Tuuaia faleoloa i le faatapulaaina o faatauga e mafai ai ona fa’aaoga ‘Credit Cards’

Pago Pago - AMERIKA SAMOA

Ona o le toatele o tagata o le atunuu ua fa’aalia lo latou le fiafia i faleoloa ona o le faatapulaaina o le aofaiga o faatauga, e mafai ai ona fa’aaoga ‘ATM’ po o ‘Credit Cards', o lea ua galue ai le afioga i le Faipule o le Tualauta, le susuga Larry Sanitoa, e saili se faamalamalamaga mai i le pulesili o le TBAS, ia David Buehler.

Ma ua avea foi lea tulaga ma mafuaaga ua amataina ai se suesuega a le Ofisa o lo o gafa ma le puipuia o aia tatau a tagata faatau, lea o lo o i lalo o le vaavaaiga a le ofisa a le Loia Sili, le susuga Fainu’ulelei Falefatu Alailima Utu.

O le aoauli o le Aso Gafua, na tusi atu ai Sanitoa ia Buehler ma ia fa’ailoa atu iai le faasea a nisi o lona itumalo ona o lea ua faatapulaaina e faleoloa, e seiloga e $10 pe silia atu foi le aofai o le faatauga e fai, ona fa’ato’a mafai lea ona fa’aaoga e le tagata faatau ia lana “ATM” po o lana ‘Credit Card”.

Sa ta’ua e Sanitoa, e tusa ai ma ala o le tulafono (merchant account agreement: Section 11), e matua faasaina ai so o kamupani ona faia lea tulaga.  Ma sa ia ta’ua foi se iloiloga a le Komiti o Fefaatauaiga a le Maota o Sui i le masina ua tuanai, lea na auai ai Buehler ma ia faaleoina ai lea lava tulaga e tasi, o le le faatapula’aia o le aofaiga o faatauga e mafai ai ona fa’aaoga ele tagata faatau lana ‘credit card’.

Ma sa toe faamanatu atu iai e Sanitoa ia Buehler sana saunoaga i lea lava iloiloga, ina ia ripoti atu so’o se kamupani po o faleoloa o lo o faia lea tulaga.

E lima ni faleoloa na ta’ua e Sanitoa, o lo o faia lea tulaga, ae ua o’o atu foi ripoti i le tele o isi faleoloa o lo o faia lea tulaga.

E ui ina o lo o nofo malamalama Samoa News i faleoloa nei e lima, ae peitai, o le a lomia igoa o nei faleoloa ona e le fou lea tulaga o lo o faia e faleoloa, ma e tele foi isi faleoloa i totonu o le teritori o lo o faamalosia lea tulaga.

I le lima tausaga ua tuanai, na fesiligia ai e le sui a le Samoa News ia se tasi o faleoloa o lo o faia lea tulaga, po o le a le mafuaaga, ae faamatala e le faatauoloa, ona o lo o iai se pili e totogi atu e faleoloa i le faletupe,  mo le faaaogaina o ‘ATM’ po o ‘credit cards’ ma o le mafuaaga lea ua o latou faamalosia ai le tatau i le tagata faatau ona silia ma le $10 lana faatau, ona fa’atoa mafai lea ona fa’aaoga a latou ‘credit cards’.

Sa fa’amanatu atu foi e Sanitoa ia Buehler, o le amataga o le tausaga na faatulaga ai e le Malo o Amerika Samoa ia le tu’usa’o o totogi uma a tagata faigaluega i totonu o le faletupe (direct deposit), ma ua avea lea ma mafuaaga ua faamalosia ai le tatalaina o tusitupe a tagata o le atunuu, i le TBAS.  Ma o le toatele o nei tagata faigaluega, e le tele se tupe maua mai i a latou totogi.

O lona uiga, i le faamalosia e faleoloa o lenei tulafono, ua faapea ona sii ai tupe alu a nisi, ae na o le $300 tala le tupe a le aiga o lo o tau faasoasoa mo le 2 vaiaso.

Sa mauaina foi e le Loia Sili se kopi o le tusi po o le imeli a Sanitoa lea sa aveina atu ia Buehler, ma i se tali vave mai a le Loia Sili, na faailoa mai ai le faaooina atu o lenei mataupu i le ofisa o lo o gafa ma le puipuia o aia tatau a tagata faatau, lea o lo o i lalo o le faatautaiga a Lynne Blakenbeker, mo sa latou suesuega.

E fia fa’ailoa atu foi e le Samoa News, e le na o ‘credit cards’ po o ‘ATM cards’ a le TBAS lea o lo o faamalosia ai lenei tulafono i faleoloa, e aofia uma ai isi ‘credit cards’ ma ua loa tausaga o faia lea tulaga. 

O lo o faamalosia foi e faleoloa, i so’o se tasi e faaaogaina sana siaki e fai ai sana faatau, e tatau ona 10% pe sili atu foi le aofaiga o le tupe fa’aalu i faatauga.