Tolopo le lauina fa’asalaga Tina ua ta’usala ave fa’agaoi silia $36,000

Ua toe tolopo e le Fa’amasinoga Maualuga le tuuina atu o sana fa’asalaga fa’asaga i le Tina lea ua ta’usala i lona ave fa’agaoi o se vaega tupe tele e tusa ma le $36,000 mai le Ofisa sa galue ai, ina ia mafai e le ua molia ma lana loia ona fa’ailoa atu i le fa’amasinoga auala e toe totogi ai lenei vaega tupe tele.

O le aso Faraile o le vaiaso nei lea ua fa’atulaga e toe valaau ai le mataupu a Dorothy Elia i luma o le afioga i le Fa’amasino Sili ia Michael Kruse ma ana Fa’amasino Lagolago ia Mamea Sala Jr ma Suapaia J. Pereira. O le ali’i loia fautua ia Michael White na tula’i mo Elia, lea o loo taofia pea i le toese i Tafuna talu mai le taimi na loka ai o ia i le 2017, ae o le tama’ita’i loia sili lagolago ia Christy Dunn na tula’i mo le itu a le malo.

Ina ua valaau le mataupu a Elia i le aso Faraile o le vaiaso na te’a nei, na maua ai le avanoa o le Fa’amasinoga e fa’afofoga ai i le talosaga a le ua molia ma lona Tina, mo se avanoa e toe fo’i atu ai i tua i lona aiga e tausi lana tama o loo a’afia i se gasegase tuga faapea ai ma si ona Tama ua matua, ma o loo gasegase fo’i.

Na taua e Elia, 37 tausaga le matua ma loimata i luma o le fa’amasinoga e fa’apea, o lana solitulafono sa faia ua mafua ai ona tutupu lagona faigata i le va o ia ma si ana fanau, aemaise ai fo’i ona matua.

Ina ua mae’a ona ia fa’atoese i le fa’amasinoga atoa ai ma le malo o Amerika Samoa e tusa ai o lana solitulafono, sa ia fa’afetai faapitoa ai loa i ona matua i lo la alolofa faamaoni ia te ia, a o fetaia’i ai ma fa’afitauli o le olaga.

Na taua e Elia e fa’apea, o se tasi o lesona pito sili ona taua sa ia aoaoina mai totonu o le toese, o le alofa o Matua e le mafai ona gata mai, tusa lava poo a fa’afitauli ma lu’itau e tutupu i le olaga. Sa i ai i totonu o le potu fa’amasino si ona Tina.

Sa faasoa e Elia i le fa’amasinoga se tala fa’anoanoa na manu’a ai lona loto, ina ua logo atu le tala e fa’atatau i si ana tama matua, ma se gasegase tuga ua aafia ai lona soifua maloloina.

“O le tele o taimi ou te lagonaina ai le tiga ma le mafatia i taimi uma e fesili mai ai si a’u tama matua ia te ai, Mama, o afea e te toe fo’i mai ai i lo tatou aiga, ae sa ou tali atu i ai, ou te le iloa,” o le molimau lea a Elia ma loimata i luma o le fa’amasinoga.

Sa ia fa’aoloolo maau i le fa’amasinoga mo se avanoa e tatala ai o ia i tua se’i mafuta atu i lana fanau ma tausi nai ona matua ua matutua, ae sili ai i lo lena, o se avanoa e mafai ai ona ia tausi i si ana tama ua aafia i le gasegase, faapea ai ma si ona Tama ua matua ma ua ma’i fo’i o ia.

Na ta’utino Elia e fa’apea, afai ae maua sona avanoa, e le toe tepa i aso ua tuana’i o lona olaga, ae o le a fa’aaoga tatau ona aso e fai ai se isi mea e sili atu ona lelei mo lona aiga, ma saili sana galuega e toe totogi ai le tupe sa ia fa’aaogaina.

Ina ua maua fo’i le avanoa o le Tina a Elia e molimau ai i luma o le fa’amasinoga, sa ia talosagaina ai le fa’amasinoga ina ia fa’amagalo se sese o si ana tama, ae tu’u i ai se avanoa e toe fo’i atu ai i tua se’i o latou mafuta.

Na taua e le Tina a Elia e fa’apea, i le avea ai o ia ma Tina, na te lagonaina fo’i lagona mafatia o Dorothy ona o le misia o si ana fanau, e fa’apena fo’i ia te ia i lona misia o Elia i aso uma talu ona loka o ia i le falepuipui.

I lana molimau sa ia taua ai e fa’apea, o Dorothy, o ia o se Tina lelei ma loto alofa i lona aiga, e le o ia o se tagata leaga. O le mea sese ua ia faia ua mafua ai ona a’afia le latou mafutaga ma si ana fanau.

“Ou te manatua le tele o taimi e fesili mai ai le fanau a Dorothy ia te a’u, Grandma, o afea e toe sau ai lo matou Tina i lo tatou aiga. Ou te le tali i se upu ae na o le maligi o o’u loimata i lo’u alofa ia Dorothy ma lana fanau ona o le mafutaga ua motusia fa’afuase’i,” o le molimau lea a le Tina i luma o le fa’amasinoga.

Na talosaga le ali’i loia fautua ia White i le fa’amasinoga ina ia fa’asala Elia i se fa’asalaga fa’anofovaavaaia, e aunoa ma le toe tuuina atu o ia i le falepuipui, ina ia mafai ai ona alu o ia i tua e saili sana galuega e totogi ai le tupe na a’afia i lana solitulafono.

Na taua e White e faapea, e tusa ma le $12,000 le tupe lea ua mae’a ona toe totogi e le ua molia i le Ofisa sa faigaluega ai, ma le fa’amoemoe o le a ia taumafai e saili nisi auala e toe totogi ai le paleni o loo totoe.

Na oso fa’alava le afioga i le fa’amasino sili ia Kruse ma saunoa e fa’apea, “O lea e finau mai o ia e le toe fia fo’i i le falepuipui. Ua fia alu i tua i lona aiga e tausi lana tama faapea ai lona Tama ua ma’i. Peita’i o le itu lea e fia faalogo atu i ai le fa’amasinoga, o le a se gaioiga e fai ina ia toe totogi ai le tupe sa ia fa’aaogaina. E tele naua le tupe lea e totoe e le’i toe totogia.”

Na toe saunoa Kruse e fa’apea, na pau lava le itu o loo fia faalogo atu i ai le fa’amasinoga, o le auala e toe totogi ai e le ua molia le tupe o loo totoe.

Saunoa atili le Faamasino Sili e fa’apea, e le o se taimi muamua lenei ua oo atu ai i luma o le fa’amasinoga mataupu faapenei e aafia ai Tina e laiti o latou aiga ma fanau, ae tu’uaia i le ave faagaoi o tupe mai ofisa ma kamupani sa galulue ai.

Na faamanatu e Kruse ia White e fa’apea, afai e le mafai e le ua molia ona ia toe totogi le vaega tupe o loo totoe, na pau le faaiuga a le fa’amasinoga e fai i ai, o le toe fa’afo’i lea o ia i le toese e tuli ai lana fa’asalaga.

“E tatau ia Elia ona manatunatu lelei i se auala e toe totogi ai le tupe o loo totoe, aua afai e le mafai ona ia faailoa mai i le fa’amasinoga se auala e toe totogi ai le tupe, na pau le faaiuga a le fa’amasinoga o le faatino loa o le fa’asalaga talafeagai mo ia,” o le saunoaga lea a Kruse.

Ua tuu atu nei e le fa’amasinoga le vaiaso e tasi mo Elia ma lana loia e mafaufau ai i se auala e tatau ona faia ina ia toe totogi ai le vaega tupe o loo totoe.

E fa moliaga mamafa na ulua’i tu’uaia ai e le malo ia Elia, ae i lalo o se maliliega sa sainia e le ua molia ma le malo, sa ia tali ioe ai loa i le moliaga mamafa e tasi o lona ave fa’agaoi o tupe.

I le va o le masina o Ianuari ma Oketopa o le 2016, na taua ai e Elia lona fa’aaogaina o tupe a le Ofisa o le Native American Samoa Advisory Committee mo ia lava. Sa ia ta’utino i luma o le fa’amasinoga, e tusa ma le $36,000 le aofa’i o le tupe sa ia fa’aaogaina.