Tolopo le fa’amasinoga autu a Luatua sa fuafua mo le masina nei

E ui sa tete’e le loia a Luatua Filisouaiga Ta’afua i le talosaga a le malo ina ia toe tolopo le fa’amasinoga autu sa fuafua e faia i le faaiuga o le masina nei, ae na talia lava e le afioga i le ali’i Fa’amasino ia Elivs P. Patea le talosaga a le malo, ona o ni isi o mafua’aga tatau e pei ona fa’aleo e le Fa’amasinoga.

O le aso 23 Iulai lea na fa’atulaga e fa’ataunu’u aloaia ai le fa’amasinoga autu o Luatua, e tusa ai o tu’uaiga fa’asaga ia te ia, i lona fa’aaoga fa’asolitulafono lea o tupe a le Ofisa o le Litaea a le malo e silia i le $100,000, a o avea ai o ia ma Pulesili o lea Ofisa i tausaga ua mavae.

O le tama’ita’i loia ia Gwen Tauiliili-Langkilde o lo o tula’i mo Luatua, ae o le ali’i loia sili lagolago ia Robert Morris o lo o tula’i mo le malo o Amerika Samoa i lenei mataupu.

O le vaiaso na te’a nei na toe valaauina ai le mataupu a Luatua i luma o le Fa’amasinoga, ona o se talosaga na faila e le malo e tolopo ai le fa’ataunu’uina o le fa’amasinoga autu ua fuafua mo le vaiaso fou, a ia toe fa’atulaga se isi aso talafeagai e fa’ataunu’u aloaia ai lea fa’amasinoga.

Ina ua fesiligia e Patea ia Morris i le mafua’aga autu ua ala ai ona manatu le malo e toe tolopo le fa’amasinoga autu, na taua ai e le ali’i loia e fa’apea, e i ai ni isi o mafua’aga le ma’alofia ua tula’i mai ua le mafai ai e le malo ona fa’aauau le fa’amasinoga.

O ni isi o ia mafua’aga e aofia ai le maliu fa’afuase’i o se tasi o ana molimau autu, atoa ai ma le malaga ese atu o le isi molimau mo sona taotoga i Hawaii. O le isi molimau a le malo, o le a fa’aauau pea ona taunu’u mai o ia i le vaiaso nei e sauni ai mo le fa’amasinoga autu i le vaiaso fou.

“Ou te mautinoa lava e tete’e malosi nei le itu a Luatua i le talosaga a le malo, ae ua le mafai lava e le malo ona faia se isi auala e fa’aauau ai lenei mataupu, ma ua manatu ai loa e tuuina atu lenei talosaga i le fa’amasinoga,” o le saunoaga lea a Morris i le fa’amasinoga. Sa ia talosagaina fo’i le fa’amasinoga ina ia tolopo le fa’amasinoga mo le 6 masina.

Ina ua tuuina atu le avanoa ia Tauiliili-Langkilde e saunoa ai, na fa’aleo ai e le tama’ita’i loia lona matua teena i le talosaga a le malo.

Na faamanatu e le loia a le itu tete’e i le fa’amasinoga e fa’apea, o le fa’amasinoga na faamaoniaina le aso e faia ai le fa’amasinoga autu o lenei mataupu. E ui la o lea ua maliu le susuga a Fanene Morris Scanlan, ae o se tasi o itu e faateia ai le itu tete’e, o le malaga fa’afuase’i lea o le isi molimau a le malo mo lana taotoga i fafo.

Na taua e le loia a le itu tete’e e fa’apea, sa i ai lava le molimau lona lua lea a le malo i le taimi na fa’atoa maliu ai Fanene, a o lea ua fa’afuase’i ona malaga i fafo. E le iloa poo anafea na malaga ese atu ai, ae aisea fo’i ua malaga ai i fafo, e le o iloa tonu poo afea e toe fo’i mai ai.

Saunoa atili Tauiliili-Langkilde e fa’apea, ua silia ma le 2 tausaga talu ona faila e le malo le tagi fa’asaga ia Luatua. E ui o lo o tatala o ia i tua ina ua totogi le tupe na fa’atulaga, peita’i ua faigata ona aga’i i luma lona olaga, ona o lenei mataupu o lo o fa’amalumalu mai i ona luga.

Ona o ia mafua’aga e tele, na talosaga ai loa le loia a le itu tete’e i le fa’amasinoga, ina ia teena le talosaga a le malo e toe tolopo le fa’amasinoga autu o Luatua.

Na faailoa e Patea i lana saunoaga le fa’afofoga ma le toto’a o le fa’amasinoga i le fa’atuiese a Luatua ma lana loia i le talosaga a le malo, peita’i i le silasila atu ai a le fa’amasinoga i lenei mataupu, e foliga mai o loo talafeagai mafua’aga ua fa’aalia e le malo e lagolagoina ai la latou talosaga.

Ona o mafua’aga e pei ona taua, na talia ai loa e le fa’amasinoga le talosaga a le malo ina ia toe tolopo le fa’amasinoga o Luatua seia aulia se isi taimi talafeagai.

Ae mo le talosaga ina ia tolopo le fa’amasinoga mo le isi 6 masina, saunoa Patea e fa’apea, o le a iloilo e le fa’amasinoga lea talosaga mai le malo.