TU LUA O PO MA AO

VAEGA 62

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

******************************

“O le a lea mea?” O le e’e a le alii lomi tusi, ina ua tago atu i le aluga ma lona manatu o lo o taoto Tepora i luga o le moega, ae na faate’ia o ia ina ua se’i mai le aluga, ae ona iloa atu, e leai seisi o taoto mai ai.

Ae o le taimi lea na u’unai malosi mai e Tepora ia faitotoa o le pusa tu ma oso mai fafo ma tamo’e faatopetope atu loa i le faitotoa.

Ua liliu atu le alii lomitusi ma iloa atu le tamo’e a Tepora ma faapea atu, “Sarai? O oe lena Sarai?”

Manatua, o Sarai o lona toalua lea sa nofo ma fasioti i le po o le la faaipoipoga ina ua na iloa, e le o se taupou si teine o Sarai.  Toe faaopoopo atu iai, sa tui e Sarai i luga o lona ofu faaipoipo ia se pine o lo o tu’u ai totonu le ata o lana uo muamua lea na pa’u tamaitai ai.

Na tuai le oso atu a le alii lomi tusi, ae o le taimi lea ua i fafo ma le faitotoa ia Tepora .

Ina ua o’o Tepora i fafo ma le potu, sa tu ma tau va’ai po o fea le itu e tamo’e ai ona o le umi o le fale, ae na o faitotoa lava faaitu auala lua na te iloa atu.

Na lagona e Tepora le savali atu o le alii lomitusi ma tauvalaau atu, “Sarai?  Fo’i mai Sarai.  E leai seisi mea e mafai ona e sulufa’i iai.”

Ua le iloa e Tepora po o fea a tamo’e agai iai.  Ae o le taimi lea ua latalata atu le alii lomitusi lea e tauvalaau atu lava, “Sarai fo’i mai.  Faamolemole faamagalo mai a’u.  E le o a’u na fasiotia o ia, ae o le agaga leaga na ulufale ia te a’u.”

Ua toe fa’aauau le tamo’e a Tepora, ua na o le pau lava le mea o lo o manao iai, o le tau mamao ese atu ma le alii lomi tusi, ona saili lea o se auala e mafai ona sola ese mai ai ma le fale.

Na lagona mai e Tepora le tauvalaau atu o le alii lomi tusi, “Sarai! Ta’u mai po o le a la’u mea e mafai ona fai ina ia toe mapu ai lou agaga ma tu’u sa’oloto ai a’u.  Ua valea lo’u ulu talu ai oe!”

Na faateia Tepora ina ua faalogo mai i le pa o le fana, ma toe valaau atu le alii lomi tusi, “Sarai! Tali mai!”

Na fa’aauau pea ona tamo’e pogisa Tepora ma le loto ua tumu i le fefe.  Ae ona lagona loa le matala faafuasei o se faitotoa ae toso atu lona lima e se tagata.  Ua fea’a solo vae o Tepora ma taumafai e u’unai ese le tagata lea o lo o mau ia te ia.

Ae latalata mai loa le alii lomi tusi ma toe faapa lana fana.

Ma o le taimi lena na fana ai loa e Tavita, lea o lo o mau lima tasi ia Tepora.

E FAIA PEA!