TU’UA’IA E SE FAFINE IA LONA ‘NEPHEW’ I LE GAOIA O LE ATO A LONA TOALUA

Pago Pago - AMERIKA SAMOA

O le aoauli o le aso 14 o Oketopa, na valaau atu ai se tina i le Ofisa a Leoleo i Tafuna, e ripotia atu ai lona ‘nephew’ i le gaoiga o se tupe a lona toalua.

Ua molia nei lenei alii i le Gaoi, o se vaega ‘A’ o solitulafono mama, e mafai ona nofosala ai i le tausaga atoa, po o se sala tupe e $1,000; po o faasalaga uma e lua.

Ae e $1,000 na faatulagaina e mafai ona tatalaina ai le ua molia, e faatalitali ai lona faamasinoga.

Sa faamatalaina e le tina na valaau i le ofisa a leoleo, ua ia masalomia le gaoia e lona ‘nephew’ o Timothy Asiasi, o se ato a lona to’alua, mai totonu o le latou pasi.

E taunu’u atu leoleo i le fale o le ulugalii, o lo’o saofa’i Asiasi i luga o le foloa o le fale, o lo’o saisai mai ona lima, ae ua fula lona muaulu ma lona mata taumatau.

Sa faamatalaina e le tina o Penny Siilima, lea na valaau i leoleo, na gaoia e Asiasi le ato mai i le pasi a lona to’alua, o lo’o iai se tusi folau Samoa, o se ID, o se vaegatupe e $50 ma le laisene avetaavale.  

Na faatalanoaina foi e leoleo seisi molimau ma na fesiligia o ia pe na faapefea ona manu’a foliga o le ua molia.  Sa faamatala e le molimau, ina o taofiofi e Andrew Hunkin ia le ua molia, sa pa’u ia le ua molia ma tau lona ulu i le foloa o le fale.

Ina ua faatalanoaina e leoleo ia Hunkin, sa ia faamatalaina e faapea, na manava atu ae faamatala ifo e lona toalua ia te ia, le gaoia e le ua molia, o lana ato.  Sa su’esu’eina e Hunkin ia le ua molia, ae peitai, sa fa’aauau pea ona ia pepelo.  Na ta’ua foi e Hunkin, ina ua ia taofiofia ia le ua molia, sa sulu ma pa’u ma tau ai ona foliga i le foloa o le fale.

Sa faamatalaina foi e Hunkin e faapea, a’o ia taumafai e loka lima a le ua molia, sa minoi solo ma mafua ai ona ma’osia lona ulu.

Ina ua su’esu’eina e leoleo ia la’ei ma le tino o le ua molia, na maua ai se pepa ta’ai o iai se vaega o fualaau faasaina, o mariuana.

 I le faamatalaga tusitusia a Hunkin, sa ia ta’ua ai lona manava atu mai i lana galuega, o se avepasi, ae alu atu le ua molia ma fesiligia o ia e uiga i se kilipa ae peitai, sa le’i maua.  Ae ina ua ia toe fo’i mai i sana faamaluga e sauni mo le toe fa’aauauina o lana galuega, ua leai lana ato, ae ua leai foi le ua molia i le fale.

Sa ta’ua e Hunkin, na alu pea e fa’aauau lana galuega ma sa ia vaaia le ua molia, o oso i totonu o se taavale.  Ae na fiu e valaau atu iai, ae ua alu ese atu le taavale. Sa ta’ua foi e le na a’afia, o le ua molia, o se tagata o le latou aiga ma e nofo foi i le latou fanua.

Ina ua faatalanoaina e leoleo ia le ua molia, sa ia faamaonia lona aveina o le ato a le ave pasi, ona ia tago lea ave le tupe sa iai totonu, ae tia’i le ato.