TU LUA O PO MA AO

VAEGA 22

E faatalofa atu i le mamalu o le tatou aufaitau nusipepa i lenei taeao fou, taeao manuia, taeao toto’a.  Faamalo le onosa’i, faamalo le tauata’i.  Talitonu le faamoemoe o lo o faamalieina lau faitau i lenei auaunaga vaivai.  Ae ia se’e maia i ou se’etaga malu, se’i toe soso’o atu le tatou Fagogo.

******************

Ua tu’ua e Tavita ma Tepora le fale o si toeaina o Atamu, lea e nofo ma le fiafia on aua manatu o ia o le a tele sana tupe e maua mai i le kamupani pepelo lea ua tu’u iai ana tupe.  Talofa e i si toeaina o Atamu pe a malamalama i faiga taufaasese ma le gaoi a le tamaitai o Tina ma lana paga lea sa fai, ae o lea ua maliu o ia. 

A’o agai ese atu le taavale a Tavita ma Tepora, na fesili atu Tavita ia Tepora, “Na e vaai i se faailoga i luga o pepa faamaumau ia na ta vaai ai, e iloa ai le igoa o le kamupani lea ua aveina le tupe a si toeaina o Atamu?” 

Na tali Tepora, “Na ou vaai i se fa’ailoga po o se ata, sa i le tulimanu o pepa ia o lo o teuina e Atamu.  E mafai ona ou faamatalaina i le taitai leoleo e mafai ai ona saili lea kamupani.”

A’o savavali ese atu le toalua mai le fale o Atamu, na lagona e Tepora lona agaga alofa i nai tama ma tina matutua lea ua a’afia i faiga gaoi ma le taufaasese a nei tagata le alolofa.

Sa pei na ati le vaai a le alii o Tavita i mafaufauga o Tepora, aua na faateia Tepora i le faapea atu o Tavita, “E le o oe le mafuaaga o le aafiaga o nei tama ma tina matutua.”

“E le toe maua mai tupe a i latou uma, ona o Tina ma lana vaega,” o le tala lea a Tepora.

“O le mea lena e maua I le talitonu vave i agaga o tagata maliliu,” o le tali lea a Tavita.  “Ou te ofo ia i latou i lo latou talitonu gofie i nei faiga taufaasese.”

“O le mea ou te faanoanoa tele ai, ona o nei tama ma tina matutua, e le o ni tagata mauoa.  O lo o ola i latou i se vaega tupe itiiti e maua mai i a latou penisone,” o le tala lea a Tepora.

A’o fa’aauau pea ona talatalanoa Tepora, ae o le taimi lea ia Atamu, ua lagona le tutu o lauulu i le pito i tua o lona ua.  O se faalogona ua masani ai tele Tavita, i taimi o le a osofaia ai o ia e se tagata leaga.  Sa ia taumafai e liliu teisi lona ulu e tau vaai i tua pe o iai seisi o mulimuli atu ia i la’ua, ae ia aua ne’i faateia ai Tepora.

Ma na ia iloa atu ai i le pogisa o le auala, se tagata e le o mamao i tua, o lo o mulimuli mai ia la’ua.

“Pe to’afia ni tagata ua lavevea i faiga pepelo ma le gaoi a le vaega lea,” o le talanoa ane lea a Tepora ma lona le iloa lava o le mea o lo o tupu.

Na faate’ia Tepora i le opo atu o ia e Tavita i lona lima taumatau ma musumusu atu, “Na o lou savali lava ma talanoa mai pea.  Ae e iai le mea lea ua tupu,” o le musumusu atu lea a Tavita i le taliga o Tepora.  “E iai le tagata lea e mulimuli mai ia ta’ua.”

Ana le vave le o’omi e Tavita ia Tepora, semanu ua faasaga i tua le tamaitai e tau vaai po o ai lea e mulimuli mai ia la’ua.

“Aua!  Savali pei lava e le o tupu se mea!” o le faatonuga lea a Tavita.  “Faalogo faalelei mai, a ou fai atu loa, ona vave lea o lau gaioiga!”

E FAIA PEA!