Tu’uaia se ali’i i lona faia uiga mataga i lona afafine moni

O le ali’i lea ua tu’uaia e le malo i lona taumafai e faia uiga mataga fa’afeusuaiga i lona afafine moni lava e 16 tausaga le matua, ua poloaina e le fa’amasinoga fa’aitumalo o ia ina ia aua ne’i ona toe taumafai e fa’afeso’ota’i lona afafine i soo se auala, ia saili fo’i se isi nofoaga e nofo ai, pe afai ae mafai ona tatala o ia i tua mai le toese i Tafuna.

O le mataupu lenei na tofu atu i le Ofisa o Leoleo i le fa’aiuga o le vaiaso na te’a nei, ina ua faila e le teineititi o lo o a’afia sana tagi i le Ofisa o Leoleo fa’asaga i lona Tama, i lona faia lea o uiga mataga ia te ia.

O le po o le aso 3 Aokuso 2016 e pei ona taua i fa’amaumauga a le fa’amasinoga o lo o tu’uaia na amata faia ai e le ua molia uiga mataga i lona afafine, ma fa’asolo atu ai lava i isi aso eseese i totonu lava o le masina lea o Aokuso, se’ia o o i le taimi na ta’u ai e le teineititi i Leoleo uiga a lona Tama o lo o fai ia te ia.

Na fa’ailoa e le teineititi na a’afia i Leoleo le muamua lea ula e lona tama vaega o le pauta oona o le aisa, a o le i alu atu e fa’atino uiga mataga ia te ia i totonu o lona potu, aemaise lava i taimi e le o i ai lona Tina i le fale.

Na taua e le teineititi i Leoleo e fa’apea, o po uma lava o aso Tofi pe a mae’a ona tu’u e lona Tina se tupe i lona Tama, na te vaaia ai lona Tama o lo o ia tutu le afi ma ula lana paipa o lo o i ai vaega o le pauta oona o le aisa i totonu o le latou fale taele.

O le mae’a ai ona ula o le paipa aisa a lona Tama, e alu atu ai loa i totonu o le potu o lo o moe ai ma fai atu uiga mataga ia te ia, e pei o le tago atu lea i ona vae, o lona fatafata fa’apea ai isi vaega o lona tino.

Na taua e le teineititi na a’afia i leoleo le po muamua na alu atu ai lona Tama i totonu o lona potu ma fai atu uiga mataga ia te ia, ina ua mae’a ona ula lana paipa i totonu o le latou fale taele. Sa ia taua atili i Leoleo lona fefe ina ua ia vaaia le savali atu o lona Tama i totonu o lona potu ma amata fa’atino uiga mataga ina ia fa’amalie ai lagona tu’inanau o lo o ia e te ia.

O le itu lelei ai e pei ona taua e le teineietiti i Leoleo, e le i fa’atasi ona tagofia e lona Tama lona itutinosa, e lei i ai fo’i se taimi na tula’i mai ai se mafutaga fa’a feusuaiga i le va o ia ma lona Tama.

O ni isi po na fa’ailoa e le teineititi i Leoleo na alu atu ai lona Tama ma fai atu uiga mataga ia te ia i totonu o le potu, e aofia ai le po o le aso 3, 11, 18 ma le 25 Aokuso, 2016.

Na taua e le teineititi na a’afia e fa’apea, i le po o le aso 18 Aokuso ina ua mae’a ona tu’u e lona Tina le tupe i lona Tama, na ia vaaia ai loa le tuua e lona Tama o le latou fale ae aga’i atu i le isi pitonu o le nu’u, ae i le leva o le po, na ia toe vaaia ai lona Tama ua toe fo’i mai i le fale, ma aga’i sa’o atu loa i totonu o le latou fale taele, ma ia vaaia ai loa le mumu mai o le afi ua tutu le paipa e ula ai aisa a lona Tama.

Na taua e le teineitiiti lona fefe ina ua ia vaaia le ua molia po o lona Tama fo’i lea ua ulufale atu i totonu o lona potu, i le mae’a ai lea ona ula o ana aisa i totonu o le latou fale taele, ma aga’i sa’o atu loa i lona moega ma tago atu ua milimili ona vae, ona o le manatu ina ia fa’amalie ai ona lagona tu’inanau, ae ina ua taumafai le ua molia e tago atu i ona itutinosa, sa ia fai i ai e soia.

O le taimi o le po pe a momoe le Tina ma lana fanau laiti, o le taimi lea na taua e le teineitiiti na a’afia i Leoleo e alu atu ai le ua molia i lona potu ma fai atu uiga mataga ia te ia. Sa ia musu fo’i e fa’amatala i se tasi lenei fa’alavelave, ona o lona fefe tele i folafolaga ua uma ona fai atu e lona Tama ia te ia, i lona fasiotia lea o lona Tina ma nai ona tei laiti pe afai ae ona ta’uina i se tasi uiga o lo o ia faia ia te ia.

E $20,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala o ia i tua mai le toese. Afai ae mafai ona tatala o ia i tua, ua fa’asa ona ia tagofia le ‘ava malosi po o vaega o fualaau fa’asaina, ua fa’asa fo’i ona ia taumafai e fa’afeso’ota’i lona afafine i so o se auala, afai fo’i la te fetaui i so o se nofoaga ma lona afafine, o lona tiute o le tula’i ma alu ese mai ai.

Ua poloaina e le fa’amasinoga le ua molia ina ia tuu’ina atu lona tusi folau e taofi e le malo, ina ia mautinoa ai e le mafai ona ia tuua le atunu’u i soo se taimi, a o fa’agasolo ai taualumaga o lana mataupu. Ua fa’asa fo’i ona ia taumafai e sola ese ma le atunu’u.

O le itula e 8:30 i le taeao nei lea ua fa’atulaga e toe tula’i ai le ua molia i luma o le fa’amasinoga, mo le fa’atulagaina lea o le aso e faia ai lana ulua’i iloiloga.