TU LUA O PO MA AO

VAEGA 14

E faatalofa atu i le mamalu o le tatou au faitau nusipepa i lenei taeao fou.  Tatou te viia faatasi le agalelei ma le alofa o le Tapaau i le Lagi ona o Lana pule faasoifua ua tatou aulia mai ai lenei aso fou i le lagi e mama ma le soifua maua. 

E maualuga le faamoemoe a lenei Nusipepa o lo’o faamalieina pea lau faitau I le tatou FAGOGO.  Ae se’e maia i ou seetaga malu ma uumau lau nusipepa, o lea o le a toe soso’o atu le tatou tala.

 ****************************

O le taeao na soso’o ai, na faate’ia Tepora i le maua o sana tusi mai ia Tina. O le taimi lea, e le i iloa e Tepora, ua maliu fasia Tina i le po anapo.  O upu ia o le tusi:

“Talofa Tepora, 

E fia maua se feiloaiga ma lau susuga i se taimi vave lava, ona o se feau taua lava mo oe.”

Soifua, o Tina.”

Ua tula’i Tepora ma faatopetope atu e sauni e alu i le fale o Tina.

E alu lava le taavale ae o lo o faasolo mafaufauga o Tepora i le mafuaaga ua manao ai Tina e la te toe feiloai i lenei taeao, ae lea na alu i lona fale i le po anapo.  O le alu tele o mafaufauga o Tepora e tali le fesili “pe aisea ua toe mana’o mai ai Tina e talanoa ia te ia”, sa ia le iloa atu ai le tutu mai o leoleo i luma o le fale o Tina, se’ia o’o ina tu tonu le taavale i luma o le fale.

Na oso i fafo Tepora ma ia iloa atu, e le gata i leoleo ae faapea foi le au faitatala ua faatumulia ai luma o le fale o Tina.

Na soso atu Tepora ma tau faalogologo i faamatalaga a tagata i le mea ua tupu.  Sa ia iloa ai, na osofa’ia e se tagata ia Tina i le po anapo, ma ua maliu nei o ia.  Ua matua’I te’I lava Tepora ina ua ia faalogoina tala a tagata, I le maliu fasia o Tina anapo.

Ua savali sa’o atu nei Tepora I le faitotoa ma tu’itu’i.  Ua tatala mai e se leoleo.

“O le a le mea e te mana’o ai,” o le fesili mai lea a le leoleo.

“Na maua i le taeao ananei sa’u tusi mai ia Tina, fai mai o lo o fia talanoa ia te a’u i se taimi vave lava,”o le tali atu lea a Tepora I le leoleo.

E le i uma atu le tala a Tepora i le leoleo, ae savali mai se tagata mai i totonu o le fale ma tu i le faitotoa, ma le tilotilo atu o Tepora, o le alii o Tavita.

Ua tu Tepora ma faataupupula atu ia Tavita.  “Talofa Tepora, aisea ua e usu mai ai i le fale o Tina i lenei taeao?”

Sa toe tali Tepora, “O lea na maua atu la’u tusi ananei lava i le taeao mai ia Tina, fai mai e fia talanoa ia te a’u I se taimi vave lava.”

“Oi ioe,” o le tali mai lea a Tavita, “O le mafuaaga foi lea ua ou sau ai.  Na maua atu foi la’u tusi mai ia Tina i le mea lava e tasi.  Ia ae peitai, ou  e taunu’u mai, ua iai leoleo iinei”.

“E iai se mea ua tupu ia Tina?” o le fesili faatopetope atu lea a Tepora.

“Ioe,” o le tali mai lea a Tavita.  “Ua maliu o ia”.

E FAIA PEA!