TU LUA O PO MA AO

VAEGA 21

E faatalofa atu i si o tatou aiga i lenei taeao fou.  Tatou si’i faatasi le mua ma le viiga i le Tapaau i le Lagi ona o Lana pule faasoifua ma Lana pule to, ua mafai ai ona tatou aulia mai lenei taeao fou, taeao toto’a, i le soifua maua ma le lagi e mama.  E faafetai atu foi ia te outou o lo o lagolagoina lenei auaunaga i vaiaso taitasi.

Ae saga’i mai loa, o le a toe soso’oina le tatou tala i le alii o Tavita ma le tamaitai o Tepora ma le tau sailiga o le ‘diary’ faitatala lenei ua maliliu ai tagata e toalua.

****************

Na gata le tatou tala i le vaiaso ua tuanai, o lo o talatalanoa Tavita ma Tepora ma si toeaina o Atamu, e tau sailiili pe na iai se tagata na o’o mai ia Atamu e taufaasese si toeaina i ana tupe.

“Ioe, sa sau se tamaloa, e pei lava na faamatala e le agaga o le tagata maliu o le matou aiga lea na fai mai ai,” O le tali faavasivasi lea a Atamu.

“E mafai ona e faamatala mai foliga o lea tamaloa?” o le fesili lea a Tepora.

Na moeiini mata o Atamu ma faanunumi lona muaulu ma faapea mai, “E pei lava e afaina lona vae, ona a savali e setu lona vae.  E fai lana ‘ava ma lana vaaiga.  Ae aisea ua lua fia iloa ai foliga o lea tamaloa?”

“Na iai foi se tamaloa na sau ia te a’u i le mea lava lea e tasi,” o le tali faatopetope atu lea a Tavita.  “Ma sa ia ta’uina mai lou igoa.  O le mea lea ua ma o mai ai e fesili atu ia oe, pe moni na sau se tagata faapea ia te oe.”

“Oi, na alatu foi ia te oe e fesili atu ia oe, mo sana siea i le maina?” o le fesili lea a Atamu.

O le taimi lea ia Tepora, ua na o le nofo sa’o ma tilotilo atu ma le alofa I si toeaina o Atamu, ona ua na iloa lelei, o taumafaiga tau faasese ma le gaoi le mea a le tamaloa lea o lo’o taumafai e fai i si nei toeaina.

“O lea ou te mafaufau iai, ae e iai ni nai o’u masalosaloga, ona e na te le’i fa’aali mai ni pepa faamaumau e faamaonia ai le moni o lana kamupani,” o le tali lea a Tavita.

“Oi, a lea na tago tu’u mai ia te a’u pepa e faamaonia ai lana kamupani,” o le oso atu lea a Atamu.

“E mafai lava ona ou vaai i au pepa na?” o le fesili atu lea a Tavita.

“Faatali mai so’u alu e aumai.  Ou te iloa na fai mai lea alii, e aua nei fa’aali i tagata e latou te le’i iloa lana kamupani, ae o lena na talanoa atu ia te oe,” e fai lava le tala a le toeaina o Atamu ma tu i luga mai lona nofoa ma savali atu i lana sefe ma tatala, ma aumai ai pepa sa i totonu.

Na fofola e Tavita ia nei pepa i luga o le laulau.  “E foliga mai e okay ia nei pepa.  O le a sau vaai Tepora?”   Ua savali atu nei Tepora ma tilotilo i pepa i luga o le laulau.

“Leai, e foliga mai o lo o moni ma faamaoni nei pepa faamaumau,” o le tali lea a Tepora ina ua uma ona faasolo lana vaai i le pepa. 

“Na fai mai le alii, o lana kamupani e pulea se maina i le itu i sasa’e o le atunu’u, o lo o maina ai auro.  Ma ua maliu le pule o le latou kamupani, ae ua tu’u i lona atalii le maina.  Ma o lea ua fuafua lona atalii e tatala ma galueaiina le maina,” o a Atamu lea.

“Ae e mana’omia se tupe e amata ai galuega o le maina, o le sa’o lea?” o le fesili atu lea a Tavita.

“O lea lava.  Ou te iloa, e mafai ona faateleina la’u tupe e inivesi i le maina lea,” o le tala lea a Atamu.

“E moni na ou tau le talitonu i faamatalaga a le agaga i le po lea i le fale o Tina.  Ae peitai, ina ua sau le alii lea ma fa’aali uma mai pepa faamaumau o le maina ma faamautu fuafuaga uma i tulaga tau tupe, sa suia ai lo’u mafaufau ma o lea ua inivesi ai la’u tupe i le kamupani lea,” o le tala lea a Atamu ma le lilo i ona manatu, ua olegia o ia e se tagata poto i le gaoi ma le taufa’asese.

E FAIA PEA