TU LUA O PO MA AO

VAEGA 44

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

******************************

Ua matua’i le iloa se mea e gata mai ai le maasiasi o le alii faufau mea leaga o Iosefa ina ua tuli e le uo a Tavita mai lona fale lea o lo o fai ai le pati, ina ua le sao lana mailei sa tau fai e fa’aleaga ai si teine o Tepora.  Na faapea lava Iosefa o le a fulitua Tavita ma ana uo ma o latou auaiga ia Tepora pe a faamatala iai le mafuaaga na sosola ese mai ai ma uso o lona tina mai le latou nu’u.

Ua oso atu ma le ita tele ma faapea atu i lona leo tele, “Vaai, o lea sa ou taumafai e fesoasoani ia Tavita ma faasao mai i le maasiasi e pei ona sa ou o’o iai, talu ai le fafine lea,” ma faasino ia Tepora.

“O le a lau tala?” o le fesili a Tavita ma amata ona savali atu ia Iosefa.

Ua solomuli i tua Iosefa ma le fefe i le vaai mai i le ita tele o Tavita.

“Ia e iloa,” o le tala lea a Tavita ma savali atu lava ia Iosefa.  “O Tepora, e le o se tagata e leai ni ona aiga po o nisi e alolofa ia te ia.  O Tepora, o le a avea ma o’u to’alua.”

Oka, na pei e oso i se la’au ia Iosefa i le faalogo mai i le tala a Tavita.  Ae o le taimi lea ia Tepora, ua faataupupula atu ia Tavita ma le maligi o ona loimata.  Ae o uso o ona tina, ua le iloga se mea e gata mai ai lo la fiafia ma lo la mimita, i le faamatalaga a Tavita.

Ua iloa e Iosefa le tele o lona sasi ua iai nei, ona o Tavita, e le o se tagata faatauvaa i totonu o le aai.  O se tagata e le gata i le mau’oa, ae o le faatuatuaina ma le fa’aaloalogia i totonu o le nu’u.

Ua tu tonu lava Tavita i luma o Iosefa ma faapea atu, “Ou te iloa ua e malamalama i lo’u to’atama’i pe afai ae faalogo e o’u taliga ni faamatalaga e uiga ia Tepora, a ea?”

Ua gatete atoa le tino o Iosefa ma ina ua tali mai ‘Ioe’, na lagona foi le gatete o lona leo.

“Afai ae o’u faalogoina sina fasi tala lava e tau faaleaga ai Tepora, o le a ou le toe taofia loa, ae o le a faasalalauina i tagata aemaise lava lou toalua faapelepele ma lona aiga, le mea o lo o inivesi ai au tupe,” o le tala lea a Tavita.

“Ou te le iloa le uiga o le mea na e te fai mai ai,” o le tali lea a Iosefa ma taumafai e savali aga’i i le faitotoa, e sola ese atu.

“Oi, e faapea oe ou te le o iloa lau fale talitane lea o lo o tu i le faasiusiuga o le tatou a’ai?” o le tala lea a Tavita ma ataata.  “Ou te masani lelei lava i le tua’a o si ou toalua ma atonu e mafai ona ou asiasi iai ma ma o e tafafao i le fale lea o lo o i le faasiusiuga o le tatou nu’u.”

Ua tu Iosefa ma pupulato’a mai ia Tavita. 

 “O se mea uiga ese le vave salalau o tala i totonu o nu’u laiti e pei o le tatou nu’u.  E malepelepe ai lava aiga, e tusa lava pe sa’o pe sese nei tala,” o le tala lea a Tavita.  “Ae o a’u fo’i ou te le faia ni tala fatu, e pei o oe, e fiafia e fai tala le moni.  Ae o a’u, e iai faamaoniga ma molimau o mea uma ou te tautala ai.”

“E leai so’u manatu e faia ni tala e uiga ia Tepora,” o le tali mai lea a Iosefa.  “Ae  e le mafai ona ou taofia lo’u toalua pe a vaai ia Tepora.”

“Afai ae o’u faalogo i se faamatalaga lava e tasi o salalau e uiga ia Tepora, pe sau mai ia te oe, pe leai, o le a o’u tuuaia oe i na tala uma,” o le tala atu lea a Tavita.  “E 5 minute o le a tuu atu ia te oe, e te alu ai e ave lou toalua ma lua tu’ua le lotoa.”

Ua matuai suia lava foliga o Iosefa e pei o se tagata ua vaai tino i ona toe aso.  Ua tau tevateva atu nei i le mea o faapotopoto ai tagata o le pati, ma tau saili mai lona toalua, ma o la o ese atu loa.

E FAIA PEA!