“Tu & Lele Malie Lau Ti’a” i Tala’aga Fa’asolopito

“O le aofa’iga o fanau na tofu sao e fa’atino ma fa’amatala a galuega mo le Tala Fa’asolopito o le Lalolagi ua latou filifilia e silia ma le 260 peita’i a tu’ufa’atasia ma le 400 i le Fa’aaliga o Galuega Fa’atino o le Tala Fa’asolopito mo aoga tulaga muamua na faia i le aso Lulu, ua latalata lava i le 700 i latou na fa’atinoa galuega mo le maimoaga a le vasega o fa’amasino i lenei tausaga i le fa’aaliga mo fanau aoga uma i le teritori o Amerika Samoa,” o se tali lea a le tofa Taula Niualama Taifane, fa’atonu o le American Samoa Humanities Council, ina ua fesiligia i se aofaiga o le fanau a’oga o lo’o ua fai o latou sao i lenei tausaga mo lea fa’aaliga, ma o ia fo’i lea e nafa ma le faatautaiga o lea fa’aaliga atoa, fa’atasi ai ma le latou pa’aga o le Matagaluega o A’oga a le malo.

O le to’atele lenei, o nisi ua mae’a filifilia mai e latou a’oga ina ua mae’a le tauvaga a le a’oga ta’itasi, o lona uiga a ta i tua lea fo’i aofaiga o le fanau sa fa’atino galuega tau le tala fa’asolopito i lenei tausaga e silia mamao ma le 2,000 o le fanau a’oga uma i le atunu’u. O lea itu, ua avatu ai se fa’amalo mai le tofa Taula ma le latou Komiti Fa’afoe lea e ta’ita’ia e le afioga le Maluolefale Faiivae A. Godinet ma le laulauafono, ma le aufaigaluega i le ofisa.

I lenei tausaga ua fa’atulaga ai le manulauti “Tu & Lele Malie Lau Ti’a i Tala’aga Fa’asolopito!” Pe a fa’aperetaniaina - “Taking a Stand in History!”

I galuega sa fa’aalia a le fanau, ua iloga ai le felanulanua’i o galuega fa’atino na fatuatia ai nisi iloga i le lalolagi mai le tele o atunu’u, e afua mai Filipaina, Samoa, Amerika Samoa, Iunaite Setete o Amerika ma isi malo o le lalolagi. I latou sa talitonu ma galulue malosi ina ia tu ma lele a latou mau na fa’atu ina ia le fefe le tagata e fai le mea sa’o!

Na i ai nisi o galuega fa’atino sa iloga ona latou una’ia le taofia o le fa’apologa o tagata ma sa tu ma lele ai le ti’a a “Nat Turner” sa fa’atino lea e Arieta Ioane mai le Samoana High. O le isi galuega fa’atino sa iloga ai le taofia o le so’ona fa’aipoipo o tagata lanu i tama’ita’i papalagi, lea na fa’ailo e le galuega a Farrah Young mai Tafuna High.

Na i ai le galuega fa’atino e fa’atatau ia Martin Luther King Jr. lea sa tu malosi foi e taofia le fa’ailoga lanu i Amerika ma na tapena e le tama’ita’i o Gabriella Curruthers mai le Pacific Horizons.

O le galuega na fa’atino e le tama’ita’i o Serenalia Iona mai Leone High e fa’atatau i le Tusitala na ia tau’avea le manulauti o le malosi o le upu poo tusitusiga, ua mafua ai taua ina ia saili le saolotoga o tagata lautele. Le tusitala o Thomas Paine.

O le isi galuega sa matagofie fo’i lona aumaia o le Leo o Meaola, i latou e le lagona ni o latou leo i totonu o lenei soifuaga e ola feso’ota’i ai ma tagata soifua ma la’au. “Voice of the Voiceless”, na tapena e le ali’i o Koneferenisi Purcel mai le a’oga a le Manumalo Academy.

E le’i misia lava le tala fa’asolopito o lo’o tusia mo le ali’i peresetene sa tele lona sao i le fa’asaolotoina o tagala lanu mai le nofo pologa, Abraham Lincoln sa saunia lelei e Galuefa Rarotonga mai Fagaitua High. Na tu ma lele fo’i le ti’a a “Douglas MacArthur” o se ta’ita’i Amerika na ia fa’asa’olotoina le to’atele o tagata i Filipaina. Na saunia e le ali’i o Vincent Maverick Jagon mai Fa’asao Marist High.

O nisi na o galuega sa maimoaina i le vaega a le “Exhibit” pe ua tusia lelei ma lomia ae fa’apipi’i lelei i laupapa fa’ailo.

E ono vaega sa vaevaeina i ai lenei fa’aaliga e amata mai i le “Galuega Fa’atino” Taito’atasi & taito’alua ma le to’atele. Documentaries po’o Ata Fa’asolo pu’e lelei, galuega ta’ito’atasi pe to’atele fo’i. O le vaega o Uepesite po’o Websites, ma latou Sailiga Tusitusia po’o Research Papers.

O le tolaulauina o i latou ua tulaga togisilia i vaega ta’itasi nei, fa’apea ai ma sui ua togi sili i le vaega o A’oga Maualuluga pe afai e fa’atusalia  togi uma na maua i poloketi ta’itasi, o e a fa’atautaia lea i le aso i le itula e 1:00 i le aoauli i le Fale Ta’alo lava o Kanana Fou.

Peta’i, i le taima nei, ua mautu mai le fa’ai’uga o le sui ua mauaina le tulaga togisilia i le aotelega o fanau uma sa tauva i galuega fa’atino o le Tala Fa’asolopito 2017 i A’oga Tulaga Muamua lea sa faia le tauvaga i le aso Lulu. O lo ua fa’ailoa mai le o le ali’i talavou o Tavilla Collin Punishment. Tulaga lua i le aotelega lava o le tama’ita’i o Harmony Siamaua Leo mai Iakina Academy fo’i. Tulaga tolu le poloketi a le sui mai St Theresa. Peita’i, o le a toe fa’alauiloa aloa’ia ai tulaga mua mai vaega ta’itasi i aoga tulaga muamua ma a’oga maualuluga fo’i.