Tu’ua e Dr. Ledua le LBJ ina ua fa’ate’a fa’afuase’i

Pago Pago - AMERIKA SAMOA

 E ui i le silia ma le 20 tausaga o lana tautua i totonu o le falema’i autu a Amerika Samoa (LBJTMC), lea na amata mai i totonu o potu talavai se’ia o’o lava ina avea o ia ma Faatonusili o le falema’i, ae peitai, o le aso 21 o Aukuso, 2024, sa fa’ate’aina ai e le Komiti Faafoe a le LBJ, ia le susuga ia Dr. Akapusi Ledua ma le COO (Chief Operations Officer) a le falema’i, ia Dr. Jean Anderson.

 Sa fa’ailoa mai e Dr. Ledua i sana fa’atalatalanoaga ma le Samoa News e faapea, ua o’o mai le taimi e tatau ona malaga atu ai, ma fa’atasi ma lona aiga, i Alaska.

Na fa’aalia foi e Dr. Ledua le faatumulia o ia i se lagona to’afilemu, aua i sona talitonuga, sa ia faatinoina uma ana galuega ma so’o se tofiga sa tu’uina atu ia te ia, i totonu o le falemai, ma le atoatoa ma le faamaoni.

I lona toe tomanatu i tausaga sa iai o ia i totonu o Amerika Samoa, sa ia ave ai le mua ma le fa’ane’etaga i le Atua ona o Lona alofa ma Lana taitaiga, ua mafai ai ona ia ausia ma faataunu’uina le tele o tulaga i totonu o le LBJ.

Na ia fa’asoa mai nisi o vaega maoa’e o lana tautua i le LBJ i le 22 tausaga ua mavae atu, e pei o le fa’alauaiteleina o lana tautua i totonu o le falema’i, lea sa amata mai o se foma’i, ma fa’ai’u i le avea o ia ma taitai o le falemai.

Sa saunoa Dr. Ledua i lona agaga fiafia i le avea o ia ma se tasi o na galue malosi i le siitaga o le tulaga o le tautua i totonu o le falemai.  Na ia fa’aalia e faapea, o se tulaga sa ia tulimata’i iai, o le atina’eina lea o se tautua fou mo le tausiga o tagaat o le atunu’u.  Ma sa ia sana fuafuaga fa’ata’atia na iai se faamoemoe, e o’o atu i le tausaga e 2030 ua amata ona tino mai.

O seisi vaega na fa’aalia e le susuga i le alii fomai, o se tasi o tulaga maoa’e i lana tautua i totonu o le LBJ, o le fesoasoani lea i se tasi o fomai i totonu o le falemai, lea ua o’o ai lava ina avea o ia ma se tasi o foma’i faapitoa (certified orthopedic specialist) ma ua faamautuina le fa’aauau pea o le tautua a lenei fomai, e ui ina lona tu’ua o le LBJ.

Na saunoa foi Dr. Ledua, o se vaega e sili ona maualuga i lona loto, i nei tausaga e tele sa tautua ai i totonu o le teritori, o le agaga fa’afetai i taimi uma, e toe fo’i ai gasegase i o latou aiga pe a mae’a a latou talavai, ua maloloina i latou.

Sa saunoa Dr. Ledua, e leai seisi faalagona e sili atu nai lo le va’aia o se tagata gasegase, ae toe fa’afouina lona malosi ma sa ia fa’aalia ai lona agaga fa’afetai ma ia ave le faamanu i le Atua, ona o Lona fa’aaogaina o ia (Dr. Ledua) ma se mea faigaluega, e tauala mai ai Lona mana ua manuia ai e ua gasegase.

Sa faamatalaina e le alii fomai, ae e le’i malaga mai i Amerika Samoa ma galue i le LBJ, na masani ona aumai e le LBJ ia fomai (orthopedic surgeons) mai i atunu’u o Europa ma galulue i totonu o le falemai mo se masina ma le afa, ona toe fo’i lea o nei fomai i o latou atunu’u, ae toe feagai le LBJ ma faafitauli lava e tasi.

Na ia fa’aaleoina lona agaga fa’afetai i fomai faapitoa mai i le Ekalesia a Iesu Keriso o le Au Paia o Aso e Gata Ai, lea o lo’o malaga mai i atunu’u i fafo.  Lea o lo’o malaga mai ma galulue i le falemai, e aunoa ma se totogi ona o la latou auaunaga, e le gata i totonu o le falemai, ae faapea le atunu’u atoa.

E tusa ai ma le faafitauli o lo’o fa’aauau pea ona feagai ma le falemai, i le to’alaiti o fomai, sa saunoa Dr. Ledua, o le toatele o fanau aoga o lo’o malaga atu i atunu’u i fafo mo a’oga fa’afoma’i, o le to’atele e le o toe taliu mai i Amerika Samoa, pe a faatusatusa ia i latou o lo’o malaga atu i a’oga fa’afoma’i i Fiti, lea o lo’o toe fo’i mai ma galulue i le falemai.

Na saunoa le alii fomai, e tatau ona tulimata’i e le malo, le auina atu o fanau aoga i Fiti, ma a mae’a a latou a’oa’oga ma toe fo’i mai, ona taga’i lea o le malo i le aveina atu o i latou mo a’oa’oga faapitoa (specialized training) i Ausetalia po o Niu Sila.

Sa ia ta’ua e faapea, o taimi ia e toe fo’i mai ai se tasi ua faai’uina ana a’oa’oga mai i le a’oga faafoma’i i Fiti, ona o latou galulue lea i le LBJ po o le Ofisa o le Soifua Maloloina, e aunoa ma le tu’uina iai o se avanoa e mafai ai ona malaga atu i fafo mo a’oa’oga faapitoa (specialized training), mo le sailiga o tomai faapitoa, aua auaunaga patino o lo’o mana’omia i totonu o le falemai.  Ae ua o latou galulue i le galuega e tasi seia o’o lava ina litaea, ae toe ave atu nisi e toe a’o’oga i Fiti.

Na ta’ua e Dr. Ledua, i le pe a ma le 90 fomai ia o lo’o galulue nei i totonu o le Teritori, e na o le to’a 20 foma’i a Amerika Samoa lava ia.

Sa ia fa’aalia foi lona mitamitaga e tusa ai ma le talavai o ponaivi ma musele o le tino (Orthopedic Department) lea sa ia fa’atulagaina mai lava i le amataga, ma ua tele nit agata o le atunu’u ua mafai ona faamanuiaina i la latou auaunaga.

Na fa’aleoina e le alii fomai lona mafai ona fesoasoani i se alii fomai a Amerika Samoa lava ia, ina ia mafai ona avea ma fomai pasi (certified Orthopedic Surgeon) ma o sana fuafuaga mamao lea sa fa’ata’atia, o le sailia lea o se fofo mautu i le leai o se fomai faapitoa faapenei i totonu o le LBJ.

Sa ia ta’ua e faapea, na ia iloa, e iai le aso o le a ia tu’ua ai le LBJ ae sa iai se manaoga i lona loto, e fesoasoani i se fomai lotoifale ina ia mafai ona tula’i mai e sui tulaga ia te ia, e na te fa’aauauina lenei auaunaga i totonu o Amerika Samoa.

Ma e to’atolu i latou o lo’o galulue nei i totonu o le falemai, ua saunoa Dr. Ledua, o lo’o malamalama i lana va’aiga mamao lea e pei ona ia fa’asoa atu ia i latou.  O lona tala’aga lea o lo’o fia tu’u mo le LBJ.  Ina ia iai ni tagata faigaluega e mafai ona fa’aauauina le galuega ma si’itia le auaunaga mo tagata o le atunu’u, i totonu o le falemai.

Ae mo ia, ua fa’ailoa mai e Dr. Ledua, ua ia mana’omia ona agai atu i seisi valaauga sili atu ua saunia e le Atua mo ia.

Sa ia ta’ua e faapea, o le a ia tu’ua Amerika Samoa ma lona agaga fa’atumulia ona ua ia faataunu’uina le galuega na aumai ai o ia e le Atua i totonu o le teritori.

Na ia fa’asoa mai foi i le Samoa News e faapea, ua tele nisi falemai ua mae’a ona ia apalai atu iai, i totonu o setete eseese a le Iunaite Setete, e aofia ai ma Alaska, lea o le a ia fa’atasi atu iai ma lona aiga.

Sa ia fa’aalia le tele o taimi na ia to’esea ai mai lona aiga ona o lana auaunaga i le LBJ ma ua ia fiafia lava e malaga atu e faatasi ma i latou.  Sa ia ta’ua e faapea, ina ua malaga atu i fafo lona aiga, sa laiti lana fanau, ae o le taimi nei, ua matutua si ana fanau ma ua fai aiga uma, seia vagana ai si ona afafine e to’atasi.  

E ui i lea, sa fa’aalia pea e Dr. Ledua lona agaga faanoanoa i lona tu’ua o le LBJ i le mae’a ai o lana tautua mo le 22 tausaga, ae e le o mae’a ona tino mai lana fuafuaga mamao mo le LBJ.  Sa ia ta’ua, o se tulaga o lo’o pito i atugalu ai lona agaga, ona o se avanoa le maua, e mafai ai ona fa’aleleia atili le auaunaga mo le soifua maloloina o le teritori.

 O le taeao nei, lea ua amia mai ai e le Fono ia Dr. Ledua mo se iloiloga.