TU LUA O PO MA AO

VAEGA 42

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

*****************************

Na muta le tatou tala ananafi, ae o lo o taumafai si teine o Tepora e faamalamalama atu ia Tavita le mafuaaga na o latou o ese faafuasei mai ai lo latou nu’u, talu ai le alii amioleaga lenei o Iosefa.  

Sa faamatala e Tepora le mea leaga a le alii o Iosefa na fai ia te ia, ina ua fiu lava e fai mai ana tifiga ae le alu lava iai le ulu o Tepora, ita loa Iosefa tago i le ta’u i le tamaitai o Aurora lea na la faauo muamua ae toe nofo ma tia’i faafasi fa’i ona o lona fia faaipoipo atu i seisi teine mau’oa, o ia lea e uo ma Tepora.

Ae manatua foi o Aurora e fai siga off o le ulu.  Lea la ua liliu mai nei Aurora ia Tepora.

Ua o’o le faamatalaga a Tepora i le maua toatasi atu o ia e Aurora, o la e nofonofo i lalo o se la’au ma malolo ai.

Na ta’ua e Tepora, e fai o le ve’uve’ua o le ulu o Aurora, ae o la e ofu lona ofu moe ma silipa.  Na ia iloa ai, o le a iai le mea o le a tupu.  Sa ia taumafai e fesili atu ia Aurora po o okay o ia, ae na ta’ua e Tepora, na o le tasi lava le fuaiupu o lo o lagona atu o tauloto mai e Aurora.

“O le a lana tala na fai atu ia oe?” o le fesili lea a Tavita.

“Fai mai, “E tatau ona e alu ese.  A leai oe, e mafai ona ia toe fo’i mai ia te a’u”, o le tali atu lea a Tepora.

Na lagona e Tavita le suia o le tino o Tepora ina ua o’o lana faamatalaga i le vaega lea, ua pei ua fa’amalo le tino o Tepora ma ua sau lona afu malulu.  Na vaaia e Tavita le suia o foliga o Tepora mai i le ita, i le fefe.

“Ona a la ia?” o le fesili leo lemu atu lea a Tavita.

Sa tilotilo atu Tepora ia Tavita ma ona foliga ua tumu i le fefe, a’o toe fo’i ona mafaufauga i lea aso matautia.

“Sa ou vaaia o lo o u’u e Aurora se naifi ma sa si’i i luga lona lima ma faalala mai le naifi ia te a’u, a’o lo’o ou nofo pea i lalo o le la’au.  Ua oso mai o le a tui a’u i le naifi,” o le tala lea a Tepora e foliga mai o le a tagi.

Ua a’apa atu Tavita ma opo mai Tepora ma musumusu atu iai, “E leai se mea na tupu.  O lea e te soifua mai ma o lo o e manuia.  Ua te’a na mea.”

“Sa ou taumafai ou te tu i luga ma ou sola ese.  Ae na ou sulu ma o’u toe pa’u i lalo.  Ma na oso mai Aurora ma toe taumafai e tui a’u i le naifi, ae na mafai ona ou taavale ese ma ou toe tu a’e i luga ma ou tamo’e ese,” o le tala tau musumusu lea a Tepora.

Ae na ata Iosefa ma faapea mai, “E le i maua lava e seisi se naifi i le mea o lo o fai mai Tepora na tupu ai le faalavelave.” Ae na toe vave ona mimigi i tua ina ua faataupupula atu iai Tavita.

“Na o’u tamo’e aga’i i se vaitafe na lata ane i le mea na ou iai,” o le fa’aauau lea o le faamatalaga a Tepora.  “O lo o iai se ala laupapap i luga o le vaitafe ma sa ou tamo’e faatopetope agai i le auala laupapa, e mafai ai ona ou sopoia leisi itu.  Ae peitai, sa faapena foi le vave o le tamo’e a Aurora.  Ma ma taunuu faatasi i luga o le ala laupapa.”

E FAIA PEA.