TU LUA O PO MA AO

VAEGA 23

E faatalofa atu i si o tatou aiga i lenei taeao fou.  Tatou te sii faatasi le mua ma le viiga faafetai i le Tapaau i le Lagi ona o Lana pule faasoifua, o Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae se’e mai loa i ou seetaga malu, ae se’i toe fa’aauau atu le tatou Fagogo i le alii o Tavita ma le tamaitai o Tepora lea o lo o tau saili po o ai na fasiotia Rasela ma Tina, ae po o fea foi le ‘Diary’ lea o lo o iai faamaumauga e ono afaina ai o la’ua aiga.

*************************

Sa gata mai le tatou Fagogo i le vaiaso ua mavae, I le taimi lea ua malu ifo ai le afiafi, ae o lo o faia se savalivaliga a Tavita ma Tepora i tafatafa o se togavao, ma talatalanoa I mea ua la iloa e uiga I le tagata sa fasiotia Tina. 

A’o savavali lava le pea lua lea ma talatalanoa, e pei se I’ite I le tama o Tavita, se tagata o mulimuli atu I o la tua.  Sa talanoa lava la Tavita ma faasipasipa aga’i i tua lana vaai, ma ia iloa atu ai se faaataata o se tagata o mulimuli mai ia i la’ua.  Manatua, o lea ua amata ua malu le afiafi ma ua amata ona pogisa nisi o vaega o le togavao lea la te savalivali atu ai ma Tepora.

Ua musumusu atu le alii o Tavita ia Tepora, e iai le tagata lea e mulimuli mai Ia la’ua ma ia faatonuina Tepora, a fai atu loa, ona vave lea o lana gaioi.

Na pei o le uila gaioiga a le alii o Tavita, ina ua o’o atu le la savaliga I se vaega pogisa, ae nimo i tua o se tasi o la’au ma tu faasa’o ai.  Ae ua savali toatasi le tamaitai o Tepora.  Na fika e Tavita, ona o le pogisa o le vaega lea o le togavao ua o’o iai le la savaliga, e le iloa mai e le tagata lea i tua, ua na o Tepora la e savali ese atu.

E le’i umi na faasasa’o Tavita ma le la’au, ae ona lagona loa le pasi ifo o le savali a le tagata.  E na o le lua lava o la’a a Tavita, mau i le kola o le ofu a le tagata lea, ae togi i lalo i le palapala ma ia saofa’i ai i ona luga.

Ua e’e le ali’i lea, ma vaaia le toe faatopetope mai o Tepora I le mea o lo o saofa’I atu ai Tavita i luga o le tagata na mulimuli mai ia la’ua.

Na tete’i Tavita ma Tepora ina ua la tilotilo atu, o se tagata e la te masani lelei ai lava.

“Aukuso! Aisea le mea o e tau mulimuli mai ai ia ma’ua?” o le fesili atu lea a Tavita ma le te’i tele.

“Oka! Oka! Matua’I e le mafaufau tele ma lau mea ua fai,” o le tali mai lea a le alii o Aukuso ma le ita tele, a’o ia tau tu atu i luga.

O Aukuso, o se polofesa i se Iunivesite I totonu o le a’ai ma o se tagata lauiloa i totonu o le nu’u lea e nonofo ai foi Tavita ma Tepora.  

“E faapea lava na o oulua e faataga ona savavali i’i!” o le ote lea a le alii Polofesa o Aukuso.  “Vaai ua palapala uma o’u ofu i lau mea na fai!”

“Aisea na e tau mulimuli mai ai ia ma’ua?” o le toe fesili atu lea a Tavita i le alii polofesa.

“Oi, e te le malamalama i la’u na fai atu.  E le pule oulua i auala e feoa’i ai tagata!” o le tali mai lea a Aukuso. “Tepora, fai i lau tama lea, e le pule na ia i laueleele na faia e le Atua e feoa’i ai tagata.”

E fai lava le tala a Aukuso, ma solomuli aua ua na vaaia foliga le fiafia o Tavita,  “Ou te le talitonu i lau tala,” o le tali atu lea a Tavita. “E le o a’u se tagata e fiafia i se tagata pepelo.  Aua ne’i o’u toe vaai ia oe o e mulimuli mai ia ma’ua.”

Na avea le iai o Tepora ma tulaga na faalototeleina ai Aukuso, e le pa’I atu Tavita ia te ia, ma ia faapea mai ai, “O a’u ou te tusitala foi i le nusipepa ma o lea na ou mulimuli ia oulua, ona o le vavalata o lua sootaga ma le maliu o Tina.”

E FAIA PEA!