Tu’ua’ia se alii i lona fa’ao’olima i se Faifeau

Pago Pago - AMERIKA SAMOA

E tusa ai ma fa’amaumauga a le malo, o le aso 18 o Me, 2024 na fa’afeso’ota’i mai ai e se alii leoleo ia le Ofisa Leoleo i Tafuna, ma lipotia mai ai se alii o lo’o taofiofi e ana tuaoi se’ia o’o atu leoleo, ona o lo’o masalomia lona fa’ao’olima i le Faafeagaiga o le EFKAS i Faleniu.

Ina ua taunu’u leoleo i Faleniu, sa molimauina le taofiofi mai e tuaoi ia le susuga ia Afega Uaita ma sa faamatala e se molimau i leoleo, na tu’i e Uaita ia le Faafeagaiga o le Ekalesia EFKAS, a’o feagai ai ma ana asiasiga i lea taeao.

Na fa’amaonia e Uaita i leoleo lona faia o lea tulaga, e aunoa ma se mafua’aga.

O lea ua molia ai nei o ia i moliaga e lua;

Faitauga 1:  Faatupu Vevesi i nofoaga faitele – o se vaega ‘B’ o solitulafono mama, e mafai ona faafalepuipui ai se tasi i le ono (6) masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu – o se vaega ‘C’ o solitulafono mama, e mafai ona nofosala ai se tasi i aso e sefululima (15) po o se sala tupe e $300; po o faasalaga uma e lua.

E $500 le vaegatupe sa faatulagaina e mafai ona tatalaina ai le ua molia mai i le falepuipui e fa’atali ai lona faamasinoga.