TU LUA O PO MA AO

VAEGA 29

E faatalofa atu i si o tatou aiga i lenei taeao fou.  Tatou te si’i faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua fasiotia ai nai mafine o Rasela ma Tina.

********************************

Na gata mai le tatou Fagogo i le vaiaso ua mavae ina ua maua atu e Tepora ia Tavita o lo o tau fa’aaoga ia si alii o Anitele’a ma tauaga tatau popo ona o ana lomiga pepelo lea na taumafai ai Anitele’a e ta’u atu i tagata le iai o se sootaga i le va o Tavita ma maliu o Rasela ma Tina.

O le fale lomitusi a Anitele’a, o lo o lomia ai le tele o tusi na tusia e Tepora ma ua tele ai foi ana tupe maua ae ona o le toatamai tele o Tepora, na ia faailoa atu ai ia Anitele’a, ua tatau foi ona saili seisi lomitusi fou e lolomi ai ana tusi.

Na pei e nofo le manava a Anitele’a i le faamatalaga lea a Tepora aua ua iloa lelei e Anitele’a, le tele o le tupe o le a ia le toe maua, pe afai ae alu Tepora i se lomitusi fou e lolomi ai ana tusi.

“Se aua e te faapena, Tepora,” o le faaoleole atu lea a Anitele’a.

“Ua tele au tupe ua maua i le fa’aaogaina o lo’u igoa, ua tatau ona e totogia a’u,” o le tali lea a Tepora.

“Oi, o tupe na e te mana’o ai?” o le fesili lea a Anitele’a.

“Tu’u au tupe ou te le mana’o ai, ae ou te mana’o e te ta’u mai, po o fea le fale lomitusi na lolomi ai le tusi lea,” o le tala lea a Tepora ma tago i totonu o le taga o lona ofu, ma ave i fafo le ‘certificate’ lea sa o la aumai mai i si tina matua o Kaloline.

Manatua foi o Kaloline, o se tasi o tina matua ua a’afia nei i faiga taufaasese a se tagata, lea ua lusi ai se vaega tele o ana tupe.  Ae o le ‘certificate’ lea ua i lima o Tepora, o le pepa lea sa tu’u iai e le tagata lea ia Kaloline e fai ma faamaoniga o lana kamupani tupe.

Ua tilotilo Anitele’a i foliga o Tepora ona tilotilo lea i le pepa o lo o u’u i lona lima.  “O e iloa le fale lomitusi po o le tagata e ana le fa’ailoga lena e i luga o le pepa?” o le toe fesili atu lea a Tepora.

“E na o le pau le tagata ou te manatua sa ia fa’aaogaina le faailoga lea, o Asotasi.  E tele ni ana lomiga matagofie sa faia i vaitaimi la.  Ae sa tele lava ni tala feaveai e faasaga ia Asotasi,” o le tala lea a Anitele’a.

“Asotasi? Na ou faapea ua leva na litaea le tagata lena?” o le tala lea a Tavita.

“Na ou manatu foi ua litaea.  Ae o lana faailoga lena,” o le tali mai lea a Anitelea.

“O a tala feavea’i?” o le fesili mai lea a Tepora.

Na mimigi tau’au a Anitele’a ma faapea mai, “Ua iloa uma e tagata, afai ae e manaomia se tusi pasi pepelo po o ni fa’ailoga pepelo mai aoga, e tusa lava pe e te le’i alu i se a’oga, e mafai ona lolomi e Asotasi”.

“Faafetai Anitele’a,” o le tala lea a Tepora ma savali agai i le faitoto’a, o le a alu.

“Faatali, o le a le uiga o a lua fesili? O aafia Asotasi i mea na tupu ia Rasela ma Tina?” o le fesili faitatala lea a Anitele’a. 

“Out e le iloaina.  Ae ana o a’u o oe, aua ne’i tuli sau tusitala e su’e Asotasi,” o le tali mai lea a Tavita ma mulimuli atu ia Tepora.

E FAIA PEA!