le ali’i fa’amasino ia Fiti Sunia e tatala ai le ali’i ua molia, e le gata o le fa’asa lea ona ia toe taumafai e fa’afeso’ota’i lona to’alua, ae sa poloaina fo’i le fa’asa lea ona ia toe soli se tulafono.

O le aso 30 Ianuari i le itula e 12:00 lea na fa’atulaga e toe valaau ai le mataupu a le ali’i ua molia, i luma o le Fa’amasinoga o Aiga, Fualaau Fa’asaina ma le Avamalosi (FDA).

E talitonu le Samoa News, o le mae’a ai o le iloiloga a le ali’i ua molia i le aso Lua na te’a nei, na toe aga’i ai loa le fafine na a’afia i le Ofisa o Leoleo mo le toe fa’atalanoaina o le mataupu e tusa ai o le fa’alavelave sa tula’i mai, ma toe faia ai loa suiga i le ripoti a Leoleo e aofia ai ma le toe suia lea o le moliaga fa’asaga i le ali’i ua molia.

O le aso Lulu na te’a nei na sainia ai e le fa’amasinoga se poloaiga e pu’e fa’apagota mai ai le ua molia, ma toe tulai ai loa o ia i luma o le fa’amasinoga fa’aitumalo i le taeao ananafi, ma le tuutuuga se’i vagana ua totogi le $5,000 ona fa’atoa mafai lea ona tatala o ia i tua.

O lo o taua i fa’amaumauga a le fa’amasinoga le fa’aaoga e le ua molia o ona lima e ta tu’i ai foliga o lona to’alua ma manu’a tigaina ai o ia.

Na finau le loia a le ua molia ia Kate Hannaher i le fa’amasinoga mo se avanoa e fa’aitiitia ai le tupe lea ua fa’atulaga e tatala ai le ua molia i tua, peita’i na tete’e i ai le loia al e malo ia John Bengelly ona o ni isi o mafua’aga sa ia fa’ailoa i le fa’amasinoga.

Na taua e Bengelly e faapea, o le taimi lava na tatala ai i tua le ua molia i le aso Lua na te’a nei, na ia taumafai ai loa e toe fa’afeso’ota’i lona to’alua e ala i lona telefoni i ai. Na finau le loia a le malo e fa’apea, talu ai o le puipuiga i le saogalemu o le tina sa a’afia, e le tatau ai ona toe tatalaina le ua molia i tua mai le toese i Tafuna.

Na fa’ailoa fo’i e le malo i le fa’amasinoga le mae’a lea ona faila e le tina na a’afia o sana talosaga i le fa’amasinoga, mo se puipuiga fa’aletulafono mo ia ina ia le mafai ai e lona to’alua ona toe fa’afeso’ota’i o ia.

Ua talia e le fa’amasinoga le fa’afinauga a le malo ma poloaina ai loa le fa’atumauina o le tupe e tatala ai le ua molia i le aofa’i e $5,000. Ua toe fa’amalosia fo’i e le fa’amasinoga le poloaiga e fa’asa ai ona toe taumafai le ua molia e fa’afeso’ota’i lona to’alua i soo se auala e pei o le telefoni, poo le auina atu fo’i o se feau i se isi tagata ina ia oo atu ma logo lona to’alua.

O le itula e 8:30 i le taeao nei lea e toe tula’i ai le ua molia i luma o le fa’amasinoga, mo le fa’atulagaina o le aso e faia ai lana ulua’i iloiloga.