Tuipuipuia o fanau iti ma tuipuipuia e faia i tua o nu’u ma afioaga

Pago Pago, AMERIKA SAMOA

I pepa o fa’amatalaga mai le komiti o le Koviti 19 a le malo o Amerika Samoa (COVID-19 Task Force) o lo’o fa’ailoa ai nisi o mataupu taua i le koviti-19 ma tuipuipuia mo fanau iti ae maise le faia lea o tuipuipuia i totonu o afioaga. 

TUIPUIAPUIA FANAU 12-15 TAUSAGA

O loo tagataga’i nei le Matagaluega o le Soifua Maloloina (DoH) ia le toe mamao ae amata tuiga o tamaiti e 12 i le 15 tausaga i nofoaga o talavai a tamaiti i Fagaalu, Tafuna, ma Leone. Saunoa Dr. Tufa latou te faamautinoaina le o mai faatasi o tamaiti ma matua, aumai la latou maliega i le tuiga o a latou fanau, ma ia iai i le taimi e vaavaaia ai tamaiti i le mae’a ona tui. O le a faailoa atu e le Faatino Galuega ma le DOH pe a oo ina amata tuipuipui o talavou. 

AMATA ASO TOONA’I NEI TAUMAFAIGA TUIPUIPUI KOVITI-19 I AFIOAGA

O le a oo atu le Faatino Galuega KOVITI i alaalafaga i le Aso Toona’i nei, i le ta’ita’iga a le Matagaluega o le Soifua Maloloina, e faia tuipuipui o i latou e le’i oo i tuiga pe le’i faia foi le tuiga lona lua. 

O loo fuafua e amata i nuu i tua o loo faaalia le maulalo o le aofa’i ua tuipuipuia i le faafanua o le Faasoaina o Tuipuipui KOVITI i Alaalafaga. E iai le manatu e mafua lea ona o le faigata o auala poo nisi mafuaaga ua taofia ai. I le lua masina o loo lumana’i ai nei, o le a faia tuiga i Aso Toona’i uma ma oo atu ai i vaega o le motu e toatele i latou o loo alaala ai. 

I le fonotaga a le Faatino Galuega i le Aso Gafua, Me 24 na saunoa ai Dr. Aifili Tufa, Foma’i Gafa ma Faama’i Pepesi a le DOH, o le Aso Toona’i nei (Me 29) o le a faatino ai le porokalama o tuipuipui i le Maota o le Ekalesia i Amanave EFKAS i sisifo o le motu, a’o le A’oga Maualuga i Fagaitua i le itu i sasa’e. E lua pasi i le itu i sasa’e e malaga i nuu lata ane e aumai tagata e tatau ona tuipuipui.  Ua feiloa’i pulenuu o ia itulagi ma sui o le soifua maloloina ma o le a faailoa i le mamalu o alaalafaga le tuiga i le Aso Toona’i.

O le a faaauau le faasologa o le porokalama o tuipuipui i Aso To’ana’i o le a sosoo ai nei: luni 5 – A’oga Maualuga Leone ma Aua Stake Center (Ekalesia Mamona);  Iuni 12 - Maota o le Ekalesia Katoliko i Leone ma le Faletaalo a le DYWA i PagoPago; Iuni 19 – Malumalu Uarota Pavaia’i ma le Fale Laumei;  Iuni 26 - ASCC Multipurpose Building ma le Maota Ekalesia Metotisi i Nuuuli;  Iulai 3 - Faletaalo A’oga a Manumalo  ma le Faletaalo Nuuuli Voc-Tech; Iulai 10 - Vaitogi EFKAS Hall ma le Faletaalo DYWA i Tafuna.

Ua fautuaina e Afioga i le Kovana ma le Taitaifono ole Faatino Galuega Sui Kovana   Talauega Eleasalo Ale le vaega faatino tuipuipui a le DOH i le Aso Toona’i e faamautu a latou fuafuaga. E le gata i lea a ia taga’i i isi taumafaiga ua iloga le aoga i le una’iga o tuipuipui i nisi setete o le US ma ua faaopoopo ai le aofa’i ua tuipuipuia.  

O ia taumafai ia aofia ai faasalalauga faatosina i ala eseese o faasalalauga, fesoasoani i ala o feoa’iga, fai ni faatinoga mo aiga, ni se’i, ma nisi fuafafuaga e faaopoopo ai tagata e tuipuipuia.  Na saunoa foi le Sui Tofia o le Kovana (GAR) ua tatau ona aapa le Faatino Galuega i le faatupega mai le FEMA e $6.8 miliona ma fausia se fuafuaga ia lelei ona faasoa ma faatautai tuipuipui ia aofia ai le teritori atoa.

TALA LATA MAI O TUIPUIPUI 

O faamaumauga aupito lata mai a le DOH o loo ta’ua ai ua 22,705 poo le 61.5% o e agavaa i le tuipuipui ua faia tui taitasi. O le 54.3% o lea aofa’iga ua atoa tuipuipui. I le Tusigaigoa US o le 2020, o le aofa’i o tagata o le teritori (ē agavaa ma ē le agavaa i le tuipuipui) e  47,392. O lona uiga e itiiti ifo i le ‘afa o le teritori atoa – 47.9% – ua faia le tui muamua. I lena numera, 42.3% ua atoatoa ona tuipuipuia.

E 30% o tatou tagata e le’i faia se tui ma o le vaega tonu lea o loo saili e le Faatino Galuega. Ua tusia e le DOH se faafanua felanua’i o tuipuipui i Amerika Samoa.  O loo faamoemoe le DOH i le lagolago a le Ofisa o Mataupu Tau Samoa e faaopoopo ai le aofa’i ua tuipuipuia i alaalafaga, ma liliu ai le faafanua i le lanu moana vaivai pe moana malosi. Lanu moana vaivai o lona uiga ua 65-79% o lea alaalafaga ua tuipuipuia i le KOVITI, a’o le moana malosi o lona uiga ua 80% o le alaalafaga ua tuipuipuia, ma o ni pasene lelei ia mo lo tatou oo faatasi i se malosiaga e tetee ai le faama’i. 

Ia Me 23, 2021, o loo mafuli i le lanu meamata vaivai ma le malosi le faafanua o Amerika Samoa, o lona uiga o le 35-49% ma le 50-64% o e ua tuipuipuia. E iai nuu taumamao i sasa’e ma sisifo e lanu moli, o le faaaliga e na’o le 20% i le 34% - e aupito maulalo i le faafanua. Saunoa Dr. Tufa a mae’a i le lua masina, o le a toe iloilo e le DOH ma le Ofisa o Mataupu Tau Samoa poo le a se aoga o le taumafaiga o tuipuipui. 

NISI O MATAUPU

O le malaga toe taliu 5.0 o loo faamoemoe e tuua Honolulu ia Iuni 1 ma le au pasese ATOA ua atoatoa ona tuipuipuia i o latou aiga, ma ua mae’a foi su’ega ma maua i’uga o le KOVITI. O pasese taito’atasi e le’i atoa tuiga (ta’itasi) pe le’i tuipuipuia lava, poo malaga faatasi ma se aiga e fefiloi le tuipuipuia ma le leai, e o sa’o i nofoaga kuarenitini i le taunuu mai, ma nonofo ai mo le vaiaso e pei ona fuafuaina muamua.  

Ua talia e le Faatino Galuega aso o masina o lumana’i nei mo malaga ae le’i faamutaina le porokalama toe taliu mai, se’i vagana ua iai se isi suiga:  Aso Lua Iuni 19; Aso Toona’i Iulai 10; Aso Tofi Iulai 29.

Ua lagona le faanoanoa o le Afioga i le Taitaifono ma le Faatino Galuega ina ua maua le tala i la latou fonotaga i le faaleagaina o ni poto o le Faletalimalo o le Tradewinds ma le nofoaga kuarenitini i Fatuoaiga e tagata o le malaga toe taliu lona 4.