Tulafono taufa’aofi si’i ai tupe fa’aoaga ofisa o faipule ma senetoa

Pago Pago, AMERIKA SAMOA

O le aso Gafua i le vaiaso na te'a nei sa fa’aulu ai le pili a le Maota Maualuga e si’i ai tupe fa’aaoga mo ofisa o sentoa ma faipule o le Fono Faitulafono. 

O le tulafono o lo’o i ai i le taimi nei, e $30,000 i le tausaga le tupe fa’aaoga mo totino taitoatasi uma o le Maota Maualuga ma le Maota o Sui. Ae e $40,000 i le tausaga mo le Peresitene o le Maota Maualuga ma le Fofoga Fetalai o le Maota o Sui. 

O le pili Maota Maualuga  o lo’o talosagaina ai le si’i: 

• $45,000 i le tausaga mo totino taitoatasi ume o le Maota Maualuga ma le Maota o Sui;

• $60,000 i le tausaga mo le Peresitene o le Maota Maualuga ma le Fofoga Fetalai o le Maota o Sui. 

O lea pili sa fa’auluina e afioga i senetoa ia Soliai Tuipine Fuimaono ma Togiola T.A Tulafono.

O se isi vaega o le pili lava lea o lo’o talosagaina ai le si’itaga o totogi o le kovana mai le $85,000 i le tausaga o lo’o i ai nei i le $120,000, ae o le lutena kovana si’i mai i le $75,000 i le $100,000. 

O le fa’atomuaga o le pili, o lo’o faailoa ai e faapea, o senetoa ma faipule o le Fono Faitulafono, e i ai ma isi lu’itau o loo feagai ma latou, ona o lo’o fau pea le maota Fono fou, e leai ni o latou ofisa e faia ai a latou fonotaga. 

Me e tatau lava ona fa’aavanoa se mea o latou maota ma laoa poo saili foi o ni fale’aiga e faataunuu ai a latou pisinisi. “O lea la faiga, e alagatatau ai ona fa’aopoopo o latou alauni e fai ai ia mea,” o se vaega lea o le pili. 

O lo’o taua foi i le fa’atomuaga e fa’apea, o le a faaopoopo pea tiute ma galuega a o tatou ta’ita’i i le vaega Fa’amalosi Tulafono ma le Fono Faitulafono a o agai atu pea le lalolagi i luma i taumafaiga uma e fofo ai ma tauivi mo le Koviti 19. 

Ona o mafuaaga ua ta’ua, ua alagatatau ai ona si’i o totogi o le Kovana ma le Lutena Kovana, fa’apea ai ma tupe fa’aaoga mo Senetoa ma Faipule ina ia o gatasi ma a latou fatuaiga tausi.

O lo’o taua i le pili e fa’atupeina nei si’itaga i tupe totoe e le’i paketi ina mai le tala o le tupe tausaga fa’aletupe 2020.