Tuuaia John Schuster faia o gaoioiga tau fa’amata’u faasaga i le faipule mai Nu’uuli

Pago Pago - AMERIKA SAMOA

Ua molia e le malo se ali’i i le faia o gaoioiga tau fa’amatau faasaga i le faipule mai Nu’uuli, e pei ona tulai mai lea mataupu i le aso 3 o Iulai.

O lo’o faaalia i faamaumauga a le faamasinoga e faapea, i Mapusaga, o John Schuster o lo o tuuaia na faamata’u i le afioga i le faipule ia Tautoloitua Sauasetoa Ho Ching i lona faapea atu o le a ia susunuina lona fale ma ave se fana ma fana le aiga o Ho Ching.

O su’esu’ega fo’i na fa’ailoa mai ai, o se mataupu lenei o lo’o fa’aauau pea, e fa’afefe ai e Schuster ona tuaoi mai lea taimi i lea taimi. A’o le’i tula’i mai lenei fa’alavelave, sa tele ni telefoni na muamua atu e fa’apea, o Schuster o lo o tu’uaia i upu mataga fa’aSamoa ma sa ia fa’amata’u e tafana ona tuaoi, ma fa’alavelave ai tagata tuaoi.

O isi su’esu’ega na fa’aalia ai fo’i, na vili atu Schuster i le 911 ma talanoa ma se tasi o avefe’au (dispatcher), ma ia lafo atu upu masoa i se tasi o avefe’au i luga o le telefoni ma ta’ua ai o le a ia fanaina se tasi o avefe’au i se fana.

Fa’ailoa i le pepa tagi a le malo, na feiloai ai leoleo ma le afioga i le faipule, o ia lea na tuuina atu se faamatalaga puupuu i le mea na tupu, mulimuli ane na feiloai leoleo ma Schuster ma puʻeina o ia. 

I le taimi na taofia ai Schuster, sa ia musu e tuu ona lima i tua o lona tua i le tele o taimi ina ia mafai ona loka. Sa auina atu Schuster i le Ofisa o Leoleo i Tafuna mo le fa’agaioia o pepa ma fa’aauau ai loa i le taofia i le toese e fa’atali ai le isi iloiloga a le fa’amasinoga.

E tolu moliaga ua faila e le malo faasaga ia Schuster - le vevesi o le filemu lautele, fa’atupu vevesi, ma le tete’e atu i le pu’e fa’apagota. E $500 le tupe ua fa’atulaga e le fa’amasinoga mo Schuster.