Tulaga lelei tapenaga a au ta’aalo mo le Pacific Games i Samoa

Ua fa’aalia e le Ofisa o Tapenaga o le Olimipeka a Amerika Samoa (ASNOC) le aga’i atu o tapenaga a au ta’aalo a le atunu’u mo Ta’aloga a le Pasefika lea e talimalo ai Samoa i le masina o Iulai o le tausaga nei, i se tulaga lelei ma atoatoa.

I se fonotaga a le ASNOC atoa ai ma sui o Asosi o Ta’aloga eseese uma i le atunu’u i le vaiaso na te’a nei, na fa’amautuina mai ai e le Failautusi Aoao a le ASNOC lea tulaga i le Samoa News, susuga Ethan Lake.

Saunoa Lake e fa’apea, e silia i le 300 le aofa’i o le au malaga mai Amerika Samoa e aofia ai au ta’aalo, ofisa, laufali ma faiaoga ua fuafua e malaga i le Taaloga lona XVI a le Pasefika, lea e faia i Samoa i le aso 8-20 o Iulai o le tausaga nei.

Mai ta’aloga e 28 o le a mafai ona fa’ataunu’uina i Samoa, e 26 ta’aloga o le a tausinio ai Amerika Samoa.

O ia ta’aloga e aofia ai; Archery, Athletics, Badminton, Basketball, Boxing, Cricket, Soccer, Golf, Judo, Lawn Bowls, Netball, Powerlifting, Rugby, Sailing, Shooting, Squash, Swimming, Table Tennis, Taekwondo, Tennis, Triathlon, Va’a, Volleyball and Weightlifting.

O le susuga a Falefata Moli Lemana lea ua filifilia e avea ma Ta’ita’i Malaga mo Amerika Samoa, o ia fo’i lea o le a gafa ma le faia o fesootaiga uma lava mo Amerika Samoa ma lana au malaga a o i ai i Samoa.

E pei ona taua e le ASNOC, e silia i le 3,000 au ta’aalo mai vaega eseese o le Pasefika o le a tausinio i ta’aloga mai atunu’u e 22 o le Pasefika o le a mafai ona tausino ai.

O atunu’u o le a tausinio i ta’aloga e aofia ai; Niu Kaletonia, Samoa, Fiti, Guam, Papua Niu Kini, Marshall Island, Nauru, Norfolk Islands, Solomona, Vanuatu, Kiripati, Amerika Samoa, Atu Kuki, Toga, Wallis ma Futuna, Ausetalia ma Niu Sila.

O le taimi nei, ua amata ona fa’agasolo le fa’amautuina o lisi o au ta’aalo a atunu’u eseese, ina ia mautinoa e lesitalaina i latou uma o le a fai ma sui o atunuu i lenei fa’amoemoe.

O le aso 4-8 o Iulai ua fa’atulaga e amata ai ona malaga au ta’aalo a Amerika Samoa mo Samoa, ae o le aso 21-24 o Iulai o le a amata ai ona toe fo’i mai i latou i le atunu’u.

“O le taimi lava e mae’a ai ona fa’amautu tapenaga uma, ona tuuina atu loa lea o le lisi faai’u mo suafa o i latou uma o le a faamautu le malaga atu i Samoa. O lo o i ai fo’i le fuafuaga e $700 USD le tupe e fa’atupe ai le malaga a le tagata e to’atasi, e aofia ai le pasese, ma le totogiina o le nofoaga e nonofo ma fa’amautu ai le au malaga a le atunu’u,” o le saunoaga lea a Lake.

O le aso 22 o Aperila, 2019 lea ua fa’atulaga mai e le Komiti o Ta’aloga a le Pasefika e tapunia aloaia ai loa le lesitalaina o lisi o au malaga mai atunu’u uma o le a tausinio, ae o le aso 6 o Me, 2019 lea ua faatulaga e tapunia aloai ai loa le fa’amatu’uina atu o pepa faamaonia (ID) mo i latou uma o le a aofia i totonu o ta’aloga, e aofia ai au ta’aalo, faiaoga, laufali ma malo faaaloalogia mai atunu’u ta’itasi o le Pasefika.

O le aso 4 o Iulai ua faatulaga e tatala aloaia ai loa nofoaga ua faatulaga e Samoa mo le aga’i atu i ai o au ta’aalo, sosoo ai ma le tatala aloaiaina o ta’aloga i le po o le aso 7 o Iulai, ae o le po o le aso 20 o Iulai lea ua fa’atulaga e faia ai le sauniga e tapunia aloaia ai lenei fa’amoemoe.

O le tele o ta’aloga o le a fa’agasolo lava i totonu o le motu o Upolu, se’i vagana ai ta’aloga fusuaga ua fa’atulaga e faia i Savai’i i le Hall a le aoga a Don Bosco i Salelologa.

E ui o ta’aloga a le Pasefika o loo faagasolo i le ta’i 4 tausaga, peita’i i se pepa o fa’amatalaga sa tuuina mai i le Komiti o Tapenaga o Ta’aloga a le Pasefika, na taua ai le tatala atu o le avanoa mo Ausetalia ma Niu Sila e tausinio ai i ni isi o ta’aloga i lenei tausaga.

Na pau ta’aloga o le a mafai ona tausinio ai Ausetalia ma Niu Sila e aofia ai Afeleti, Volipolo, Judo, Lakapi Ta’ito’a 7, Tuuga va’a, Karate ma le Siisii U’amea Mamafa.

O le ta’amilosaga o lakapi ta’ito’a 7 o le a fa’ataunu’uina i Samoa ia Iulai, o le a saili mai ai ‘au e tausinio i le ta’amilosaga ta’ito’a 7 a le IRB i Hamiltonu i Niu Sila i le tausaga fou 2020.

O ni isi fo’i o ta’aloga o le a fa’agasolo i Samoa ia Iulai i taimi o Ta’aloga a le Pasefika, o le a mafai ona fa’aaoga e fai ma ta’aloga e ulufale atu ai ni isi o au ta’aalo mo ta’aloga a le Olimipeka.

O le faanaunauga o le ASNOC e pei ona lu’itauina ai au ta’aalo uma o le a fai ma sui o le atunu’u, ina ia si’itia le tulaga maualuga o tapenaga ina ia sili atu pine e mafai ona maua i lenei tausaga nai lo Ta’aloga a le Pasefika i Papua Niu Kini i le 2015.

E 8 pine na manumalo ai Amerika Samoa mai Ta’aloga a le Pasefika sa faia i Papua Niu Kini. O ia pine e 8 e aofia ai pine auro e 3 mai ta’aloga eseese e 9 sa tausinio ai Amerika Samoa mai le aofa’i o ta’aloga e 28 sa fa’agasolo ai le ta’amilosaga.