Tofu le mataupu a Tiumalu i luma o le Fa’amasinoga Maualuga

Ua i luma nei o le Fa’amasinoga Maualuga le tagi a le malo fa’asaga ia Vine Tiumalu, ina ua fa’amalieina le Fa’amasinoga Faaitumalo i mau sa folasia e le malo i le vaiaso na te’a nei, e lagolago ai le latou tagi fa’asaga i lenei mataupu.

E ui i le tete’e malosi o le Loia a Tiumalu i mau sa folasia e le malo, peita’i na taua e le afioga i le ali’i Fa’amasino ia Elvis P. Patea, o mau na folasia e le malo o lo o atagia mai ai, sa auai Tiumalu i taumafaiga e tulei ma faatau atu fualaau faasaina i tagata lautele.

O le masina o Me 2020 e toe tula’i ai Tiumalu i luma o le Fa’amasinoga Maualuga, i le mae’a ai lea ona ia teena o le tagi a le malo fa’asaga ia te ia i le vaiaso na te’a nei i le taimi o lana ulua’i iloiloga.

Na toe teena fo’i e Patea le talosaga na tuuina atu e le itu tete’e, ina ia faaitiitia le tupe e taofia ai ai Tiumalu i le $5,000  mai le $10,000 o lo o i ai. O Tiumalu e pei ona taua e lana loia fautua, e na o ia o lona aiga e faigaluega e saili mai tupe e tausi ai lana fanau laiti e to’afa. Talu mai le taimi na taofia ai le ua molia i le Toese i Tafuna, ua fetaia’i lona aiga  ma tulaga faaletonu ina ua le maua se tupe e faatau ai meaai mo le fanau.

Na tete’e malosi le loia a le malo i le talosaga a le itu tete’e. Na taua e le loia a le malo e fa’apea, o lo o masalomia e le malo le sola ese o le ua molia mai le atunu’u pe afai ae tatala o ia i tua, o le mafua’aga fo’i lea na vave ai ona aapa le malo e aveese mai le Tusi Folau a le ua molia mai ia te ia, ina ia mautinoa na te tuua le atunu’u i se taimi faafuase’i.

O lo o tu’uaia e le malo le ua molia i le moliaga o le umia faasolitulafono o vaega o le pauta o le aisa, faapea ai ma le moliaga o le umia faasolitulafono o le aisa ma le faamoemoe e tulei ma faatau atu i isi tagata, o solitulafono mamafa e mafai ona faasala ai se tasi i le toese mai le 5 e oo atu i le 10 tausaga, poo le faasala i le salatupe e oo atu i le $20,000.

ULUA’I ILOILOGA

E to’atasi le molimau a le malo na valaau i le ulua’i iloiloga sa faia, i le Fa’amasinoga Fa’aitumao, o ia foi’ lea o le Leoleo Suesue sa gafa ma le suesueina o lenei mataupu.

E pei ona taua e le molimau a le malo e fa’apea, talu mai le amataga o le tausaga 2019, na maua ai e le Vaega a le Ofisa o Leoleo e Suesueina Fualaau Faasaina faamatalaga mai nisi o molimau, e uiga i le tagata e suafa ia “Spunk” o lo o ia tulei ma faatau mai fualaau fa’asaina mai lona fale i Tafeta. Na taua atili e moilmau eseese nei i Leoleo e fa’apea, o nisi o taimi e alu ai Spunk i lana ta’avale e kiliva fualaau fa’asaina i fale o tagata e le mafai ona oo atu i lona fale, ae o isi fo’i taimi e kiliva ai i Fale Faigaluega a i latou o lo o faatau mai ia te ia.

Na taua e le molimau i Leoleo, o ia le isi tagata e masani ona faatau mai ana fualaau faasaina i le ali’i o Spunk. Na saili e Leoleo le tagata e suafa ia Spunk ma iloa ai, o le igoa tauvalaau lea e faaigoa ai e le to’atele le susuga a Vine Tiumalu. E masani fo’i ona faaigoa o ia ia Thomas Tiu.

I le va o le masina o Tesema 2019 ma Ianuari 2020, na malie ai loa le molimau e galulue fa’atasima Leoleo Suesue, mo le sailiina lea o se auala e mafai ai ona maua ni mau faamaonia e faatatau ia Tiumalu o lo o ia faatauina atu fualaau fa’asaina.

Na taua e le molimau a le malo i lana faamatalaga e fa’apea, i le aso 29 o Tesema 2019, na tuu ai loa e Leoleo Suesue le tupe e $50 i le molimau faapitoa mo le faatauina mai o fualaau fa’asaina o le aisa mai ia Tiumalu. A o le i faia le faatau, na muamua vili le molimau faatuatuaina ia Tiumalu e faailoa i ai le aofa’i o lana faatau o lo o mana’o i ai.

O lea talanoaga na faalogologo uma i ai le molimau faatuatuaina, atoa ai ma Leoleo faapitoa e to’alua a le malo sa i ai i lea taimi i totonu o le ta’avale a Leoleo. I lea talanoaga, na faailoa i ai e le ua molia i le molimau faapitoa le nofoaga e faia ai le fefaatauaiga faapea ai ma le taimi.

Na momoli e Leoleo Suesue le molimau faapitoa i le nofoaga na mana’o le ua molia e faia ai le fefaatauaiga o fualaau fa’asaina.

A o aga’i le molimau faapitoa i le nofoaga na faatonu e le ua molia la te fetaui ai, o le taimi lea na mataitu ai e Leoleo Suesue gaioiga uma sa faia, e aofia ai le taimi na sosolo atu ai le ta’avale a le ua molia ma tu i tafatafa o le molimau faapitoa, faapea ai ma le taimi na oso ai i fafo le ua molia mai lana ta’avale ma tuu atu le pepa iila o lo o i ai vaega o le pauta faasaina i le lima o le molimau faapitoa, ae tuu atu e le molimau faapitoa i le lima o le ua molia le $50.

Na toe fo’i le molimau faapitoa i le ta’avale a Leoleo Suesue ma tuu i ai le pepa iila o lo o i ai vaega o le pauta o le aisa, ma faamaonia ai, o fualaau faasaina ia na faatau mai i le ua molia.

Tasi le vaiaso talu ona mae’a le gaioiga e pei ona molimauina e Leoleo, na osofa’i ai loa e Leoleo le fale a le ua molia e tusa ai ma se poloaiga a le Fa’amasinoga, ma maua i ai fualaau fa’asaina, o se fana, atoa ai ma faamaumauga e faamaonia ai, o lo o aofia le ua molia i le tuleiina atu o fualaau fa’asaina i tagata lautele.

Ina ua maua le avanoa o le Loia a le itu tete’e e fesiligia ai le molimau a le malo, sa fia malamalama ai le Loia a le itu tete’e, pe na maua ni fualaau faasaina i le tino o le ua molia i le taimi na aga’i atu ai le molimau faapitoa e faia le fa’atau. Na tali le molimau a le malo, “E leai”.

Na toe fesili le Loia a le itu tete’e pe sa i ai ni faamaoniga e pei o ata na pu’eina e faamaonia ai le taimi na faia ai le fefaatauaiga i le va o le ua molia ma le molimau faapitoa a Leoleo. Na tali le molimau a le malo, “E leai”.

“O ai la le igoa o le molimau faapitoa a le malo lea na fa’aaoga e faatinoina le faatauina mai o fualaau fa’asaina mai ia Tiumalu,” o le fesili lea a le Loia a le itu tete’e.

E le i tali le molimau i le fesili peita’i na vave ona faauilavea le afioga a Patea ma ia faailoa i le Loia a le itu tete’e, e le mafai ona faailoa le igoa o le molimau faapitoa i le taimi o ulua’i iloiloga, se’i vagana ua amata le Faamasinoga autu o lenei mataupu i luma o le Fa’amasinoga Maualuga, ona fa’atoa mafai lea ona tupu le tulaga lea.

I le mae’a ai ona faafofoga o le Fa’amasinoga i mau sa folasia e le malo, na saunoa ai loa le afioga a Patea, ua lava ma totoe mau na folasia e le malo e lagolago ai le latou tagi fa’asaga ia Tiumalu.