Tula’i Papali’i Sia Figiel i luma o le fa’amasinoga e tali ona moliaga o le fasioti tagata

Pago Pago - AMERIKA SAMOA

O le amataga o le vaiaso na tula’i ai i luma o le fa’amasinoga ia Papalii Sia Figiel, mo le ulua’i taimi, talu ona lokaina o ia ona o moliaga o le fasioti tagata, ona o le fa’alavelave sa tula’i mai, lea ua maliu ai le tamaitai polofesa ia Dr. Caroline Sinavaiana Gabbard, i Vaivase-uta.

O lo’o ua i luma nei o le faamasinoga ia se talosaga a le loia a Papalii ina ia taofia le toe tatalaina atu i tua o faamatalaga o lenei mataupu, a’o faatalitali ai se faaiuga i se talosaga mo le faia o se iloiloga o le mafaufau a Papalii.

O le afioga i le faamasino sili ia Fepulea’i Ameperosa Roma o lo’o mataituina lenei mataupu, lea sa auai i le amataga o le vaiaso, faatasi ai ma le loia a Papalii, ia Unasa Iuni Sapolu.  

E pei ona ta’ua i se ripoti a le Observer, sa fa’aalia e Unasa le tele o faamatalaga ua feavea’i e uiga ia Papalii ma e ono a’afia ai ona aia tatau i lalo o le Fa’avae – o lona aia tatau lea ina ia maua sona faamasinoga tonu ma le sa’o.

Na fa’ailoa atu e le alii faamasino i le loia a Papali’i, o lo’o ni vaega e ao ona ia iloiloina ona faia ai lea o sana fa’ai’uga.

Sa finau mai Unasa e tusa ai ma le mataupu i le tulaga o le soifua maloloina o le mafaufau a Papalii, e ao ona iloiloina e le faamasinoga, ona o le fa’afaigata ona maua o fa’atonuga. 

Na ta’ua e Unasa ia le vaega e 76 o le Tulafono a Samoa (criminal procedure Act) lea e ao ai ona faamautuina po o agava’a se tagata e faamasinoina.

Sa fa’ailoa mai e Roma, e le o tele se mea e mafai ona ripotia e vaega fa’asalalau, seia vagana ai, o lea ua tulai i luma o le faamasinoga.

O le aso 17 o Iuni lea ua toe tolopoina atu iai lenei mataupu, ina ia mafai ona fa’amautuina e le malo moliaga e fa’asaga ia Papalii ma tu’uina atu ai foi le taimi ia Unasa e fa’aulufaleina ai a latou talosaga.

O lo’o taofia pea Papalii i le falepuipui seia toe vala’auina lana mataupu i luma o le faamasinoga.

Na ta’ua foi i le ripoti a le Observer, le auai o le sui mai i le ofisa a le Iunaite Setete (U.S. Chargé d'affaires), o Noriko Horiuchi, i fafo o le potu faamasino, ma o lo’o iai se talitonuga, na malaga atu o lenei mataupu.

Na ulua’i molia Papalii i le fasioti tagata le fuafuaina, ae peitai, i le mae’a ai o le ulua’i su’esu’ega a leoleo, sa toe suia ai lea moliaga, i le fasioti tagata, ona o le maliu o Dr. Gabbard, o se tagatanu’u o Amerika

E tusa ai ma faamaumauga a le ofisa a leoleo, sa mauaina atu le tino maliu o Dr. Gabbard i le maota o Papalii i Vaivase-uta, i le aso na soso’o ai.