TU LUA O PO MA AO

VAEGA 41

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina

********************

Na gata mai le tatou Fagogo i le vaiaso ua mavae ina o taumafai le alii o Iosefa e tau faaleaga i si mafine o Tepora, ia po o Fetu foi, aua o lona igoa moni lea…e ala i le faamatalaina ia Tavita le mafuaaga na sosola ese ai Tepora/Fetu ma uso o lona tina, mai lo latou nu’u.

Sa faamatala e Iosefa e faapea, o se tamaitai sa o la faauo ae mulimuli ona fulitua iai, ona e pei ona sa ta’ua e Tepora, o le mativa o si tamaitai, ae mulimuli ane na iloa ai e le mautonu le mafaufau o sia tamaitai ma ua amata ona faasaga tau mai ia Iosefa ma lana manamea fou.

Ma ona o le fefe o Iosefa ina ne’i iloa e lana teine tuai, lea e leaga le ulu, ia lana uo fou, o lea na ia pepelo ai i lana teine tuai, o lea la te uo ma Tepora.

“Aua e te pepelo!” o le leotele mai lea a Iosefa i le faamatalaga a Tepora.

“O oe na e pepelo.  Na i’u ina faasagatau mai Aurora ia te a’u, ona o lou pepelo,” o le faasaga atu lea a Tepora ia Iosefa ma lona ita tele.  Ana le vave le tago atu a Tavita ma taofiofi mai Tepora, semanu Tavita e o’o i se tulaga faaletonu, i le tau oso atu o Tepora e avau fusuaga.

“O lou ita ia te a’u ona ua e fiu e fai au fegi ou ke le kea aku ia oe, o le mea lega ga e ka’u ai lo’u igoa ia Aurora.  Ae ga e eke iloa lelei lava, o Aurora e ma’i I le mafaufau,” o le toe leotele mai lea a Tepora.

“Ae o ai e mafua ai ga mea uma? O au amio faakosiga ga mafua ai.  Vaai e le o a’u o se la’au e leai ai gi o’u magaku pe a ou vaai aku o fai ou uiga faakosiga.  O a’u o le kagaka!” o le tau punipuni mai lea a Iosefa.

Ae o le taimi lea ia Tavita, ua fia tago lima atu lava ia Iosefa ma ana faamatalaga ia Tepora.

“Vaai e leai lava se leaga o a’u mea ga fai.  Ga o oe lava le kamaloa ga e mafaufau leaga i a’u mea sa fai.  Ma o le leaga lava o lou loko iga ua ou kalikualimaiga oe, ga mafua ai ga e pepelo ia Aurora, ae ga sa e iloa lelei lava e ma’i le keige,” o le toe leotele mai lea o Tepora ia Iosef.

“O le a le mea a Aurora na fai?” o le fesili atu lea a Tavita ia Tepora a’o taumafai e taofiofi lona ita ia Iosefa.

“O leisi aso na taumulimuli mai ai Aurora ia te a’u.  Na maua atu a’u o o’u nofonofo i lalo o se la’au ma tusitusi la’u tala.  Na o’u iloa lelei lava o le a tupu se faalavelave aua na alu atu Aurora na o lona ofu moe ma ona silipa la na se’e atu,” o le faamatalaga a Tepora.

“Na ou fesili atu iai po o a mai o ia, ae pei e na te le o lagona maia a’u.  Ae ou te faalogo atu o la e pei e talanoa i seisi ma e o upu lava e tasi la e fai.”

“Fai mai e a?” o le fesili lea a Tavita

E FAIA PEA!