TU LUA O PO MA AO

VAEGA 59

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

*************************

Na gata mai le tatou Fagogo i le vaiaso ua mavae, ina ua mae’a le talatalanoaga a Tavita ma le alii o Iosefa ma na faateia Tavita ina ua na fesili atu ia Iosefa e uiga i le ata o le teine faaipoipo ma lona lauulu lanu auro lea sa i totonu o le pine lea na pipi’i i le ofu o Rasela i le taimi na maliu ai, ae tali mai Iosefa, na vaai i le ata lena i le fale o le alii lomitusi lea sa masani ona lolomi mai ai ana pepa ia sa fa’aaoga e faavalea ai loomatutua ma toeaiina o le nu’u, ma ave latou tupe.

O le mea na faate’ia ma oso ai le afu malulu o Tavita ona ua pei ua oso se ma’i lili a le alii o Iosefa ma na fiu Tavita e fesili atu iai po o le a le mea o tupu, ae ua na ona sioa o Iosefa ma taumemumemu le igoa o Tepora.

Ua tago atu Tavita ua u’u mai luma o le ofu o Iosefa ma lulu ma faapea atu iai, “E a Tepora?  E iai se me aua tupu ia Tepora?”

Ae ua na o le gatete o Iosefa ma toe faapea mai “Lomitusi”.

Ua velo i lalo e Tavita ia Iosefa ae ua tu i luga ma tamo’e agai i le faitotoa ma faatopetope atu loa i le fale o Tepora. 

E taunuu atu Tavita, o lo o pogisa uma le fale o Tepora ma na fiu Tavita e tu’itu’i le faitotoa ae e leai seisi na tatalaina mai.  Sa tauvalaau leotele Tavita i le igoa o Tepora ma ona Aunties, ae peitai, sa leai se mea na gase mai i totonu o le fale.

O le leotele o le pa’o ma le tauvalaau a Tavita na oso mai ai se tuaoi a Tepora ma fesili mai po o le a le mea o tupu.  Na tali Tavita pe o ona silafia le mea o iai Tepora ma ona Aunties.  Sa tali le tuaoi e na o loomatutua o lo o ia iloa o lo o auai atu i se polokalama a le nu’u, ae na te le i vaai lava ia Tepora.

Ua tu Tavita ma taumafai e taofiofi lana manava ma mafaufau loloto po o le a leisi ana taga ole a fai.

Se’i tu’u ai I’i Tavita ma ona mafaufauga ae tatou liliu atu i le tamaitai o Tepora ma le tulaga ua o’o iai.

O le taimi lea ua amata ona toe malamalama ia Tepora ma taumafai e saofa’i ifo i luga.  Manatua foi o Tepora, o lea e i le fale o le alii lomitusi lea na taumafai e tauanau ia Tepora,  e aumai ana tusitusiga e tago o ia e lolomi.  Ae ina ua faateia le la talanoaga ma savali ese atu le alii lomitusi ma tuua ai na o Tepora i totonu o le potu, na vaaia ai e Tepora le ata o le tamaitai faaipoipo lanuulu lanu auro lea o lo o tautau i luga o le sima o le potu.

Ua taumafai Tepora e faato’ato’a lona oto ma lona fefe lea ua totolo a’e.  Sa ia oso i lalo mai luga o le moega lea sa taoto ai ma amata ona fetamoea’i solo i totonu o le potu e saili se auala e sola ese ai.

Ua tu Tepora ma taumafai e faalogologo pe na te lagona atu seisi e mafai ona valaau iai mo se fesoasoani.  Ae peitai, na pau le mea sa ia lagonaina, o se musika mai i fale o lo o tuaoi ma le fale lea o lo o loka ai nei o ia i totonu o le potu.

Ua liliu atu Tepora ma sue uma totonu o pusa toso, o pusa tu, o tua o ie faamalama, o lalo o le moega mo le sailiga o se auala e mafai ai ona sola ese, ae paga lea, ua matua leai lava se mea e mafai ona maua e Tepora e mafai ai ona sola ese atu ai.

Ua toe nofo ifo i lalo Tepora i luga o le moega ma tau mafaufau i faatonuga a Tavita sa tuuina atu ia te ia, mo taimi faapenei.

E FAIA PEA!